బాలీవుడ్‌లోకి రవిబాబు.. హారర్ సినిమాతో ఎంట్రీ.. హీరోయిన్‌గా స్టార్ బ్యూటీ
తెలుగు సినిమా దర్శకుడు రవిబాబు గురించి ప్రత్యేకంగా పరిచయం అక్కర్లేదు. నటుడిగా, దర్శకుడిగా ఇండస్ట్రీలో తనదైన ముద్ర వేశారు. ఎన్నో హిట్ చిత్రాలతో ప్రేక్షకులను మెప్పించారు. ఇక ఇప్పుడు బాలీవుడ్ లో సినిమాలు చేయడానికి రెడీ అయ్యారు రవి బాబు .
Updated on: Nov 01, 2026 | 6:37 PM
టాలీవుడ్ నటుడు, నిర్మాత దగ్గుబాటి రానా మరో ఆసక్తికరమైన ప్రాజెక్ట్‌తో ప్రేక్షకుల ముందుకు రాబోతున్నారు. ఈసారి బాలీవుడ్‌లో ఓ హారర్ సినిమాను నిర్మించేందుకు సిద్ధమయ్యారు. బాలీవుడ్ ఫైర్ బ్రాండ్ కంగనా రనౌత్ ప్రధాన పాత్రలో నటించనున్న ఈ చిత్రానికి టాలీవుడ్ దర్శకుడు రవిబాబు దర్శకత్వం వహించనున్నారు. ‘స్కేరీ పిక్చర్’ అనే ఆసక్తికరమైన టైటిల్‌తో ఈ సినిమా తెరకెక్కనుంది. హాలోవీన్ సందర్భంగా న్యూఢిల్లీలో నిర్వహించిన ‘హారర్‌కాన్ ఇండియా 2026’ వేదికగా రానా ఈ ప్రాజెక్ట్‌ను ప్రకటించారు. దగ్గుబాటి రానా నిర్మాతగా మరో కొత్త ప్రయత్నానికి శ్రీకారం చుట్టారు. ఇప్పటివరకు విభిన్నమైన కథాంశాలతో సినిమాలు నిర్మించిన ఆయన.. ఇప్పుడు హారర్ జానర్‌పై దృష్టి పెట్టారు. కంగనా రనౌత్‌ను ప్రధాన పాత్రలో ఎంపిక చేయడం ఈ ప్రాజెక్ట్‌పై ఆసక్తిని పెంచుతోంది. హారర్ నేపథ్యంలో తెరకెక్కనున్న ఈ సినిమా ప్రేక్షకులకు ఎలాంటి అనుభూతిని అందిస్తుందో చూడాలి.
టాలీవుడ్‌లో నటుడిగా, దర్శకుడిగా ప్రత్యేక గుర్తింపు తెచ్చుకున్న రవిబాబు ఇప్పుడు హిందీ చిత్ర పరిశ్రమలోకి అడుగుపెట్టబోతున్నారు. ‘స్కేరీ పిక్చర్’ ఆయన దర్శకత్వంలో తెరకెక్కనున్న తొలి హిందీ ఫీచర్ ఫిల్మ్. తెలుగులో తనకంటూ ఓ ప్రత్యేకమైన మేకింగ్ స్టైల్‌ను ఏర్పరుచుకున్న రవిబాబు.. బాలీవుడ్‌లో ఎలాంటి కథతో ప్రేక్షకులను భయపెట్టబోతున్నారనే ఆసక్తి నెలకొంది. రవిబాబు సినిమాలంటేనే వైవిధ్యమైన కథాంశాలు గుర్తుకొస్తాయి. ముఖ్యంగా హారర్, థ్రిల్లర్ జానర్లలో ఆయన చేసిన ప్రయోగాలు ప్రేక్షకులను ఆకట్టుకున్నాయి. గతంలో ఆయన తెరకెక్కించిన ‘అనసూయ’, ‘అవును’, ‘అవును 2’ చిత్రాలు మంచి గుర్తింపు తెచ్చుకున్నాయి. విభిన్నమైన కథనంతో సినిమాలను రూపొందించడం ఆయన ప్రత్యేకత. ఇప్పుడు అదే తరహా ప్రయోగాన్ని హిందీలోనూ కొనసాగిస్తారా అనేది ఆసక్తికరంగా మారింది.
బాలీవుడ్‌లో తనదైన నటనతో గుర్తింపు తెచ్చుకున్న కంగనా రనౌత్‌కు హారర్ జానర్‌తో గతంలోనూ పరిచయం ఉంది. ఆమె నటించిన ‘రాజ్: ది మిస్టరీ కంటిన్యూస్’ సినిమా మంచి గుర్తింపు తెచ్చుకుంది. అలాగే 2023లో వచ్చిన ‘చంద్రముఖి 2’లోనూ ఆమె కీలక పాత్రలో కనిపించారు. ఇప్పుడు ‘స్కేరీ పిక్చర్’తో మరోసారి హారర్ జానర్‌లో ప్రేక్షకులను అలరించేందుకు సిద్ధమవుతున్నారు. ‘హారర్‌కాన్ ఇండియా 2026’ వేదికపై రానా ఈ సినిమా గురించి మాట్లాడుతూ.. రవిబాబు తెలుగులో ఇప్పటికే పలు హారర్ చిత్రాలను తెరకెక్కించారని, ఈ సినిమా ఆయనకు తొలి హిందీ ఫీచర్ మూవీ అని వెల్లడించారు. ఈ ప్రాజెక్ట్‌ను తొలిసారిగా ఈ వేదికపైనే ప్రకటిస్తున్నట్లు తెలిపారు. దీంతో ఈ కాంబినేషన్‌పై సినీ ప్రేక్షకుల్లో ఆసక్తి పెరిగింది. రానా దగ్గుబాటి చేసిన ప్రకటనకు సంబంధించిన వీడియోను కంగనా రనౌత్ తన సోషల్ మీడియా ఖాతాలో రీపోస్ట్ చేశారు. దీంతో ఈ ప్రాజెక్ట్‌లో ఆమె నటించనున్న విషయం మరింత స్పష్టమైంది. అయితే సినిమా కథ, ఇతర నటీనటులు, షూటింగ్ ప్రారంభం వంటి వివరాలను చిత్రబృందం ఇంకా వెల్లడించలేదు. తెలుగులో తనదైన శైలిలో సినిమాలు తెరకెక్కించే రవిబాబు.. ఇప్పుడు బాలీవుడ్ ప్రేక్షకుల అభిరుచికి అనుగుణంగా ఎలాంటి హారర్ కథను సిద్ధం చేశారనేది ఆసక్తికరంగా మారింది. కంగనా వంటి స్టార్ హీరోయిన్‌తో ఆయన పనిచేయడం ఈ సినిమాకు మరో ప్రత్యేక ఆకర్షణగా నిలవనుంది.
View this post on Instagram
మరిన్ని సినిమా వార్తల కోసం ఇక్కడ క్లిక్ చేయండి
