Seshachalam Forest: అద్భుతం.. శేషాచలంలో కలివి కోడి జాడ దొరికిందోచ్..

శేషాచలం. దట్టమైన అటవీ ప్రాంతం. తూర్పు కనుమల్లో అంతర్భాగం. అంతే కాదు విభిన్నమైన జంతు జాతులు, అరుదైన వృక్ష సంపదకు నిలయం. ఇలాంటి ప్రాంతంలో అత్యంత అరుదైన కలివి కోడి జాడ వెలుగులోకి వచ్చింది. శేషాచలం అటవీ ప్రాంతంలో కలివి కోడి (జార్డెన్స్ కోర్సర్) ఆవాసం ఉన్నట్లు తిరుపతిలోని ఇండియన్ ఇన్స్టిట్యూట్ ఆఫ్ సైన్స్ ఎడ్యుకేషన్ రీసెర్చ్ నిర్వహించిన బర్డ్ అట్లాస్-2 వేడుక బయట పెట్టింది. మూడు రోజుల క్రితం ఐఐటి, ఐసర్, తిరుపతి నేచర్ సొసైటీ, తిరుపతి అడ్వెంచర్ ట్రెక్కర్స్ సంయుక్తంగా నిర్వహించిన తిరుపతి బర్డ్ అట్లాస్ వేదికలో దీనిపై చర్చ జరిగింది. ఆంధ్ర బర్డర్స్ మీట్ కలివి కోడి ఆవాసం, లభించిన ఆనవాళ్లను బయట పెట్టింది. ఈ విషయాన్ని ఐసర్ పరిశోధన శాస్త్రవేత్త వీరల్ జోషి బర్డ్ అట్లాస్‌లో స్పష్టం చేశారు.

తాజాగా శేషాచలం అటవీ ప్రాంతంలో కలివి కోడి ఆవాసంపై స్పష్టమైన ఆధారాలు ఉన్నట్లు గుర్తించారు. వేర్వేరుగా మొత్తం 6 ప్రాంతాల్లో ఆధారాలు దొరికాయని, మరో 12 ప్రాంతాల్లో కలివి కోడి తిరిగిన ఆనవాళ్లు గుర్తించామని వివరించారు.  రాత్రి వేళల్లో మాత్రమే కనిపించే కలివి కోడి పొదల్లో దాగి ఉంటుందని చెబుతున్నారు. పైకి ఎగరలేని పక్షి జాతి కలివి కోడిని అరుపులు, పాద ముద్రలు ఆధారంగా గుర్తిస్తారు. అరుదైన పక్షి జాతి కలివి కోడి ఉనికిని కనుగొనే ప్రయత్నంలో శాస్త్రవేత్తల పరిశోధన కొనసాగుతోంది. 2005 లోనే శేషాచలం ప్రాంతంలో కలివి కోడిని ఎన్‌సీఎఫ్‌ సంస్థ పరిశోధన శాస్త్రవేత్త జగన్‌ ఈ పక్షిని తన కెమెరాలో బంధించారు.

కలివి కోడి గురించి ఆసక్తికర విషయాలు. 

ఇది కంజు పిట్టలా కనిపించినా పరిమాణంలో దాని కన్నా పెద్దగా ఉంటుంది. కలివి కోళ్లు గులకరాళ్లను సేకరించి వాటి మధ్యలో గుడ్లు పెడతాయి.మెడలో వెండి గొలుసులు వేసుకున్నట్లుగా రెండు తెల్లటి చారలు ఉంటాయి. ఇవి ముదురు గోధుమ రంగు, పొడవాటి కాళ్లు కలిగి ఉంటాయి. వీటి ఆవాసం ముళ్ల పొదలు. పగటిపూట నిద్ర, రాత్రి ఆహార అన్వేషణ వీటి ప్రత్యేక లక్షణం.  . దీని కూత ‘ట్విక్‌ టూ, ట్విక్‌ టూ’ అన్నట్లుగా ఉండి..  200 మీటర్ల దూరం వరకు వినిపిస్తుందట.

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి