Silver Rates: ఓరి దేవుడో.. ఎన్నడూ లేనంతలా దూసుకెళ్తున్న వెండి.. ఇక పసిడికి గడ్డు కాలమేనా?

ఎన్నాళ్ళ నుంచో పెట్టుబడిదారులకు సురక్షిత ఆస్తిగా భావించే బంగారానికి గడ్డు కాలం రాబోతోందా? వెండి, పసిడి కంటే ఎక్కువ రాబడినిస్తుందా? సిటీ గ్రూప్ విశ్లేషకుల అంచనాల ప్రకారం, 2025లో వెండి ధరలు 13% మేర పెరిగే అవకాశం ఉంది. సరఫరాలో కొరత, పెట్టుబడి డిమాండ్ పెరగడమే దీనికి కారణమని సిటీ బ్యాంక్ నిపుణులు చెబుతున్నారు. అదే సమయంలో బంగారం ధరలు 2026 నాటికి 25% మేర పడిపోయే అవకాశం ఉందని వారు అంచనా వేస్తున్నారు. ఈ మార్పు బంగారం-వెండి నిష్పత్తిలో వస్తున్న మార్పుల వల్ల కూడా మరింత వేగవంతం కానుందని భావిస్తున్నారు.

ప్రపంచ వెండి మార్కెట్ విలువ ప్రస్తుతం 30 బిలియన్ డాలర్లుగా ఉంది. ఈ మార్కెట్‌లో డిమాండ్, సరఫరాను అధిగమించడం ఇది వరుసగా ఐదవ సంవత్సరం కానుంది. ఈ ఏడాది వెండి డిమాండ్ 1.20 బిలియన్ ఔన్సులుగా, సరఫరా 1.05 బిలియన్ ఔన్సులుగా అంచనా వేస్తున్నారు. ప్రస్తుతం ఔన్స్‌కు 38 డాలర్ల వద్ద ట్రేడవుతున్న వెండి ధరలు, గత నెలలో 3%కి పైగా, గత సంవత్సరంలో 24% పెరిగాయి. సిటీ గ్రూప్ స్వల్పకాలంలో వెండి ధరను 40 డాలర్లకు, దీర్ఘకాలంలో ఆరు నుంచి పన్నెండు నెలల్లో 43 డాలర్లకు చేరుతుందని అంచనా వేసింది.

కారణాలివే..

మరోవైపు, బంగారంపై సిటీ గ్రూప్ అంచనాలు ఆశాజనకంగా లేవు. ఈ ఏడాది సెంట్రల్ బ్యాంకుల కొనుగోళ్లు, ఈటీఎఫ్ (ఎక్స్ఛేంజ్-ట్రేడెడ్ ఫండ్) ప్రవాహాల కారణంగా 27% పైగా పెరిగినప్పటికీ, 2026 నాటికి బంగారం ధరలు 25% పడిపోతాయని అంచనా. రాబోయే త్రైమాసికంలో బంగారం ధరలు 3,000 డాలర్లకు పైనే స్థిరీకరించినప్పటికీ, 2026 చివరి నాటికి 2,500–2,700 డాలర్ల శ్రేణికి తగ్గుతాయని సిటీ గ్రూప్ విశ్లేషకులు మాక్స్ లేటన్ తెలిపారు. వెండి కేవలం ఒక లోహంగా కాకుండా, సోలార్ పవర్, ఎలక్ట్రానిక్స్, ఎలక్ట్రిఫికేషన్ వంటి రంగాలలో పారిశ్రామిక వినియోగం పెరుగుతోంది. ఇది ప్రపంచ డిమాండ్‌లో సగానికి పైగా ఉంది.

ఈ “బంగారంతో పోటీపడే వాణిజ్యం కాదు,” అని సిటీ విశ్లేషకులు పేర్కొన్నారు. పునరుత్పాదక ఇంధన వనరుల పట్ల పెరుగుతున్న ఆసక్తి వెండి పారిశ్రామిక డిమాండ్‌ను మరింత పెంచనుంది. ఈ పరిణామాలు పెట్టుబడిదారుల వ్యూహాలను, పోర్ట్‌ఫోలియో కేటాయింపులను గణనీయంగా మార్చనున్నాయి. పసిడి, వెండి విలువ, స్థిరత్వం గురించి దీర్ఘకాలంగా ఉన్న అంచనాలను మార్చివేయనున్న ఈ పరిణామాలను విశ్లేషకులు, పెట్టుబడిదారులు నిశితంగా గమనిస్తున్నారు.