టాలీవుడ్‌పై ఫోకస్ చేస్తున్న స్టార్ బ్రదర్స్

పేరుకి తమిళ హీరోలే అయినప్పటికీ, తెలుగు రాష్ట్రాల్లో సూర్య, కార్తీలకున్న క్రేజ్ అపారం. తమిళ ఇండస్ట్రీపైనే ఎక్కువ దృష్టి పెట్టిన ఈ స్టార్ బ్రదర్స్ ఇప్పుడు టాలీవుడ్‌పై ప్రత్యేకంగా దృష్టి సారించారు. స్ట్రెయిట్ తెలుగు సినిమాలతో తెలుగు మార్కెట్‌ను పూర్తిగా తమ గుప్పెట్లోకి తెచ్చుకోవాలనే పక్కా ప్రణాళికతో వీరు ముందుకు సాగుతున్నారు. విలక్షణ నటనతో తెలుగు ప్రేక్షకులను ఆకట్టుకున్న సూర్య, ఇటీవలే వెంకీ అట్లూరి దర్శకత్వంలో విశ్వనాథ్ అండ్ సన్స్ చిత్రంతో ఘన విజయం అందుకున్నారు. ఈ విజయంతో మరింత ఉత్సాహంగా ఉన్న సూర్య, మాస్ డైరెక్టర్ బోయపాటితో పాటు బుచ్చిబాబుతోనూ కథా చర్చలు జరుపుతున్నారు. ఈ ప్రాజెక్టులు కుదిరితే, సూర్య నుంచి మరిన్ని స్ట్రెయిట్ తెలుగు సినిమాలు రావడం ఖాయం. అన్నయ్య సూర్య కంటే ముందే టాలీవుడ్‌లో ప్రవేశించిన కార్తీ, వంశీ పైడిపల్లి దర్శకత్వంలో వచ్చిన ఊపిరి సినిమాతో తెలుగు ప్రేక్షకులను ఎంతగానో ఆకట్టుకున్నారు. ప్రస్తుతం, మ్యాడ్ ఫేమ్ కళ్యాణ్ శంకర్ దర్శకత్వంలో రూపొందుతున్న తన తెలుగు సినిమా షూటింగ్ చివరి దశకు చేరుకుంది. కళ్యాణ్ శంకర్ మాత్రమే కాకుండా, మరో ఇద్దరు తెలుగు దర్శకులు కార్తీ కోసం కథలను సిద్ధం చేస్తున్నారు. అంతేకాకుండా, హిట్ ఫ్రాంచైజీ దర్శకుడు శైలేష్ కొలను కార్తీతో హిట్ 4 చేయబోతున్నట్లు ఇప్పటికే అధికారిక ప్రకటన వచ్చింది. ఈ ప్రాజెక్టులన్నీ చూస్తుంటే, సూర్య మరియు కార్తీ ఇద్దరూ కోలీవుడ్ కంటే టాలీవుడ్ మార్కెట్‌పైనే అధికంగా దృష్టి సారించినట్లు స్పష్టమవుతోంది. వీరి వ్యూహాలు ఫలించి, తెలుగు సినీ పరిశ్రమలో కీలక పాత్ర పోషించడం ఖాయంగా కనిపిస్తోంది.