Telangana: అబ్బ.. పార్ట్ టైం జాబ్.. లచ్చలు లచ్చలు వస్తాయ్.. అంటూ సంబరపడ్డాడు.. కట్ చేస్తే..

ఆన్‌లైన్​వేదికగా సైబర్​నేరగాళ్లు రోజురోజుకు రెచ్చిపోతున్నారు.. మనుషుల అమాయకత్వాన్ని ఆసరాగా చేసుకుని.. వారికి ఏదో ఒకటి ఆశచూపి.. బురిడి కొట్టించి లక్షల్లో డబ్బులు కాజేస్తున్నారు.. అచ్చం ఇలాంటి ఘటనే తెలంగాణలోని మెదక్ జిల్లాలో చోటు చేసుకుంది. పార్ట్​ టైం జాబ్​చూపిస్తాం.. ఇంట్లోనే ఉండి లక్షలు లక్షలు సంపాదించుకోవచ్చు అని ఆశపెడితే నమ్మాడు ఓ యువకుడు.. వాట్సాప్‌లో సైబర్​నేరగాళ్లు పంపిన లింక్​ ఓపెన్​ చేశాడు. వారు అడిగినంత ఇస్తూ.. రూ.లక్షల్లో లాభాలు కళ్లజూద్దామనుకున్నాడు. తను మోసపోతున్నా అని తేరుకునేలోపే రూ.6.58లక్షలను సైబర్ నేరగాళ్లు దోచేయడంతో లబోదిబోమంటూ పోలీసులను ఆశ్రయించాడు ఆ యువకుడు..

వివరాల ప్రకారం.. మెదక్​జిల్లా నర్సాపూర్​మున్సిపాలిటీకి చెందిన బానోత్​ఉదయ్ కిరణ్​స్థానికంగా చిన్న వ్యాపారం చేస్తుంటాడు. ఆయనకు జూన్​1వ తేదీన గుర్తుతెలియని నంబరు నుంచి వాట్సాప్‌కు ఒక మెసేజ్​ వచ్చింది. పార్ట్​ టైం జాబ్​ చేయడానికి ఆసక్తి ఉందా ? అనేది దాని సారాంశం..అది నిజమేనని ఉదయ్​ కిరణ్​నమ్మాడు. వారు ఇచ్చిన లింక్​ఓపెన్​చేశాడు. ఒక వెబ్‌సైట్​ కనిపించింది. అందులో బోనస్​పాయింట్స్​అంటూ రూ.10,870 ఇచ్చారు. ఆ తర్వాత రూ.10,000 ఇన్వెస్ట్​ చేయాలన్నారు. సరేనంటూ గూగుల్​పే చేశాడు. దీంతో అతడికి రూ.1,100 ప్రాఫిట్​అంటూ పంపించారు. క్రమంగా ఉదయ్ కిరణ్ కు ఆశ, నమ్మకం కల్పించి దోపిడీకి తెరలేపారు..

ఆ మరుసటి రోజే మరో రూ.10వేలు పంపమన్నారు. వారు చెప్పినట్లే ఉదయ్​ కిరణ్​ చేశాడు. సైబర్​ నేరగాళ్లు అతడి పేరిట ఒక ఖాతా క్రియేట్​చేశారు. అందులో మైనస్‌గా ఉన్న రూ. 23,290 క్లియర్​చేయాలన్నారు. మరోసారి గూగుల్​పే చేశాడు. వెంటనే వాళ్లు అతడికి రూ.10వేలు వెనక్కి పంపారు. అలా పెంచుకుంటూ పోతూనే ఉన్నారు. రూ.30వేలు పంపితే.. రూ.9వేలు ప్రాఫిట్​ఇచ్చారు. అసలు కూడా తిరిగి ఇస్తామన్నారు. దీంతో ఉదయ్​ కిరణ్​ ఆశపడ్డాడు. అలా వారికి డబ్బులు గూగుల్​పే చేస్తూనే ఉన్నాడు. చివరకు రూ.6.58లక్షలు క్లియర్​ చేస్తే, ఇంకా లాభాలు వస్తాయన్నారు. సరేనని అలాగే చేశాడు. కానీ ప్రాఫిట్​ ఇవ్వకపోగా.. చివరగా రూ.10.82లక్షలు క్లియర్​ చేయాలన్నారు.. దీంతో తాను మోసపోయాననే విషయాన్ని ఉదయ్​ కిరణ్​ గ్రహించాడు. వెంటనే 1930కి కాల్​ చేశాడు. ఫిర్యాదు అందించాడు.

తక్షణమే స్పందించిన పోలీసులు రంగంలోకి దిగారు. నేరగాళ్ల ఖాతాల్లోకి బదిలీ కాకుండా ఉన్న రూ.80,642 హోల్డ్​చేశారు. ఈ ఘటనపై పోలీసులు చేసు నమోదు చేసి విచారణ చేపట్టారు. ఊరికే ఎవరైనా లాభాలు వచ్చేలా చేస్తామంటే ఆశపడొద్దని పోలీసులు పదే పదే చెబుతున్నా.. ఇంకా చాలా మంది సైబర్​ నేరగాళ్ల చేతుల్లో మోసపోతూనే ఉన్నారు. ఎవరూ ఉచితంగా డబ్బులు ఇవ్వరనే విషయాన్ని గ్రహిస్తేనే, ఈ నేరాలకు అడ్డుకట్ట పడే అవకాశం ఉందని.. ఇలాంటి విషయాల్లో జాగ్రత్తగా ఉండాలని సూచిస్తున్నారు.

మరిన్ని తెలంగాణ వార్తల కోసం ఇక్కడ క్లిక్ చేయండి..