చీరాల తీరంలో చేపల వేటకు వెళ్లిన మత్స్యకారులు.. విచిత్రంగా వలలో ఏం చిక్కిందంటే

బాపట్ల జిల్లా వేటపాలెం మండలం రామాపురంలో అరుదైన చేప మత్స్యకారుల వలకు చిక్కింది. ఈ అరుదైన చేపను చూసి వారు అవాక్కయ్యారు. ఈ చేపను పఫ్ఫర్ ఫిష్ గా పిలుస్తారు. ముళ్లపంది చేప అనేది దీనికి మరో పేరు. ప్రమాదం ఉందని తెలిసిన వెంటనే పరిమాణం పెరగడం, అలాగే బంతిలా మారి శత్రువులకు చిక్కకుండా తప్పించుకోవడం దీని ప్రత్యేకతని మత్స్యకారులు చెబుతున్నారు. నీరు, గాలితో నిండి పోయి చేప ఆకారం కొన్ని సందర్భాల్లో గుండ్రటి బంతిలా మారుతుంది. చేపలు పట్టే వలను సైతం కోరికేస్తుందట. దీంతో వలకు చిక్కిన వెంటనే దీన్ని వల నుంచి తప్పించేస్తారు మత్స్యకారులు.

పోర్కుపైన్ ఫిష్ గా పిలుచుకునే ఈ ముళ్ళపంది చేప బెలూన్ ఫిష్ లాగా కనిపిస్తుంది… కానీ దాని శరీరం బూడిద రంగులో ఉంటుంది, నల్ల మచ్చలతో తెల్లటి బొడ్డుతో ఉంటుంది. దాని శరీరం అంతటా ముళ్ళు ఉంటాయి… ఏదైనా ప్రమాదం వచ్చిందని భావించినప్పుడు తన శరీరాన్ని బంతిలా మార్చేస్తుంది… శరీరంపై ఉన్న ముళ్ళు నిటారుగా నిక్కబొడుచుకుని శత్రువుకు గుచ్చుకునేలా చేస్తుంది… ఎవరూ దీని జోలికి రాకుండా వెళ్ళిపోవాలనే ఉద్దేశ్యంతో ఇలా చేస్తుంది… ఇది దిబ్బలు, గుహలు, అంచుల దగ్గర ఒంటరిగా జీవిస్తుంది. రాత్రి వేళ వేటాడేందుకు ఇష్టపడుతుంది. ఇది 36 అంగుళాల వరకు పెరుగుతుంది, కానీ సాధారణంగా 16 అంగుళాల చేపలే ఎక్కువగా మత్స్యకారుల వలకు చిక్కుతాయి… ఇది టాక్సిన్‌ను స్రవిస్తుంది కాబట్టి, దీన్ని ఆహారంగా తీసుకోరు… అయితే కొందరు అక్వేరియంలలో ఉంచుకుంటారు. పోర్కుపైన్ ఫిష్ ఒక పిరికి జీవి… దీని దగ్గరకు ఎవరైనా వెళితే దూరంగా వెళ్ళిపోతుంది… వీటిలో కొన్ని విషపూరిత చర్మ పదార్థాన్ని స్రవిస్తాయి. కాబట్టి వాటిని సాధారణంగా విషపూరితమైనవిగా పరిగణిస్తారు.