Ear Health: చెవి ఆరోగ్యానికీ ఉందో డైట్.. డాక్టర్లు చెప్తోన్న 4 సూపర్ ఫుడ్స్ ఇవే!
మన చెవులు నిరంతరం శబ్దాలతో పోరాడుతూనే ఉంటాయి. వినికిడి లోపం అనేది వయసుతో సంబంధం లేకుండా చాలా మందిలో కనిపిస్తుంది. అయితే, కొన్నిసార్లు ఈ సమస్యకు సరైన ఆహారం తీసుకోకపోవడం కూడా ఒక కారణం అవుతుంది. ఈఎన్టీ సర్జన్ డాక్టర్ శ్రీ రావు, చెవి ఆరోగ్యాన్ని కాపాడటానికి సహాయపడే కొన్ని ఆహారాల గురించి వివరించారు. ఈ ఆహారాలను రోజూ తీసుకోవడం వల్ల వినికిడి సమస్యలను నివారించవచ్చని ఆమె చెప్పారు.నిరంతరం శబ్దాలతో ఉండే ప్రస్తుత ప్రపంచంలో చెవుల ఆరోగ్యాన్ని కాపాడుకోవడం చాలా అవసరం.
Updated on: Aug 29, 2025 | 9:59 PM
వినికిడి లోపానికి వంశపారంపర్య, వయసు పెరగడం, శబ్ద కాలుష్యం వంటివి కారణాలు. అయితే, మన అదుపులో ఉండే కొన్ని విషయాలు కూడా ఉన్నాయి. అవే మనం తినే ఆహారం. మనం తీసుకునే ఆహారం చెవుల ఆరోగ్యంపై ప్రత్యక్ష ప్రభావం చూపుతుంది. అందుకే, విటమిన్లు, మినరల్స్, యాంటీఆక్సిడెంట్లు ఉన్న పోషక ఆహారం తీసుకోవడం చాలా ముఖ్యం. ప్రముఖ కాక్లియర్ ఇంప్లాంట్ స్పెషలిస్ట్, ఈఎన్టీ సర్జన్ డాక్టర్ శ్రీ రావు, చెవుల ఆరోగ్యాన్ని కాపాడే నాలుగు ఆహార పదార్థాలను పంచుకున్నారు. ఆరోగ్యకరమైన వినికిడి కోసం ఈ నాలుగు ఆహారాలు ప్రతిరోజు తినాలని డాక్టర్ సూచించారు.
1. ఆకుకూరలు
ఆకుకూరలు కేవలం కళ్ళు, ఎముకలు, గుండెకు మాత్రమే కాదు, చెవులకు కూడా మంచిది. ముఖ్యంగా పాలకూర చెవుల ఆరోగ్యాన్ని మెరుగుపరుస్తుంది. డాక్టర్ రావు ప్రకారం, ఆకుకూరలలో బి12, ఫోలేట్ అధికంగా ఉంటాయి. అవి కణాల ఆరోగ్యానికి చాలా ఉపయోగపడతాయి. శబ్ద కాలుష్యం, వయసుతో వచ్చే వినికిడి లోపాలను ఇవి నివారిస్తాయి.
2. చేపలు, గుడ్లు
ఈఎన్టీ సర్జన్ ప్రకారం, ఆహారంలో చేపలు, గుడ్లు చేర్చుకోవడం చెవులకు ఆరోగ్యం. వీటిలో ఒమేగా ఫ్యాటీ యాసిడ్స్, విటమిన్ బి12 అధికంగా ఉంటాయి. ఈ పోషకాలు యాంటీ-ఇన్ఫ్లమేటరీ గుణాలు కలిగి ఉంటాయి. ఇవి చెవి ఆరోగ్యానికి చాలా ముఖ్యం.
3. పండ్లు, కూరగాయలు
ప్రతిరోజూ పండ్లు, కూరగాయలు తినడం చాలా ముఖ్యం. అవి కేవలం జీర్ణక్రియకు మాత్రమే కాదు, చెవులకు కూడా పోషకాలను అందిస్తాయి. డాక్టర్ రావు కొన్ని పండ్లు, కూరగాయలను సూచించారు. అరటిపండు తినడం వల్ల చెవుల వ్యాధులు రాకుండా ఉంటాయని ఆమె చెప్పారు. నారింజ, చిలగడదుంపలు కూడా ఆమె జాబితాలో ఉన్నాయి. వీటిలో పొటాషియం అధికంగా ఉంటుంది, ఇది లోపలి చెవిలో ద్రవ సమతుల్యతకు సహాయపడుతుంది.
4. గింజలు, విత్తనాలు
ప్రతిరోజు కొన్ని గింజలు, విత్తనాలు తినడం చెవులకు చాలా ఉపయోగకరం. డాక్టర్ గుమ్మడి గింజలు, అవిసె గింజలు, జీడిపప్పు, బాదం వంటివి తినమని సూచించారు. “వీటిలో మెగ్నీషియం, జింక్ పుష్కలంగా ఉంటాయి. వీటిని సూపర్ ఫుడ్స్ అంటారు. ఇవి శబ్దం వల్ల వచ్చే వినికిడి లోపాన్ని నివారించడంలో సహాయపడతాయి” అని ఆమె వివరించారు.
