Viral news: కొవిడ్‌ వ్యాక్సిన్‌ గురించి ఆలుమగల మధ్య గొడవ.. పిల్లల్ని కిడ్నాప్‌ చేసిందని భార్యపై భర్త ఫిర్యాదు..

ఆలుమగల మధ్య ప్రేమ, ఆప్యాయతలతో పాటు అప్పుడప్పుడూ అలకలు, గొడవలు సహజంగా ఉండేవే. అయితే అనుకోని అతిథిలా మన జీవితాల్లోకి వచ్చిన కరోనా ఓ జంట మధ్య పెద్ద చిచ్చే పెట్టింది. ఎంతలా అంటే ఏకంగా ఓ తల్లి తన పిల్లల్ని తానే కిడ్నాప్‌ చేసేంతలా

Covid Vaccine

Basha Shek |

Updated on: Jan 06, 2022 | 5:01 PM

ఆలుమగల మధ్య ప్రేమ, ఆప్యాయతలతో పాటు అప్పుడప్పుడూ అలకలు, గొడవలు సహజంగా ఉండేవే. అయితే అనుకోని అతిథిలా మన జీవితాల్లోకి వచ్చిన కరోనా ఓ జంట మధ్య పెద్ద చిచ్చే పెట్టింది. ఎంతలా అంటే ఏకంగా ఓ తల్లి తన పిల్లల్ని తానే కిడ్నాప్‌ చేసేంతలా. చాలా ఆశ్చర్యంగానూ, వింతగానూ ఉన్న ఈ సంఘటనకు సంబంధించి అసలు విషయంలోకి వెళితే.. స్పెయిన్‌లోని సెవిల్లె సమీపంలో నివశిస్తున్న ఒక తండ్రి తన కొడుకులని తల్లే స్వయంగా కిడ్నాప్‌ చేసిందంటూ పోలీసులకు ఫిర్యాదు చేశాడు. అయితే ఈ కిడ్నాప్‌నకు కారణమేంటని పోలీసులు అడగ్గా అతను చెప్పిన సమాధానం విని పోలీసులు ఆశ్చర్యపోయారు. పిల్లలకు కోవిడ్‌ వ్యాక్సిన్‌లు వేయించడానికి వీల్లేదంటూ తన భార్య పిల్లలను కిడ్నాప్‌ చేసిందని ఆ భర్త చెప్పడం గమనార్హం.

కాగా తన పిల్లలకు కోవిడ్‌ వేయించాలా వద్ద అనే నిర్ణయం తీసుకునే హక్కు తనకు ఉందని కోర్టు తీర్పు ఇచ్చిన విషయాన్ని కూడా ఈ సందర్భంగా గుర్తు చేశాడు. అయితే కోర్టు తీర్పు ఇచ్చిన కొద్దిరోజుల్లోనే పిల్లలను స్కూల్‌కి పంపిచడం మానిపించేయాలనుకుంటున్నట్లు అతని భార్య నుంచి ఒక లెటర్‌ కూడా వచ్చిందని అతను తెలిపాడు. పైగా తన అనుమతి లేకుండానే పిల్లలను తీసుకువెళ్లిందన్నాడు. నవంబర్‌ 4 నుంచి తన పిల్లలను చూడలేదని ఈ సందర్భంగా అతను వాపోయాడు. కాగా ఫిర్యాదుదారుని భార్య కూడా తన ఇద్దరు పిల్లలను తీసుకుని కోర్టుకు వెళ్లి అధికారులను ఆశ్రయించింది. అయితే కోర్టులో ఆమెపై ఉన్న ఆరోపణల నేపథ్యంలో ఆమెను రిమాండ్‌లో ఉంచాలని ఆదేశించింది. ఈక్రమంలో ఆ పిల్లలిద్దర్నీ తండ్రికి అప్పగించినట్లు స్పెయిన్ గార్డియా సివిల్ పోలీస్ ఫోర్స్ ప్రతినిధి చెప్పుకొచ్చారు. కాగా వీరిద్దరూ గతంలోనే విడాకులు తీసుకున్నారని, ప్రస్తుతం విడిగానే ఉంటున్నారని పోలీసులు చెబుతున్నారు.