Keerthy Suresh: మెగాస్టార్ అభిమానులకు సారీ చెప్పిన హీరోయిన్ కీర్తి సురేష్! వివాదం ముగిసినట్టేనా?

తెలుగు సినిమా పరిశ్రమలో ఒక చిన్న వ్యాఖ్య మాత్రమే ఎలా పెద్ద వివాదంగా మారిపోతుందో… ఇటీవల కీర్తి సురేష్ ద్వారా మళ్లీ చూశాం. మెగాస్టార్ చిరంజీవి, దళపతి విజయ్ మధ్య డాన్స్‌ను పోలుస్తూ ఆమె చేసిన కామెంట్స్ సోషల్ మీడియాలో భూకంపాన్ని తలపించాయనే చెప్పాలి . చిరంజీవి అభిమానులు ట్రోలింగ్స్ మొదలుపెట్టారు.

వాటిపై కీర్తి సురేష్ తన ‘రివాల్వర్ రీటా’ చిత్ర ప్రమోషన్స్ సందర్భంగా హైదరాబాద్ ప్రెస్ మీట్‌లో స్పందించింది. “చిరంజీవి గారి అభిమానులను బాధపెట్టి ఉంటే నేను క్షమాపణలు చెబుతున్నాను” అంటూ ఆమె స్పష్టత ఇచ్చింది. ఇది కేవలం ఒక క్లారిఫికేషన్ కాదు, సెలబ్రిటీల మధ్య ఫ్యాన్ వార్స్‌ల ప్రస్తుత ట్రెండ్‌ను కూడా రిఫ్లెక్ట్ చేస్తుంది.

గతంలో ‘రఘు తాత’ చిత్ర ప్రమోషన్స్ సందర్భంగా జరిగిన ఒక ఇంటర్వ్యూలో కీర్తి సురేష్‌కు “చిరంజీవి, విజయ్ ఇద్దరిలో ఎవరు బెస్ట్ డ్యాన్సర్?” అని ప్రశ్న వచ్చింది. ఆమె స్పాంటేనియస్‌గా “విజయ్ సర్” అని చెప్పింది. ఆ మాటలు వైరల్ అవ్వగానే మెగా అభిమానులు ఆగ్రహంతో రగిలిపోయారు. “డాన్స్‌కు ఫేమస్ మెగాస్టార్. అటువంటిది ఆమె ఎలా విజయ్‌ పేరు చెబుతుంది?” అంటూ ట్విటర్, ఇన్‌స్టాగ్రామ్‌లో ట్రోలింగ్ మొదలెట్టారు. విజయ్ అభిమానులు కూడా డిఫెండ్ చేస్తూ ఫ్యాన్ వార్ మొదలైంది. ఇది 2024లో మొదలైనా, 2025 నవంబర్ 26న ‘రివాల్వర్ రీటా’ ప్రెస్ మీట్ వరకు కొనసాగింది.

కీర్తి సురేష్ తన స్పందనలో మొదట హాస్యంగా మొదలుపెట్టింది. “నేను చిన్నప్పటి నుంచి విజయ్ సర్‌ను చూస్తూ పెరిగాను. ఆయన డాన్స్ నాకు ఇష్టం, అది నా ఛాయిస్. కానీ చిరంజీవి గారు కూడా లెజెండ్. ఆయనకు ఈ విషయం తెలుసు!” అంటూ చెప్పింది. ఆమె ‘భోళాశంకర్’ సినిమా షూటింగ్ సమయంలో చిరంజీవితో ఈ విషయం గురించి సరదాగా మాట్లాడానని, ఆయన స్పోర్టివ్‌గా స్వీకరించారని వెల్లడించింది. “ఆయనతో పని చేస్తుంటే ‘సర్, విజయ్ డాన్స్ సూపర్’ అని చెప్పేదాన్ని. ఆయన నవ్వేసి ‘అరేయ్, నీ ఇష్టం అన్నారు” అంటూ గుర్తుచేసుకుంది. ఆమె మాటల్లో ఎవరినీ తక్కువ చేయాలని ఉద్దేశం లేదని స్పష్టం చేసింది.

కీర్తి సురేష్ తన కెరీర్‌లో ఎలాంటి వివాదాలకు చోటివ్వలేదు. మలయాళం, తమిళం, తెలుగులో 50కి పైగా చిత్రాల్లో నటించిన ఆమె, ‘మహానటి’తో నేషనల్ అవార్డ్ సాధించిన స్టార్. ఆమె తల్లి మేనకా కూడా చిరంజీవితో పని చేసిన నటి కావడం విశేషం. “చిరంజీవి గారు దేశంలోనే అతి పెద్ద స్టార్లలో ఒకరు. ఎవరూ తక్కువ కాదు, ఇద్దరూ లెజెండ్స్” అంటూ ఆమె రెస్పెక్ట్ చూపింది. ఈ క్షమాపణ తర్వాత అభిమానులు కొంత కూల్ అయినట్టు కనిపిస్తోంది. కొందరు “కీర్తి సారీ చెప్పింది, మంచిదే” అంటూ సపోర్ట్ చేస్తున్నారు.

ఇప్పుడు అన్ని చూపులు ‘రివాల్వర్ రీటా’పైనే. నవంబర్ 28న విడుదలయ్యే ఈ డార్క్ కామెడీలో కీర్తి టైటిల్ రోల్‌లో అలరిస్తుందని ట్రైలర్ ద్వారా తెలుస్తోంది. ఈ వివాదం ఆమె కెరీర్‌కు మైనస్ కాకుండా, ప్లస్ అవుతుందని అంచనా. కీర్తి సురేష్ మాటల్లోనే చెప్పాలంటే… “నా ఇష్టం నా ఛాయిస్, కానీ ఎవరినీ బాధపెట్టాలనే ఉద్దేశం లేదు!” ఇలాంటి ఓపెన్‌నెస్‌తోనే ఆమె మరిన్ని హృదయాలను గెలుచుకుంటుంది.