సుకుమార్ చిత్రంలో సరికొత్త పాత్ర పోషించనున్న విజయ్ దేవరకొండ.. ‘రౌడీ’ బాయ్ ఈసారి ఎలా కనిపించనున్నాడంటే!

‘పెళ్లి చూపులు’ చిత్రంతో ఇండస్ట్రీని తనవైపు తిప్పుకున్న విజయ్ దేవరకొండ.. ‘అర్జున్ రెడ్డి’తో ఒక్కసారిగా సెన్సేషన్ హీరోగా మారాడు. ఈ సినిమాలో విజయ్ తన అద్భుత నటనతో కుర్రకారును ఫిదా చేశాడు. అర్జున్ రెడ్డి ఇచ్చిన విజయంతో విజయ్ క్రేజ్ ఒక్కసారిగా పెరిగిపోయింది. విజయ్ సినిమా వస్తుందంటే ఇండస్ట్రీ మొత్తం అటువైపు చూసే పరిస్థితులు వచ్చాయి. దానికి తగ్గుట్లుగానే సినిమా సినిమాకు వేరియేషన్ చూపిస్తూ దూసుకెళుతున్నాడీ ‘రౌడీ’ హీరో. ప్రస్తుతం పూరిజగన్నాథ్ దర్శకత్వంలో ‘ఫైటర్’ చిత్రంలో నటిస్తోన్న విజయ్.. ఈ సినిమా పూర్తికాగానే సుకుమార్ దర్శకత్వంలో ఓ సినిమాలో నటించనున్నాడు. ఇదిలా ఉంటే ఈ కొత్త చిత్రంలో విజయ్ మునుపెన్నడూ నటించని సరికొత్త పాత్రలో నటించనున్నట్లు తెలుస్తోంది. తాజా సమాచారం ప్రకారం ఈ సినిమాలో విజయ్ సిపాయి పాత్రలో కనిపించనున్నాడని టాక్ వినిపిస్తోంది. ఇక ఈ చిత్రం ఇండియా, పాకిస్థాన్ నేపథ్యంలో తెరకెక్కనుందని సమాచారం. మరి ఈ వార్తలో ఎంత వరకు నిజం ఉందో తెలియాలంటే చిత్ర యూనిట్ అధికారికంగా స్పందించాలి. విజయ్ ప్రస్తుతం పూరిజగన్నాథ్ దర్శకత్వంలో ఓ చిత్రంలో నటిస్తున్నాడు, ఇక సుకుమార్ ప్రస్తుతం బన్నీ హీరోగా నటిస్తున్న ‘పుష్ప’ సినిమాకు దర్శకత్వం వహిస్తున్నాడు. ఈ రెండు చిత్రాలు పూర్తికాగానే వీరి కాంబినేషన్‌లో కొత్త సినిమా ప్రారంభంకానుంది. ఈ లెక్కన సుకుమార్, విజయ్‌ల సినిమా షూటింగ్ ప్రారంభమయ్యేది 2022లోనే అన్నమాట. హీరోలను విభిన్నంగా చూపించే సుకుమార్ విజయ్ దేవరకొండతో ఎలాంటి మ్యాజిక్ చేస్తాడో చూడాలి.