సెల్యూట్..! వ్యాపారికి హార్ట్ ఎటాక్.. సీపీఆర్ చేసి కాపాడిన హెడ్ కానిస్టేబుల్
నగరంలోని ఓ ప్రైవేట్ ఆస్పత్రిలో చికిత్స పొందుతున్న నగేష్ ఆరోగ్యం నిలకడగా ఉందని వారి కుటుంబ సభ్యుల ద్వారా తెలిసింది. అయితే అత్యవసర సమయంలో సిపిఆర్ చేసి ప్రాణం కాపాడిన కానిస్టేబుల్ రామకృష్ణను పలువురు అభినందిస్తున్నారు.
Updated on: Mar 06, 2023 | 6:04 PM
గుండెపోటుతో కుప్పకూలిన ఓ వ్యాపారిని అక్కడే ఉన్న ఓ కానిస్టేబుల్ సిపిఆర్ చేసి కాపాడారు. ఈ సంఘటన వికారాబాద్ జిల్లా తాండూరులో చోటుచేసుకుంది. తాండూరు పట్టణానికి చెందిన ఓ వ్యాపారి గుండెపోటుకు గురయ్యారు. విషయం తెలుసుకున్న హెడ్ కానిస్టేబుల్ బాధితునికి సీపీఆర్ చేసి ప్రాణం కాపాడే ప్రయత్నం చేశారు. సకాలంలో చేసిన చర్యలకు బాధితుడు ప్రాణాపాయం నుంచి బయటపడ్డాడు. ఇందుకు సంబంధించిన వివరాల్లోకి వెళితే..
తాండూరు పట్టణం తులసీనగర్‌కు చెందిన నగేష్ (36) పట్టణంలో ఉషోదయ షోరూం నిర్వహిస్తున్నారు. ఆదివారం మధ్యాహ్నం ఇంట్లో ఉండగా కుప్పకూలి పడిపోయాడు. ఆందోళన చెందిన భార్య గట్టిగా కేకలు వేసింది. అదే కాలనీలో ఉంటున్న హెడ్ కానిస్టేబుల్ రామకృష్ణ కుమారుడు కేకలు విని తండ్రికి చెప్పాడు.. వెంటనే హెడ్ కానిస్టేబుల్ రామకృష్ణ ఇంట్లోకి వెళ్లి చూడగా నగేష్ అపస్మారక స్థితిలో పడిఉన్నాడు. గుండె కొట్టుకోవడం లేదని గమనించి వెంటనే సీపీఆర్ చేశారు. క్షణాల్లో గుండె కొట్టుకోవడంతో వెంటనే కారులో మళ్లీ సీపీఆర్ చేసుకుంటూ స్థానికంగా ఉన్న ఓ ప్రైవేటు ఆసుపత్రికి తరలించారు.
అనంతరం మెరుగైన వైద్యం కోసం హైదరాబాద్ నగరానికి తీసుకువెళ్లారు. నగరంలోని ఓ ప్రైవేట్ ఆస్పత్రిలో చికిత్స పొందుతున్న నగేష్ ఆరోగ్యం నిలకడగా ఉందని వారి కుటుంబ సభ్యుల ద్వారా తెలిసింది. అయితే అత్యవసర సమయంలో సిపిఆర్ చేసి ప్రాణం కాపాడిన కానిస్టేబుల్ రామకృష్ణను పలువురు అభినందిస్తున్నారు.
మరిన్ని తెలంగాణ న్యూస్ కోసం ఇక్కడ క్లిక్ చేయండి..
