20 సిక్సర్లు, 14 ఫోర్లు.. ఫాస్టెస్ట్ డబుల్ సెంచరీతో ధోని దోస్త్ బీభత్సం.. 100 బంతుల్లోనే సరికొత్త చరిత్ర
Sameer Rizvi Smashed Fastest Double Century: అండర్-23 స్టేట్ ఏ ట్రోఫీలో ఉత్తరప్రదేశ్ క్రికెటర్ సమీర్ రిజ్వీ చరిత్ర సృష్టించాడు. త్రిపురతో జరిగిన మ్యాచ్‌లో అతను టోర్నీలో అత్యంత వేగవంతమైన డబుల్ సెంచరీని నమోదు చేశాడు. ఈ టోర్నీలో, అతను ఇప్పటివరకు 4 మ్యాచ్‌ల్లో 500 కంటే ఎక్కువ పరుగులు చేశాడు. ఇందులో అతను 3 సార్లు 100 పరుగుల మార్క్‌ను దాటాడు.
Updated on: Dec 22, 2024 | 7:18 AM
Sameer Rizvi Smashed Fastest Double Century: ప్రస్తుతం భారత దేశవాళీ క్రికెట్‌లో అనేక విభిన్న టోర్నీలు జరుగుతున్నాయి. విజయ్ హజారే ట్రోఫీ కూడా ప్రారంభమైంది. అభిమానులకు మొదటి రోజే ఎంతో ఉత్కంఠ మ్యాచ్‌లను చూసే అవకాశం దక్కింది. మరోవైపు అండర్-23 స్టేట్ ఎ ట్రోఫీలో ఉత్తరప్రదేశ్ క్రికెటర్ సమీర్ రిజ్వీ చరిత్ర సృష్టించాడు. ఈ టోర్నీలో ఉత్తరప్రదేశ్ జట్టుకు సమీర్ రిజ్వీ కెప్టెన్‌గా వ్యవహరిస్తున్నాడు. డిసెంబర్ 21న త్రిపురతో జరిగిన మ్యాచ్‌లో రికార్డు బద్దలు కొట్టిన ఇన్నింగ్స్ ఆడాడు. ఈ టోర్నమెంట్‌లో అత్యంత వేగవంతమైన డబుల్ సెంచరీ సాధించిన ఘనతను సాధించాడు.
సమీర్ రిజ్వీ ఫాస్టెస్ట్ డబుల్ సెంచరీ..
త్రిపురతో జరిగిన మ్యాచ్‌లో 21 ఏళ్ల సమీర్ రిజ్వీ 97 బంతుల్లో డబుల్ సెంచరీ సాధించి చరిత్ర సృష్టించాడు. సమీర్ రిజ్వీ 97 బంతుల్లో 201 పరుగులతో అజేయంగా నిలిచాడు. ఈ సమయంలో సమీర్ రిజ్వీ 13 ఫోర్లు, 20 సిక్సర్లు బాదాడు. అతను 207.22 స్ట్రైక్ రేట్‌తో ఈ పరుగులు చేశాడు. ఈ మ్యాచ్‌లో, సమీర్ రిజ్వీ 23వ ఓవర్‌లో బ్యాటింగ్‌కు వచ్చాడు. ఆ తర్వాత అతను తన తుఫాన్ ఇన్నింగ్స్‌తో ఒంటరిగా మ్యాచ్ గతిని మార్చాడు.
సమీర్ రిజ్వీ ఈ తుఫాన్ ఇన్నింగ్స్‌తో ఉత్తరప్రదేశ్ జట్టు నిర్ణీత 50 ఓవర్లలో 405 పరుగుల భారీ స్కోరు చేయగలిగింది. దీంతో త్రిపుర జట్టు 253 పరుగులు మాత్రమే చేయగలిగింది. ఉత్తరప్రదేశ్ 152 పరుగుల తేడాతో విజయం సాధించింది. అండర్-23 స్టేట్ ఎ ట్రోఫీలో సమీర్ రిజ్వీ చాలా బాగా బ్యాటింగ్ చేస్తున్నాడు. ఈ ఇన్నింగ్స్‌లో అతను ఇప్పటికే రెండు సెంచరీలు సాధించాడు. ప్రస్తుతం ఈ టోర్నీలో అత్యధిక పరుగులు చేసిన ఆటగాడిగా ఉన్నాడు.
కేవలం 4 మ్యాచ్‌ల్లో 518 పరుగులు..
అండర్-23 స్టేట్ ఏ ట్రోఫీ ప్రస్తుత సీజన్‌లో సమీర్ రిజ్వీ నాలుగు మ్యాచ్‌ల్లో 518 పరుగులు చేయడం ద్వారా అత్యధిక పరుగుల స్కోరర్‌గా నిలిచాడు. అంతకుముందు, సమీర్ రిజ్వీ కూడా ఒక మ్యాచ్‌లో 153 పరుగులు, మరో మ్యాచ్‌లో 137 నాటౌట్‌తో అద్భుతమైన ఇన్నింగ్స్ ఆడాడు. ఐపీఎల్ చివరి సీజన్‌లో ఈ ఆటగాడు వెలుగులోకి వచ్చాడు. గత సీజన్‌లో చెన్నై సూపర్ కింగ్స్ అతడిని రూ. 8.4 కోట్లకు కొనుగోలు చేసింది. అయితే, ఈసారి అతని వేతనంలో భారీ తగ్గుదల కనిపించింది. ఈసారి ఢిల్లీ జట్టుకు ఆడనున్నాడు. కానీ, ఢిల్లీ క్యాపిటల్స్ అతడిని కేవలం రూ.95 లక్షలకే కొనుగోలు చేసింది.
మరిన్ని క్రీడా వార్తల కోసం ఇక్కడ క్లిక్ చేయండి..
