సూర్య గ్రహణం

ఖగోళ శాస్త్రంలో గ్రహణాలు ఒక దృగ్విషయంగా పరిగణించబడతాయి. అంతేకాదు హిందువుల నమ్మకం ప్రకారం గ్రహణాన్ని అశుభమైనదిగా భావిస్తారు. కనుక గ్రహణం పట్టే సమయానికంటే ముందు నుంచి గ్రహణం విడిచే సమయం వరకూ సూత కాలం పాటిస్తారు. ఈ సమయంలో ఆలయ తలపులను మూసివేస్తారు. పూజలు, శుభకార్యాలు చేయరు. అంతేకాదు గ్రహణం సమయంలో ఆహారం తినడం, తాగడం వంటి కొన్ని పనులు చేయడం కూడా తప్పుగా భావిస్తారు. హిందూ క్యాలెండర్ ప్రకారం ఈ ఏడాది రెండవ సూర్యగ్రహణం, చివరి గ్రహణం భాద్రప్రద మాసం అమావాస్య సెప్టెంబర్ 21న ఏర్పడనుంది. అంటే సూర్యగ్రహణం పితృపక్షం చివరి రోజున కన్య, ఉత్తర ఫల్గుణి నక్షత్రంలో జరుగుతుంది. ఈ సూర్యగ్రహణం మన దేశంలో కనిపించదు. కనుక సూతక కాలం చెల్లదు.

ఈ సూర్యగ్రహణం సైన్స్ ప్రకారం ఒక ఖగోళ దృగ్విషయం. సూర్యుడు, భూమి మధ్య చంద్రుడు వచ్చినప్పుడు సూర్య గ్రహణం ఏర్పడుతుంది. అయితే ఈ ఏడాది సంభవించనున్న రెండవ సూర్యగ్రహణం న్యూజిలాండ్, ఫిజి, ఆస్ట్రేలియా, అంటార్కిటికా, పసిఫిక్ మహాసముద్రం, అట్లాంటిక్ మహాసముద్రంలో ప్రాంతాల్లో కనిపిస్తుంది. ఈ గ్రహణం మనదేశంలో కనిపించక పోయినా మొత్తం రాశులపై ప్రభావం చూపిస్తుందని జ్యోతిష్కులు చెబుతున్నారు. కనుక మహాలయ అమవాస్య రోజున ఏర్పడే సూర్య గ్రహణ ప్రభావం నుంచి ఉపశమనం కోసం శివారాధన ఫలవంతం అని సూచిస్తున్నారు.