Ukraine War: యుద్ధం ముగిసేలా చూడండి.. G-7 నేతలకు ఉక్రెయిన్ ప్రెసిడెంట్ జెలెన్స్కీ అభ్యర్థన
G-7 on Ukraine: ఉక్రెయిన్కు 29.5 బిలియన్ డాలర్ల సాయాన్ని ప్రకటించాయి G-7 దేశాలు. రష్యా దాడులతో చితికిపోయిన ఈ దేశాన్ని అన్ని విధాలా ఆదుకుంటామని హామీ ఇచ్చాయి..
Updated on: Jun 28, 2022 | 6:52 AM
G-7 on Ukraine: జర్మనీలో సమావేశమైన G-7 (గ్రూప్ ఆఫ్ సెవన్) దేశాలు ఉక్రెయిన్కు అండగా ఉంటామని ప్రకటించాయి. ఉక్రెయిన్ అధ్యక్షుడు జెలెన్ స్కీ వర్చువల్గా ఈ సదస్సులో పాల్గొన్నారు. రష్యా దురాక్రమణకు వ్యతిరేకంగా చేస్తున్న పోరాటానికి సహకరిస్తున్న G-7 దేశాలకు ధన్యవాదాలు తెలిపారు. ఈ ఏడాది చివరికల్లా యుద్ధం అంతమయ్యేలా కృషి చేయాలని ఈ దేశాధినేతలను కోరారు జెలెన్స్కీ.. రష్యాపై మరింత కఠినమైన ఆంక్షలు విధించాలనీ, అదే సమయంలో తమకు ఎయిర్ డిఫెన్స్ సిస్టమ్స్ అందించాలని కోరారు. అనంతంరం ఎన్నిరోజులైనా సరే, ఇంకెంతకాలమైనాసరే ఉక్రెయిన్కు ఆదుకుంటామని G-7 దేశాలు భరోసా ఇచ్చాయి. ఆర్థికంగా, మానవతాపరంగా, మిలటరీ రూపంలో సాయం చేస్తామని ఉమ్మడి ప్రకటన విడుదల చేశాయి. ఉక్రెయిన్కు సాయం అందించడం కోసం ఈ ఏడాది 29.5 బిలియన్ డాలర్ల బడ్జెట్ను G-7 దేశాలు ప్రకటించాయి.
మరోవైపు G-7 దేశాలు రష్యా ఆంక్షలు విధిస్తే, నాటో కూటమి మాత్రం భారీగా సైన్యాన్ని పెంచాలని నిర్ణయించింది. అవసరమై వెంటనే స్పందించేందుకు ఇప్పుడు 40వేల మంది సైనికులు నాటోకు అందుబాటులో ఉన్నారు. ఈ సంఖ్యను ఏకంగా మూడు లక్షలకి పెంచుతున్నట్లు నాసో సెక్రటరీ జనరల్ జెన్స్ స్టోల్టెన్బర్గ్ ప్రకటించారు. నాటో దేశాల భద్రతకు రష్యా పెనుముప్పుగా పరిణమించిందని నాటో చీఫ్ చెప్పారు.
ఇక ఉక్రెయిన్పై దాడులు మొదలుపెట్టిన తర్వాత తొలిసారిగా రష్యా అధ్యక్షుడు పుతిన్- విదేశీ పర్యటనకు వెళుతున్నారు. సెంట్రల్ ఆసియా దేశాలైన తజకిస్తాన్, తుర్క్మెనిస్తాన్లలో పర్యటించబోతున్నారు. ఈ పర్యటనకు ప్రాధాన్యం ఏర్పడింది.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..
