ఫోన్ స్టోరేజ్ ఫుల్ అవుతుందా? ఒక్క ఫైల్ కూడా డిలీట్ చేయకుండానే స్పేస్ ఖాళీ చేసే 5 మార్గాలు

ఫోన్ మెమరీ ఎప్పుడు నిండిపోతుందో తెలియదు. ఫోటోలు, వీడియోలు, డౌన్‌లోడ్స్, యాప్స్, క్యాష్ ఫైల్స్ ఇలా ఒక్కొక్కటిగా చేరడంతో స్టోరేజ్ వేగంగా ఖాళీ అయిపోతుంది. అయితే కొన్ని సులభమైన సెట్టింగ్స్ మార్చడం ద్వారా అదనపు స్థలాన్ని పొందొచ్చు. ముఖ్యమైన డేటాను కోల్పోకుండా ఫోన్‌లో స్పేస్ ఖాళీ చేసేందుకు ఉపయోగపడే మార్గాలు ఇవే.

ఎక్కువ స్టోరేజ్..

ఏదైనా ఫైల్ డిలీట్ చేసే ముందు మీ ఫోన్‌లో Settings > Storage విభాగానికి వెళ్లండి. అక్కడ ఫోటోలు, వీడియోలు, యాప్స్, డౌన్‌లోడ్స్ వంటి వాటిలో ఏది ఎంత స్టోరేజ్ తీసుకుంటుందో తెలుస్తుంది. దీని ఆధారంగా ఏవి తొలగించాలో నిర్ణయించుకోవచ్చు.

Google Photosలో ఫోటోలు, వీడియోలు ఇప్పటికే బ్యాకప్ అయి ఉంటే Smart Storage ఫీచర్ ఉపయోగపడుతుంది. Settings > Storage > Free Up Spaceకి వెళ్లి, మెనూలో Smart Storage ఆప్షన్‌ను ఆన్ చేయొచ్చు. బ్యాకప్ అయిన పాత ఫోటోలు, వీడియోల స్థానిక కాపీలను తొలగించి స్పేస్ ఖాళీ చేయడంలో ఇది సహాయపడుతుంది.

వాడని యాప్స్‌పై దృష్టి

YouTube, Google TV వంటి యాప్స్‌లో డౌన్‌లోడ్ చేసిన వీడియోలు, పాటలు కూడా చాలా స్థలాన్ని ఆక్రమిస్తాయి. Google TVలో Library > Downloaded Videosకి వెళ్లి అవసరం లేని వాటిని Remove చేయొచ్చు. YouTube Musicలో Libraryలోకి వెళ్లి పాట లేదా ఆల్బమ్ పక్కన ఉన్న More > Remove Download ఎంచుకోవచ్చు. ఎక్కువగా వాడని యాప్స్‌ను అన్‌ఇన్‌స్టాల్ చేయడం మరో సులభమైన మార్గం. అలాగే Settings > Appsలోకి వెళ్లి ఎక్కువ క్యాష్ పేరుకుపోయిన యాప్‌ను ఎంచుకుని Clear Cache చేయొచ్చు. అయితే కొన్ని ఫోన్లలో సెట్టింగ్స్ పేర్లు మారవచ్చు.

యాప్‌ను పూర్తిగా తొలగించకుండా స్పేస్ తగ్గించాలంటే Archive Apps ఫీచర్ ఉపయోగపడుతుంది. Google Play Store > Profile > Settings > Generalలో Automatically Archive Apps ఆప్షన్‌ను ఆన్ చేయవచ్చు. యాప్ పరిమాణం తగ్గినా వ్యక్తిగత డేటా, ఐకాన్ ఫోన్‌లోనే ఉంటాయి. చివరగా Files లేదా Files by Google యాప్‌లో Downloads ఫోల్డర్‌ను పరిశీలించండి. పాత PDFలు, డాక్యుమెంట్లు, ఇమేజెస్ వంటి అవసరం లేని ఫైళ్లను తొలగిస్తే వెంటనే కొంత స్టోరేజ్ ఖాళీ అవుతుంది. ముఖ్యమైన ఫైళ్లను డిలీట్ చేసే ముందు వాటికి బ్యాకప్ ఉందో లేదో మాత్రం తప్పకుండా చూసుకోండి.