Wearable AC: ఈ ఏసీ మీరెక్కడి వెళితే అక్కడికి వస్తుంది.. ఏం టెక్నాలజీ గురూ

ఎండలు దంచికొడుతున్నాయి. భానుడి ప్రతాపానికి ప్రజలు బయటకు రావాలంటేనే భయపడే పరిస్థితి వచ్చింది. దీంతో ఏసీలు, కూలర్లను ఆశ్రయిస్తున్నారు. అయితే ఎంత ఏసీ, కూలర్‌ అయినా గదిలో ఉంటేనే ఉపయోగపడుతుంది. మరి మనం వెళ్లిన ప్రతీ చోటుకి మనతో పాటు వచ్చే ఏసీ ఉంటే ఎలా ఉంటుంది.? ఊహించుకోవడానికి ఆశ్చర్యంగా ఉంది కదూ! అయితే దీనిని నిజం చేసింది ప్రముఖ ఎలక్ట్రానిక్‌ దిగ్గజం సోనీ.

పోర్టబుల్‌ ఏసీ డివైజ్‌ను తీసుకొచ్చింది. స్మార్ట్‌ గ్యాడ్జెట్స్‌ తయారీలో ఎప్పుడూ ముందుండే సోనీ తాజాగా ఈ కొత్త డివైజ్‌ను మార్కెట్లోకి తీసుకొచ్చింది. పూర్తిగా స్మార్ట్ ఫోన్‌ ఆధారంగా పనిచేసే ఈ గ్యాడ్జెట్‌ ఆటోమెటిక్‌గా టెంపరేచర్‌ను సెట్‌ చేసుకుంటుంది. ఈ డివైజ్‌ను మీ మెడ వెనక భాగంలో పెట్టుకోవాల్సి ఉంటుంది. ఉష్ణోగ్రత, తేమ ఆధారంగా ఈ గ్యాడ్జెట్ దానంతటదే పనిచేస్తుంది. రియాన్‌ పాకెట్ 5 పేరుతో తీసుకొచ్చిన ఈ పోర్టబుల్ ఏసీని మొబైల్‌ యాప్‌ ద్వారా కూడా ఆపరేట్ చేసుకోవచ్చు.

ఇక గ్యాడ్జెట్‌ను పక్కన పెట్టగానే దానంతట ఆదే ఆగిపోతుంది. ఇదిలా ఉంటే ఈ పోర్టబుల్ ఏసీ కేవలం వేసవిలోనే కాకుండా చలికాలంలోనూ ఉపయోగపడుతుంది. చలిలో శరీరాన్ని వెచ్చగా ఉంచేలా వేడి గాలి కూడా వస్తుంది. ఈ డివైజ్‌తో పాటు ఒక పాకెట్‌ వస్తుంది. దాంట్లో గ్యాడ్జెట్‌ను పెట్టుకుంటే సరిపోతుంది. బయటి ఉష్ణోగ్రత ఆధారంగా టెంపరేచర్‌ను అదే సెట్ చేసుకుంటుంది. ఇక ధర విషయానికొస్తే ఈ పోర్టబుల్ ఏసీ మన కరెన్సీలో రూ. 16 వేలుగా ఉంటుంది. ఇక ఈ గ్యాడ్జెట్‌ను ఒక్కసారి ఛార్జింగ్‌ చేస్తే గరిష్టంగా 17 గంటలు పనిచేస్తుంది.

మరిన్ని టెక్నాలజీ వార్తల కోసం క్లిక్ చేయండి..