Video: ఘోర విషాదం.. ల్యాండ్ అవుతూ పేలిపోయిన విమానం! వీడియో చూస్తే ఉలిక్కిపడాల్సిందే..
డొమినికన్ రిపబ్లిక్లోని లా రోమనా అంతర్జాతీయ విమానాశ్రయంలో ల్యాండింగ్కు ప్రయత్నిస్తున్న ప్రైవేట్ బిజినెస్ జెట్ అదుపుతప్పి కూలిపోయింది. ప్రమాదంలో పైలట్, కో-పైలట్ సజీవదహనమయ్యారు. విమానం పేలిపోవడంతో భారీ అగ్నిప్రమాదం సంభవించగా, ఘటనపై విమానయాన అధికారులు దర్యాప్తు ప్రారంభించారు. పూర్తి వివరాలు ఇలా ఉన్నాయి..
Updated on: Jun 08, 2026 | 9:20 AM
డొమినికన్ రిపబ్లిక్లో ఘోర విమాన ప్రమాదం చోటుచేసుకుంది. లా రోమనా అంతర్జాతీయ విమానాశ్రయంలో ల్యాండింగ్కు ప్రయత్నిస్తున్న అమెరికాలో నమోదైన ఓ ప్రైవేట్ బిజినెస్ జెట్ అదుపుతప్పి కూలిపోవడంతో ఇద్దరు సిబ్బంది ప్రాణాలు కోల్పోయారు. ఈ ఘటనలో విమానంలోని పైలట్, కో-పైలట్ అక్కడికక్కడే మృతి చెందినట్లు అధికారులు వెల్లడించారు. హిగువే నగర పరిధిలో ఉన్న లా రోమనా విమానాశ్రయంలో ఈ ప్రమాదం చోటుచేసుకుంది. సమాచారం ప్రకారం.. విమానం రన్వేపై సురక్షితంగా దిగేందుకు పైలట్లు ప్రయత్నిస్తున్న సమయంలో సాంకేతిక కారణాల వల్ల లేదా ఇతర పరిస్థితుల కారణంగా నియంత్రణ కోల్పోయింది. దీంతో జెట్ రన్వే నుంచి పక్కకు దూసుకెళ్లి క్షణాల్లోనే భారీ శబ్దంతో పేలిపోయింది.
విమానంలో ఉన్న ఇంధన ట్యాంకులకు మంటలు అంటుకోవడంతో అగ్నిజ్వాలలు ఒక్కసారిగా వ్యాపించాయి. కొద్ది సెకన్ల వ్యవధిలోనే విమానం పూర్తిగా మంటల్లో చిక్కుకుని నిప్పుల ముద్దగా మారింది. ప్రమాద తీవ్రత ఎక్కువగా ఉండటంతో లోపల ఉన్న పైలట్, కో-పైలట్ను రక్షించే అవకాశం లేకుండా పోయింది. ఘటన జరిగిన వెంటనే విమానాశ్రయ అధికారులు హై అలర్ట్ ప్రకటించారు. ఎయిర్పోర్ట్ అగ్నిమాపక సిబ్బంది, అత్యవసర రెస్క్యూ బృందాలు వెంటనే సంఘటన స్థలానికి చేరుకుని మంటలను అదుపులోకి తెచ్చేందుకు ప్రయత్నించాయి. ప్రత్యేక రసాయన ఫోమ్, నీటిని ఉపయోగించి అగ్నిని నియంత్రించినప్పటికీ, అప్పటికే విమానం పూర్తిగా దగ్ధమైంది.
La Romana, Dominican Republic: A private Gulfstream G200 jet crashed and burst into flames while attempting an emergency landing at La Romana International Airport, resulting in the deaths of both pilots on board.According to the Dominican Civil Aviation Institute, the aircraft… pic.twitter.com/lK1O8m4KJL
— NextMinute News (@nextminutenews7) June 8, 2026
ఈ ప్రమాదానికి సంబంధించిన వీడియోలు, దృశ్యాలు సోషల్ మీడియాలో వైరల్గా మారాయి. భారీ మంటలు, దట్టమైన పొగలు ఎగసిపడుతున్న దృశ్యాలు అందరినీ కలచివేస్తున్నాయి. ప్రమాదానికి గల అసలు కారణాలను తెలుసుకునేందుకు డొమినికన్ రిపబ్లిక్ పౌర విమానయాన శాఖ విచారణ ప్రారంభించింది. సాంకేతిక లోపాలు, ల్యాండింగ్ సమయంలో వాతావరణ పరిస్థితులు లేదా ఇతర కారణాలు ప్రమాదానికి దారితీశాయా అనే కోణాల్లో అధికారులు దర్యాప్తు చేపడుతున్నారు.
మరిన్ని అంతర్జాతీయ వార్తల కోసం ఇక్కడ క్లిక్ చేయండి
