మునగాకు నిల్వ పచ్చడి.. వేడి అన్నంలో నెయ్యితో తింటే 300 రోగాలు పరార్!

ప్రకృతి ప్రసాదించిన అద్భుతమైన ఔషధ గుణాలున్న మునగాకు 300కు పైగా రోగాలను నయం చేసే శక్తిని కలిగి ఉంటుంది. అటువంటి మునగాకుతో చేసే పచ్చడి కేవలం నోటికి రుచిని అందించడమే కాకుండా, శరీరానికి ఎన్నో ఆరోగ్య ప్రయోజనాలను చేకూరుస్తుంది. ఈ మునగాకు పచ్చడిని ఆంధ్ర శైలిలో తయారుచేసుకుంటే, వేడి అన్నంలో నెయ్యితో కలిపి తింటే దీని రుచికి ఎవరూ అస్సలు వదలలేరు. ఈ ప్రత్యేకమైన నిల్వ పచ్చడిని నెల రోజుల వరకు కూడా నిల్వ చేసుకోవచ్చు.

కావాల్సిన పదార్థాలు..

• మునగాకు: పెద్ద కట్ట (సుమారు నాలుగు పెద్ద గుప్పెళ్ళు)
• ఆవాలు: 2 స్పూన్లు
• మెంతులు: ¾ స్పూన్
• టమోటాలు: 4-5 (బాగా గుజ్జు ఉన్నవి)
• చింతపండు: చిన్న నిమ్మకాయ సైజు
• వెల్లుల్లి రెబ్బలు: 10 (తొక్కతో సహా), పోపు కోసం 20 (తొక్క తీసినవి)
• నూనె: 6-8 స్పూన్లు (తయారీకి), పోపు కోసం ఎక్కువ
• రాళ్ళ ఉప్పు/సాల్ట్: రుచికి సరిపడా
• కారం: 2 స్పూన్లు (ఘాటును బట్టి)
• పసుపు: ¼ స్పూన్
• ఎండుమిర్చి: 2-3 (పోపు కోసం)
• కరివేపాకు: తాజా రెమ్మలు (పోపు కోసం)

తయారీ విధానం..

ముందుగా ఒక కడాయిలో రెండు స్పూన్ల ఆవాలు, ముక్కాల్ స్పూన్ మెంతులు వేసి లో ఫ్లేమ్ లో రంగు మారి, మంచి వాసన వచ్చే వరకు వేయించుకోవాలి. మాడిపోకుండా చూసుకోవాలి. చల్లారిన తర్వాత వీటిని మెత్తని పొడిలా గ్రైండ్ చేసి పక్కన పెట్టుకోవాలి. అదే కడాయిలోకి శుభ్రం చేసి, తడి లేకుండా ఆరబెట్టుకున్న మునగాకును వేసుకోవాలి. లేత కాడలతో సహా వేసుకోవచ్చు, వీటిలో పీచు పదార్థం ఎక్కువగా ఉంటుంది. మునగాకు తడి పోయి డ్రైగా అయ్యేంత వరకు మధ్యమధ్యలో కలుపుతూ ఓపికగా వేయించుకోవాలి. ఇది ఎంత బాగా వేయించుకుంటే పచ్చడి అంత రుచిగా, ఎక్కువ రోజులు నిల్వ ఉంటుంది. మునగాకు డ్రై అయిన తర్వాత ఒక స్పూన్ నూనె వేసి మరో రెండు నిమిషాలు లో ఫ్లేమ్ లో వేయించి, ప్లేట్ లోకి తీసుకోవాలి.

అదే కడాయిలోకి ఆరేడు స్పూన్ల నూనె వేసి, వేడెక్కాక చిన్న ముక్కలుగా కట్ చేసుకున్న టమోటాలు, నిమ్మకాయ సైజు చింతపండు, తొక్కతో సహా పది వెల్లుల్లి రెబ్బలు వేసుకోవాలి. మూత పెట్టకుండా లో ఫ్లేమ్ లో, మీడియం ఫ్లేమ్ లో మార్చుకుంటూ టమోటాలు మెత్తటి గుజ్జులా అయ్యేంత వరకు వేయించుకోవాలి. మూత పెడితే ఆవిరి వల్ల తడి తగిలి పచ్చడి త్వరగా పాడవుతుంది. టమోటా గుజ్జు తయారైన తర్వాత, ముందుగా వేయించి పెట్టుకున్న మునగాకును వేసుకోవాలి. దీనికి సరిపడా ఆవాలు, మెంతి పొడి, రుచికి తగినంత రాళ్ళ ఉప్పు లేదా సాల్ట్, రెండు స్పూన్ల కారం, కాల్ స్పూన్ పసుపు వేసి లో ఫ్లేమ్ లో బాగా కలుపుకోవాలి. మిశ్రమం డ్రైగా అనిపిస్తే కొద్దిగా నూనె వేసుకోవచ్చు. పచ్చిదనం పోయేదాకా నిమిషం పాటు వేయించి, స్టవ్ ఆఫ్ చేసి పూర్తిగా చల్లారనివ్వాలి. చల్లారిన మిశ్రమాన్ని మిక్సీ జార్ లోకి వేసి, మరీ మెత్తని పేస్ట్ లా కాకుండా, అక్కడక్కడ ఆకులు కనిపించేలా గ్రైండ్ చేసుకోవాలి. వేడి మీద గ్రైండ్ చేయకూడదు, లేకపోతే ఆవిరి వల్ల పచ్చడి త్వరగా పాడవుతుంది.

ఇవి కూడా చదవండి

గుంటూరు కోడి వేపుడు అంటే.. ఉఫ్ ఉఫ్ అనుకుంటూ తినాల్సిందే!

దేవుడితో బేరమా..? భక్తి అంటే దేవుడితో ఒప్పందం కాదు!

JEE Advanced 2027 షెడ్యూల్‌ వచ్చేసిందోచ్‌..! రాత పరీక్ష ఎప్పుడంటే

మాటలు కోటలు దాటుతాయి.. చేతలు మాత్రం గడప దాటవ్.. కోతి ఉపవాసం కథ

అదే కడాయిలోకి కొంచెం ఎక్కువ నూనె వేసి వేడెక్కాక, ఒక స్పూన్ ఆవాలు, రెండు మూడు ఎండుమిర్చి వేయాలి. ఆవాలు చిటపటలాడాక, తొక్క తీసిన సుమారు 20 వెల్లుల్లి రెబ్బలు వేసి లో ఫ్లేమ్ లో నిమిషం పాటు వేయించాలి. తర్వాత శుభ్రం చేసుకున్న కరివేపాకు రెమ్మలు వేసి చిటపటలాడటం ఆగిపోయిన తర్వాత, ముందుగా గ్రైండ్ చేసుకున్న మునగాకు పచ్చడిని వేసి బాగా కలుపుకోవాలి. ఉప్పు, కారం సరిచూసుకుని, స్టవ్ ఆఫ్ చేయాలి. పచ్చడి పూర్తిగా చల్లారిన తర్వాత శుభ్రమైన, తడి లేని గాజు సీసాలలో లేదా పింగాణి జాడీలలో నిల్వ చేసుకోవాలి. ఎక్కువ రోజులు నిల్వ ఉండాలంటే పచ్చడి పైన నూనె పొర తేలి ఉండాలి. అవసరమైతే మళ్ళీ నూనె వేడి చేసి చల్లార్చిన తర్వాత పచ్చడి పైన వేసుకోవచ్చు. పచ్చడి తీసుకునేటప్పుడు ఎప్పుడూ పొడి చెంచాను మాత్రమే ఉపయోగించాలి. ఈ అద్భుతమైన మునగాకు పచ్చడి ఆరోగ్యానికి ఆరోగ్యం, రుచికి రుచి అందిస్తూ మీ భోజనానికి ప్రత్యేకతను చేకూరుస్తుంది.