గ్యాస్ వినియోగదారులకు బిగ్ రిలీఫ్.. ఇక ఓటీపీతో పనిలేదు!

ఏపీలో అర్నబ్ తుఫాను బీభత్సం చేసింది. ఇంకా చాలా ప్రాంతాలకు ప్రజలు వెళ్లలేని పరిస్థితి నెలకొంది. పరిస్థితి గమనించిన ప్రభుత్వం సహాయక చర్యలు వేగవంతం చేసింది. ఈ క్రమంలో తుఫాను ప్రభావిత ప్రాంతాల్లోని ఎల్పీజీ గ్యాస్ వినియోగదారులకు ప్రభుత్వం గుడ్ న్యూస్‌ చెప్పింది. గ్యాస్ సిలిండర్ డెలివరీ విషయంలో ఓటీపీ నుంచి తాత్కాలిక మినహాయింపు ఇచ్చింది కేంద్ర ప్రభుత్వం. ప్రకృతి విపత్తు సంభవించినప్పుడు మౌలిక సదుపాయాలు క్షణాల్లో అతలాకుతలమవుతాయి. విద్యుత్ లైన్లు తెగిపోతాయి, రహదారులు ధ్వంసం అవుతాయి. ఫోన్ సిగ్నల్స్ నిలిచిపోతాయి. ఇలాంటి సమస్యలు బాధితుల కష్టాలను మరింత రెట్టింపు చేస్తాయి. ఇటీవల ఏపీని వణికించిన ‘అర్నబ్’ తుఫాను సరిగ్గా అలాంటి పరిస్థితులనే సృష్టించింది. శ్రీకాకుళం నుంచి కృష్ణా జిల్లా వరకు రహదారులు దెబ్బతిని, చెట్లు నేలకూలి రవాణా వ్యవస్థ స్తంభించింది. మొబైల్ టవర్లు పనిచేయక కమ్యూనికేషన్ పూర్తిగా తెగిపోయింది. ఈ క్లిష్ట సమయంలో బాధితులకు ఎలాంటి ఇబ్బందులు రాకుండా ఉండటానికి సీఎం చంద్రబాబు నాయుడు నేతృత్వంలోని ప్రభుత్వం సహాయక చర్యలు వేగవంతం చేసింది. ఇందులో భాగంగానే, నిత్యావసరమైన వంట గ్యాస్ పంపిణీకి ఉన్న ‘ఓటీపీ’ నిబంధన నుంచి తాత్కాలిక మినహాయింపునిస్తూ కేంద్రంతో చర్చించి కీలక నిర్ణయం తీసుకుంది. సాధారణ రోజుల్లో గ్యాస్ సిలిండర్లు బ్లాక్ మార్కెట్‌కు తరలిపోకుండా, అర్హులైన వినియోగదారులకే చేరేలా డెలివరీ సమయంలో ఓటీపీ నమోదును తప్పనిసరి చేశారు. అయితే, అర్నబ్ తుఫాను ధాటికి 13 జిల్లాల్లో కరెంట్ లేక, మొబైల్ నెట్‌వర్క్‌లు పనిచేయక అంధకారం అలుముకుంది. దీంతో డెలివరీ బాయ్స్ ఇంటికి వచ్చినా, వినియోగదారులకు ఫోన్లలో ఓటీపీ రాకపోవడంతో సిలిండర్లు తీసుకోలేక తీవ్ర ఇబ్బందులు పడ్డారు. తుఫాను ప్రభావిత జిల్లాల్లో పర్యటించి, క్షేత్రస్థాయిలో ఉన్న ఈ సమస్య తీవ్రతను స్వయంగా పరిశీలించిన సీఎం చంద్రబాబు, తక్షణమే కేంద్ర ప్రభుత్వంతో మాట్లాడి ఓటీపీ నిబంధన నుంచి తాత్కాలిక సడలింపు పొందేలా చర్యలు తీసుకున్నారు. కేంద్రం తీసుకున్న నిర్ణయంతో గ్యాస్ పంపిణీ సంస్థలు ఓటీపీ ధృవీకరణతో సంబంధం లేకుండా నిరంతరాయంగా సిలిండర్లను అందజేస్తున్నాయి. నెట్‌వర్క్ సమస్యలతో సంబంధం లేకుండా వినియోగదారులు నేరుగా నగదు చెల్లించి గ్యాస్ సిలిండర్ పొందే వెసులుబాటు కలిగింది. బాధితులు కరెంట్, సిగ్నల్స్ లేని సమయంలో వంట గ్యాస్ కొరతను ఎదుర్కోకుండా ఈ సడలింపు ఎంతగానో తోడ్పడుతోంది. తుఫాను ప్రభావం తీవ్రంగా ఉన్న ఉమ్మడి శ్రీకాకుళం, విజయనగరం, విశాఖపట్నం, తూర్పుగోదావరి, పశ్చిమగోదావరి, కృష్ణా జిల్లాలతో పాటు అనుబంధంగా ఉన్న మొత్తం 13 జిల్లాల్లో ఈ ఓటీపీ మినహాయింపు అమల్లోకి వచ్చింది. బాధితుల ఇళ్లలో సాధారణ పరిస్థితులు నెలకొని, విద్యుత్ మరియు కమ్యూనికేషన్ వ్యవస్థలు పునరుద్ధరించబడే వరకు ఈ మినహాయింపు కొనసాగుతుంది. ఇతర జిల్లాల్లో మాత్రం యథావిధిగా ఓటీపీ ప్రక్రియ కొనసాగుతుందని అధికారులు స్పష్టం చేశారు.

మరిన్ని వీడియోల కోసం ఇక్కడ క్లిక్ చేయండి

Also Watch:

దీపావళిని 5 రోజులు ఎందుకు జరుపుకుంటారు?

బెంగళూరు నుంచి హైదరాబాద్‌ 2 గంటలే..

ఐటీ ఉద్యోగుల నయా ట్రెండ్‌.. వర్క్ ఫ్రమ్ పార్క్

నా వనవాసం ఎప్పుడు ముగుస్తుంది? రేణుదేశాయ్‌ కామెంట్స్‌ వైరల్‌

తెరపై నటులు.. కానీ నిజ జీవితంలో దొంగలు