రోజుకు ఎన్ని సార్లు అన్నం తినాలి..? ఎక్కువసార్లు తినటం మంచిదేనా..?

మనకు సాంప్రదాయంగా అన్నం ప్రధాన ఆహారంగా ఉంటుంది. దాదాపు ప్రతి భోజనంలోనూ అన్నం ఉంటూనే ఉంటుంది. అయితే రోజుకి ఎక్కువసార్లు అన్నం తినడం వల్ల శరీరానికి ఉపయోగాల కన్నా నష్టాలు ఎక్కువగా ఉంటాయని పోషకాహార నిపుణులు సూచిస్తున్నారు. ముఖ్యంగా మధుమేహం, అధిక బరువు ఉన్నవారు దీనిపై శ్రద్ధ వహించాలి.

అన్నం తినగానే శరీరంలో గ్లూకోజ్ స్థాయిలో వేగంగా పెరుగుదల చోటుచేసుకుంటుంది. ఇది గ్లైసెమిక్ ఇండెక్స్ ఎక్కువగా ఉండటం వలన జరుగుతుంది. అధిక గ్లైసెమిక్ ఇండెక్స్ ఉన్న ఆహారం తరచూ తినడం వల్ల రక్తంలో చక్కెర స్థాయి అనియంత్రితంగా పెరగవచ్చు. ఇది మధుమేహాన్ని ఆహ్వానించడమే కాదు.. ఇప్పటికే ఉన్న వారికి ప్రమాదకరం.

డయాబెటిక్ వ్యక్తులు రోజుకి మూడు సార్లు అన్నం తినడం వంటి అలవాట్లను కొనసాగిస్తే రక్తంలో చక్కెర స్థాయిని అదుపులో ఉంచడం కష్టమవుతుంది. అందువల్ల వారు న్యూట్రీషనిస్ట్ లేదా డాక్టర్లు సూచించిన విధంగా మాత్రమే అన్నాన్ని పరిమిత మోతాదులో తీసుకోవాలి. ఎక్కువ అన్నం తీసుకోవడం వల్ల ఇన్సులిన్ వృథా కావడం, గ్లూకోజ్ నిల్వలు పెరగడం జరుగుతుంది.

అన్నం ఎక్కువగా తినడం వలన శరీరంలో కార్బోహైడ్రేట్లు అధికంగా నిల్వవుతాయి. శరీరం వాటిని శక్తిగా ఉపయోగించకపోతే కొవ్వుగా నిల్వ చేస్తుంది. ఇది పొట్ట చుట్టూ అధిక కొవ్వుగా మారుతుంది. కాలక్రమేణా ఇది స్థూలతకు దారి తీస్తుంది. పొట్ట పెరగడం అనేది ఆరోగ్యపరంగా చాలా సమస్యాత్మకమైన విషయం.

ఆహారంలో అధికంగా అన్నం తీసుకుంటే శరీరానికి కావలసిన శక్తికి మించి క్యాలరీలు చేరతాయి. ఫలితంగా అదనపు బరువు వస్తుంది. అదనపు బరువు వల్ల మెటబాలిజం నెమ్మదిగా మారుతుంది. ఇది హార్మోన్‌ల అసమతుల్యత, గుండె సమస్యలు, థైరాయిడ్ సమస్యలు వంటి అనేక ఆరోగ్య సమస్యలకు మూలకారణం కావచ్చు.

బలవంతంగా అన్నం మానేయాల్సిన అవసరం లేదు. అన్నం కూడా శరీరానికి శక్తిని అందించే ముఖ్యమైన ఆహారం. కానీ ఎక్కువ సార్లు తినకూడదు. ఉదయం లేదా మధ్యాహ్నం పూట మాత్రమే అన్నం తినడం, రాత్రి పూట తక్కువగా తినడం మంచిది. కూరగాయలు, పప్పులు, బాగా వండిన మల్టీగ్రెయిన్ రొట్టెలు వంటి ప్రత్యామ్నాయాలను ప్రయత్నించవచ్చు.

ఆహారపట్ల మార్పులు తీసుకురావాలనుకుంటే ముందుగా వైద్యుల సూచన తీసుకోవాలి. ప్రతి ఒక్కరి శరీర తత్వం, జీవనశైలి, ఆరోగ్య పరిస్థితులు భిన్నంగా ఉంటాయి. అందువల్ల ఒకరి డైట్ మరొకరికి సరిపోదు. ప్రొఫెషనల్ గైడెన్స్ ద్వారా మాత్రమే సరైన మార్గాన్ని ఎంచుకోవాలి.