Pepper Rice: జలుబుకు మందు ఇంట్లోనే.. ఘాటైన మిరియాల అన్నం.. ఇలా చేస్తే టేస్ట్ అదుర్స్

చలికాలంలో లేదా వాతావరణం మారినప్పుడు వచ్చే జలుబు, దగ్గు, గొంతు నొప్పికి మన పూర్వీకులు ఆయుర్వేదంగా ఉపయోగించిన ఆహారమే ఈ ఘాటైన పెప్పర్ రైస్ లేదా మిరియాల అన్నం. రుచితో పాటు ఔషధ గుణాలు మెండుగా ఉండుట వలన, ఇది అనారోగ్యంతో ఉన్నవారికి త్వరగా ఉపశమనం ఇస్తుంది.

తయారీకి కావలసినవి అన్నం (పొడిపొడిగా వండినది): 2 కప్పులు

మిరియాలు (తాజాగా దంచిన పొడి): 1.5 టీ స్పూన్లు

జీలకర్ర: 1 టీ స్పూన్

నెయ్యి లేదా నూనె: 2 టేబుల్ స్పూన్లు

పచ్చిమిర్చి (మధ్యకు చీల్చినవి): 2

ఎండు మిర్చి: 2

ఆవాలు, మినప్పప్పు, శనగపప్పు: 1/2 టీ స్పూన్ చొప్పున

కరివేపాకు: కొద్దిగా

జీడిపప్పు/పల్లీలు : కొద్దిగా

ఉప్పు: రుచికి సరిపడా

ఇంగువ : చిటికెడు

మిరియాల అన్నం తయారీ విధానం

అన్నాన్ని పొడిపొడిగా వండి, వెడల్పాటి పళ్లెంలోకి తీసుకుని పూర్తిగా చల్లార్చాలి.

స్టవ్ మీద బాణలి పెట్టి నెయ్యి/నూనె వేడి చేయాలి. ఆవాలు, మినప్పప్పు, శనగపప్పు వేసి బంగారు రంగు వచ్చేవరకు వేయించాలి.

ఇప్పుడు జీలకర్ర, ఎండుమిర్చి, పచ్చిమిర్చి, కరివేపాకు, ఇంగువ (ఐచ్ఛికం), జీడిపప్పు/పల్లీలు వేసి వేయించాలి. పోపు సిద్ధమయ్యాక, స్టవ్ ఆపివేసి… తాజాగా దంచిన మిరియాల పొడిని వేసి ఒక్కసారి కలిపి దింపాలి. (మిరియాల పొడి ఎక్కువసేపు వేయించరాదు, అలా చేస్తే దాని ఘాటు, వాసన తగ్గిపోతుంది.)

ఈ పోపు మిశ్రమాన్ని చల్లారిన అన్నంలో వేయాలి. రుచికి సరిపడా ఉప్పు వేసి, అన్నం విరగకుండా మెల్లగా కలపాలి. వేడి వేడిగా వడ్డించడానికి మిరియాల అన్నం సిద్ధం.

జలుబు నివారణకు : ఈ అన్నంలో ఉపయోగించే నల్ల మిరియాలలో ‘పైపెరైన్’ (Piperine) అనే రసాయనం ఉంటుంది. ఈ రసాయనమే జలుబు, దగ్గుకు ఉపశమనం ఇస్తుంది.

శ్లేష్మం తొలగింపు : మిరియాల ఘాటు, వేడి గుణం ముక్కు దిబ్బడను తక్షణమే తగ్గిస్తుంది. ఇది శ్లేష్మాన్ని (కఫం) కరిగించడంలో సహాయపడి, శ్వాస మార్గాలను తెరుస్తుంది.

యాంటీబయాటిక్ యాక్షన్: మిరియాలలో ఉండే యాంటీబ్యాక్టీరియల్, యాంటీఆక్సిడెంట్ గుణాలు జలుబుకు కారణమయ్యే బ్యాక్టీరియా, వైరస్‌లతో పోరాడతాయి.

శరీరానికి వేడి: జలుబు చేసినప్పుడు శరీరం చల్లబడుతుంది. ఈ అన్నం తినడం వలన శరీరంలో వేడి పెరుగుతుంది, ఇది రోగనిరోధక శక్తిని పెంచుతుంది.