జగన్ ప్రమాణ స్వీకారానికి మెగాస్టార్ ఎందుకు వెళ్లలేదంటే..!

ఏపీ ముఖ్యమంత్రి వైఎస్ జగన్ మోహన్ రెడ్డి దంపుతులను మెగాస్టార్ చిరంజీవి దంపతులు సోమవారం మర్యాదపూర్వకంగా కలిసిన విషయం తెలిసిందే. ఈ సందర్భంగా పలు అంశాలపై వారిద్దరు చర్చించినట్లు తెలుస్తోంది. కాగా ఈ ఏడాది మేలో జరిగిన జగన్ ప్రమాణ స్వీకారానికి రావాల్సిందిగా చిరుకు ఆహ్వానం వెళ్లినట్లు అప్పట్లో వార్తలు వచ్చిన విషయం తెలిసిందే. దీనిపై తాజాగా చిరు స్పందించారు.

సైరా షూటింగ్‌లో బిజీగా ఉన్న కారణంగానే… జగన్ ప్రమాణ స్వీకారోత్సవానికి రాలేకపోయానని చిరంజీవి చెప్పుకొచ్చారు. జగన్ సీఎం కాగానే, ఆయన్ను కలిసి అభినందించాలని అనుకున్నానని చిరంజీవి తెలిపారు. రెండు రాష్ట్రాల్లోనూ సినీ పరిశ్రమ అభివృద్ధి చెందాలని జగన్ ఆకాంక్షించారని ఈ సందర్భంగా తెలిపారు. సినీ పరిశ్రమకు అన్ని రకాలుగా ప్రభుత్వం అండగా ఉంటుందని జగన్ హామీ కూడా ఇచ్చారని చిరు పేర్కొన్నారు. పరిశ్రమకు ఏది కావాలన్న సంకోచించకుండా తనని అడగాలని కూడా జగన్ కోరినట్టు మెగాస్టార్ తెలిపారు. జగన్‌తో భేటీ సొంత కుటుంబీకులతో గడిపిన అనుభూతిని కలిగించిందని చిరంజీవి వెల్లడించారు.