Dera Baba Case: రంజిత్ సింగ్ హత్య కేసులో డేరా సచ్చా సౌదాకు చెందిన గుర్మీత్ రామ్ రహీమ్ సహా నలుగురికి జీవిత ఖైదు!

Dera Baba Case: రంజిత్ సింగ్ హత్య కేసులో డేరా సచ్చా సౌదా చీఫ్ రామ్ రహీమ్ సహా మరో ఐదుగురు దోషులకు పంచకుల సీబీఐ ప్రత్యేక కోర్టు సోమవారం శిక్ష విధించింది. రామ్ రహీమ్ సహా ఐదుగురు దోషులకు సీబీఐ న్యాయమూర్తి సుశీల్ గార్గ్ జీవిత ఖైదు విధించారు. రామ్ రహీమ్‌కు 31 లక్షల జరిమానా కూడా విధించారు. అదేవిధంగా మిగిలిన నిందితులకు 50 వేల రూపాయల జరిమానా విధించారు. సోమవారం ఈ కేసులో దోషిగా తేలిన రామ్ రహీమ్‌ను వీడియో కాన్ఫరెన్స్ ద్వారా హాజరుపరిచారు. అదే సమయంలో, మిగిలిన 4 మంది దోషులను గట్టి భద్రత మధ్య పంచకుల కోర్టుకు తీసుకువచ్చారు. విచారణ సందర్భంగా, పబ్లిక్ ప్రాసిక్యూటర్ హెచ్‌పిఎస్ వర్మ దోషులకు మరణశిక్ష విధించాలని డిమాండ్ చేశారు. అదే సమయంలో, ఈ కేసులో మరణశిక్ష విధించడం సరైనది కాదని డిఫెన్స్ న్యాయవాది వాదించారు.

ఈ సమయంలో, రామ్ రహీమ్ తాను ఈ దేశ పౌరుడని, తనకు కోర్టుపై పూర్తి నమ్మకం ఉందని చెప్పాడు. ఇంతకుముందు, రామ్ రహీమ్ డేరా ద్వారా నడుస్తున్న సామాజిక పని, అతని అనారోగ్యం గురించి కోర్టులో అప్పీల్ ఇచ్చారు.

కోర్టు వెలుపల పోలీసులు.. 

అక్టోబర్ 12 న పంచకులంలోని సీబీఐ కోర్టు ఇరుపక్షాల వాదనలు విన్న తర్వాత తీర్పును రిజర్వ్ చేసింది. సీబీఐ వాదనలు పూర్తిగా చదవడానికి దోషుల న్యాయవాదులు సమయం కోరిన తర్వాత సీబీఐ న్యాయమూర్తి సుశీల్ గార్గ్ అక్టోబర్ 18 తేదీని ఇచ్చారు. మరోవైపు, సోమవారం రంజిత్ హత్య కేసులో తీర్పు కారణంగా, పంచకుల జిల్లా యంత్రాంగం ఉదయం నుంచే నగరంలో మొత్తం 144 సెక్షన్ విధించింది. పంచకుల వ్యాప్తంగా ఐటీబీపీ(ITBP) సిబ్బందితో పాటు పోలీసులను మోహరించారు. నగరానికి వచ్చే ప్రజలను క్షుణ్ణంగా శోధించిన తర్వాత మాత్రమే ముందుకు సాగడానికి అనుమతించారు.

రంజిత్ సింగ్ హత్య కేసు ఏమిటి?

డేరా సచ్చా సౌదా నిర్వహణ కమిటీ సభ్యుడు, కురుక్షేత్రానికి చెందిన రంజిత్ సింగ్10 జూలై 2002 న కాల్చి చంపబడ్డాడు. సాధ్వి లైంగిక వేధింపుల కేసులో తన సోదరిని అజ్ఞాత లేఖ రాయడానికి రంజిత్ సింగ్ కారణమని డేరా మేనేజ్‌మెంట్ అనుమానించింది. పోలీసుల విచారణపై అసంతృప్తి చెందిన రంజిత్ సింగ్ తండ్రి తన కుమారుడి హత్యపై సీబీఐ దర్యాప్తు కోరుతూ జనవరి 2003 లో పంజాబ్, హర్యానా హైకోర్టులో పిటిషన్ దాఖలు చేశారు. దీనిని హైకోర్టు ఆమోదించింది. ఈ కేసులో డేరాముఖి రామ్ రహీమ్‌తో సహా 5 మందిపై సీబీఐ కేసు నమోదు చేసింది. సీబీఐ ప్రత్యేక కోర్టు 2007 లో నిందితులపై అభియోగాలను రూపొందించింది. వారిని దోషులుగా 8 అక్టోబర్ 2021 న నిర్ధారించింది.

ఆ ముగ్గురి వాంగ్మూలం ఆధారంగా..

రంజిత్ సింగ్ హత్య కేసులో ముగ్గురి వాంగ్మూలం కీలకంగా మారింది. వీరిలో ఇద్దరు ప్రత్యక్ష సాక్షులు సుఖ్‌దేవ్ సింగ్, జోగిందర్ సింగ్ నిందితులు రంజిత్ సింగ్‌పై కాల్పులు జరిపినట్లు తాము చూశామని కోర్టుకు తెలిపారు. మూడో సాక్షి డేరాముఖి డ్రైవర్ ఖట్టా సింగ్. ఖట్టా సింగ్ చెప్పిన దాని ప్రకారం, అతని సమక్షంలోనే రంజిత్ సింగ్‌ను చంపడానికి కుట్ర జరిగింది. తన ముందు రంజిత్ సింగ్‌ను చంపాలని డేరాముఖి రామ్ రహీమ్ కోరినట్లు ఖట్టా సింగ్ తన ప్రకటనలో తెలిపారు. కేసు ప్రారంభ విచారణ సమయంలో, ఖట్టా సింగ్ కోర్టులో ఈ ప్రకటనను ఉపసంహరించుకున్నాడు. కానీ, చాలా సంవత్సరాల తర్వాత అతను మళ్లీ కోర్టుకు హాజరై సాక్ష్యం చెప్పాడు. అతని వాంగ్మూలం ఆధారంగా ఐదుగురిని దోషులుగా నిర్ధారించారు.

డేరా చీఫ్ రామ్ రహీమ్ లైంగిక వేధింపుల కేసులో ఇప్పటికే 20 సంవత్సరాలు శిక్ష..

ఇద్దరు డేరా సాధ్వీల లైంగిక వేధింపుల కేసులో ఆగష్టు 28, 2017 న 20 సంవత్సరాల జైలు శిక్ష విధించింది కోర్టు. పంచకులలోని సీబీఐ కోర్టు డేరాముఖిని దోషిగా నిర్ధారించిన తరువాత, పంజాబ్-హర్యానా మరియు రాజస్థాన్‌తో సహా 5 రాష్ట్రాల్లోని డేరా అనుచరులు హింసకు పాల్పడ్డారు. ఇందులో 31 మంది మరణించారు. 250 మందికి పైగా గాయపడ్డారు. ఢిల్లీలో రెండు ఖాళీ రైలు కోచ్‌లు దగ్ధమయ్యాయి. పంచకులలో డేరాకు చెందిన ఒకటిన్నర లక్షల మంది అనుచరులు 3 గంటల పాటు హింసను కొనసాగించారు. పంచకులతో పాటు, పంజాబ్‌లోని పాటియాలా, ఫజిల్కా, ఫిరోజ్‌పూర్, మాన్సా మరియు బటిండాలో కర్ఫ్యూ విధించాల్సి వచ్చింది.

యుపిలోని లోనీలో కూడా హింస జరిగింది. హింసతో ఆగ్రహించిన పంజాబ్,హర్యానా హైకోర్టు నష్టాన్ని భర్తీ చేయడానికి డేరా ఆస్తిని జప్తు చేయాలని ఆదేశించింది. ఆ కేసులో జడ్జి జగదీప్ సింగ్ డేరాముఖిని దోషిగా నిర్ధారించినప్పుడు, అతను ఏడ్చాడు. అతడిని నేరుగా పంచకుల నుండి రోహ్ తక్ లోని సునారియా జైలుకు హెలికాప్టర్ ద్వారా తీసుకెళ్లారు. అప్పటి నుండి డేరాముఖి రోహ్‌తక్ జైలులో ఉన్నాడు.

ఇవి కూడా చదవండి: TATA Punch: భద్రతా ప్రమాణాలలో టాటా మోటార్స్ కార్లు టాప్.. 5 స్టార్ రేటింగ్ తో వస్తున్న టాటా పంచ్!

Pre Install Apps: మీకు తెలుసా? స్మార్ట్‌ఫోన్‌లలో ప్రీ ఇన్‌స్టాల్ యాప్‌లతో మన డాటా చోరీ అయిపోతోంది!

LPG Cylinder: గ్యాస్ సిలెండర్ లీక్ అవుతోందా? కంగారు వద్దు.. ఇలా చేయండి..