Afghan Cricketers : విందు ముందే విషాదం.. ఆఫ్ఘన్ క్రికెటర్ల మరణం వెనుక గుండెలు పిండేసే కథ

Afghan Cricketers : పాకిస్తాన్ సైన్యం జరిపిన వైమానిక దాడుల్లో ఆఫ్ఘనిస్తాన్‌కు చెందిన ముగ్గురు క్రికెటర్లు మరణించారు. పక్టికా ప్రావిన్స్‌లో జరిగిన ఈ దాడి తర్వాత ఆఫ్ఘనిస్తాన్ ప్రజలు తీవ్ర ఆగ్రహం వ్యక్తం చేస్తున్నారు. ఈ దాడికి ముందు ఈ ముగ్గురు ఆటగాళ్లు తమ మిత్రుడి ఇంటిలో విందు చేయడానికి వెళ్తుండగా, మార్గమధ్యంలోనే కరీబ్ ఆగా, హారూన్, సిబ్గతుల్లా ప్రాణాలు కోల్పోయారు. ఈ ఘటనపై సర్వత్రా తీవ్ర నిరసన వ్యక్తమవుతోంది. ఈ దాడిలో మరికొందరు యువ క్రికెటర్లు కూడా ప్రాణాలు కోల్పోయే అవకాశం ఉండేది, కానీ వారు విందులో పాల్గొనకపోవడం వల్ల అదృష్టవశాత్తు బయటపడ్డారు.

ఆఫ్ఘనిస్తాన్‌కు చెందిన ముగ్గురు క్లబ్ క్రికెటర్లు కరీబ్ ఆగా, హారూన్, సిబ్గతుల్లా పక్టికా ప్రావిన్స్‌లో జరిగిన వైమానిక దాడిలో ప్రాణాలు కోల్పోయారు. ఈ ఆటగాళ్లు షరానాలో ఒక ఫ్రెండ్లీ మ్యాచ్ ఆడిన తర్వాత తమ స్నేహితుడి ఇంటిలో రాత్రి భోజనం కోసం వెళ్లారు. అయితే, భోజనం చేయడానికి ముందే వారు మరణించారు. మరికొందరు స్నేహితులు కూడా వారితో కలిసి విందులో పాల్గొనడానికి వెళ్లాల్సి ఉండగా, అలసట కారణంగా వారు అందులో చేరలేకపోయారు.

ఒక ఆన్‌లైన్ చర్చలో ఒక ప్యానలిస్ట్ మాట్లాడుతూ.. “కొందరు ఆటగాళ్ళు చాలా అలసిపోయారు. కాబట్టి వారు విందులో పాల్గొనలేకపోయారు” అని చెప్పారు. ఈ దాడిలో పాకిస్తానీ జెట్‌లు ఉన్నాయా లేదా క్షిపణులు ఉపయోగించారా అన్న విషయం ఇంకా తెలియలేదు. ఒక ఆటగాడు మాట్లాడుతూ.. వారు పగటిపూట ఒక మ్యాచ్ ఆడారని, ఆ తర్వాత ఒక స్నేహితుడి ఇంటికి విందుకు ఆహ్వానించాడని చెప్పాడు. కొందరు ఆటగాళ్ళు తాము చాలా అలసిపోయామని చెప్పి అక్కడే ఉండిపోయారు.. కానీ మరికొందరు వెళ్లారు. విందుకు వెళ్ళిన ఆటగాళ్లలో ఒకరు గాయపడగా, ముగ్గురు క్లబ్ లెవల్ ఆఫ్ఘన్ క్రికెటర్లు దుర్మరణం పాలయ్యారు.

ఆఫ్ఘనిస్తాన్ క్రికెట్ బోర్డు తెలిపిన వివరాల ప్రకారం.. ఈ దాడిలో కరీబ్ ఆగా, హారూన్, సిబ్గతుల్లాతో పాటు ఉర్గున్ జిల్లాకు చెందిన ఐదుగురు వ్యక్తులు ప్రాణాలు కోల్పోయారు, ఏడుగురు ఇతరులు గాయపడ్డారు. ఈ ఆటగాళ్ళు మొదట స్నేహపూర్వక క్రికెట్ మ్యాచ్‌లో పాల్గొనడానికి పక్టికా ప్రావిన్స్ రాజధాని షరానాకు వెళ్లారు. ఉర్గున్‌కు తిరిగి వచ్చిన తర్వాత, ఒక సమావేశంలో వారిని లక్ష్యంగా చేసుకున్నారు. మరణించిన క్రికెటర్ల జ్ఞాపకార్థం టోర్నమెంట్‌లు నిర్వహించే అవకాశం ఉందని సూచించారు. “ప్రస్తుతానికి, మాకు అలాంటి ప్రణాళికలు లేవు, కానీ ఈ ఆటగాళ్ల జ్ఞాపకార్థం వారి పేరు మీద టోర్నమెంట్‌లు నిర్వహిస్తారని ఆశిస్తున్నాము” అని ఆ ఏసీబీ అధికారి చెప్పారు.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..