తిరుమల బ్రహ్మోత్సవాలు: అత్యంత వైభవంగా శ్రీవారి చక్రస్నానం

కలియుగ దైవం శ్రీ వేంకటేశ్వరస్వామి వార్షిక బ్రహ్మోత్సవాలు వైభవోపేతంగా సాగుతున్నాయి. చివరి అంకమైన చక్రస్నాన ఘట్టాన్ని వేదపండితులు మంత్రోశ్చరణ నడుమ కన్నులపండువగా నిర్వహిస్తున్నారు.

తొమ్మిది రోజులుగా వివిధ వాహనాలపై విహరించిన స్వామివారు సేదతీరేందుకు చక్రస్నానం నిర్వహించడం ఆనవాయితీ. వరహస్వామి ఆలయం వద్ద స్వామివారి చక్రత్తాళ్వార్‌కు స్నపన తిరుమంజనాదులు పూర్తిచేసి వేదపండితులు చక్రస్నాన క్రతువును జరిపిస్తున్నారు. స్వామి ప్రతినిధిగా చక్రత్తాళ్వారుకి వరాహ పుష్కరిణిలో స్నానం చేయిస్తారు. అనంతరం స్వామివారిని ఆనంద నిలయానికి తరలిస్తారు.  రాత్రి ఆలయంలో ధ్వజావరోహణం చేయడంతో శ్రీవారి వార్షిక బ్రహ్మోత్సవాలు పరిసమాప్తమవుతాయి. చక్రస్నానం అనంతరం సరోవరంలోని పవిత్రజలాలు అత్యంత మహిమాన్వితం అవుతాయన్నది పురాణ ప్రశస్తి.

సోమవారం రాత్రి శ్రీనివాసుడి అశ్వవాహన సేవ కన్నుల పండువగా జరిగింది. స్వామివారు అశ్వ వాహనంపై తిరుమాడ వీధుల్లో విహరించారు. తిరుమలలో భారీగా వర్షం కురవడంతో ఘటాటోపం నీడన అశ్వవాహన సేవ కొనసాగింది. భగవంతుడి దశావతారాల్లో చివరి అవతారం కల్కి. కలియుగాంతాన కల్కి రూపంలో అశ్వ వాహనంపై స్వామి వారు వస్తారని భక్తుల విశ్వాసం. దుష్ట శిక్షణ, శిష్ణ రక్షణకు స్వామి వస్తారని పురాణాల గాథ. కలి దోషాలకు దూరంగా ఉండమని కల్కి రూపంలో స్వామి ప్రబోధంగా భక్తులు నమ్ముతారు.