Ratha Saptami: రథ సప్తమి రోజున తప్పక చేయాల్సినవి.. చేయకూడనవి తెలుసా?

Ratha Saptami: హిందూ సంప్రదాయంలో అత్యంత పవిత్రమైన పండుగలలో రథ సప్తమి ఒకటి. మాఘ మాసంలోని శుక్ల పక్ష సప్తమి తిథినే రథ సప్తమిగా జరుపుకుంటారు. ఈ పర్వదినాన్ని సూర్య జయంతిగా కూడా పిలుస్తారు. ఈ రోజు సూర్యుడు తన ఏడు గుర్రాలతో కూడిన రథంపై ఉత్తరాయణ మార్గంలో ప్రయాణం ప్రారంభిస్తాడని పురాణాలు చెబుతున్నాయి. రథ సప్తమి రోజు నుంచి సూర్యుని కాంతి, ఉష్ణత భూమిపై పెరగడం ప్రారంభమవుతుంది. ఇది ప్రకృతి మార్పుకు, వ్యవసాయ చక్రానికి ఎంతో కీలకం. అందుకే ఈరోజున సూర్య నారాయణుడికి ప్రత్యేక పూజలు, ఉపవాసాలు చేస్తారు. సూర్యుడి ఆరాధనతో ఎన్నో శుభాలు వస్తాయని విశ్వసిస్తారు. సూర్యుడికి సంబంధించిన మంత్రాలు జపిస్తారు. ఆలయాలను సందర్శించి ప్రత్యేక పూజలు నిర్వహిస్తారు.

ఈ రోజున సూర్యుని ఆరాధించడం వల్ల.. ఆరోగ్యం మెరుగవుతుంది. దీర్ఘాయుష్షు లభిస్తుంది. రోగాలు, పాపాలు తొలగిపోతాయి. కుటుంబంలో శుభకార్యాలు కలుగుతాయి. పురాణాల ప్రకారం.. ఈ రోజు సూర్యుడిని భక్తితో పూజించిన వారికి జన్మజన్మల పాపాలు నశిస్తాయని విశ్వాసం.

రథ సప్తమి రోజు చేయవలసినవి ముఖ్యమైన పనులు

ఉదయాన్నే స్నానం చేయడం.. ఈ రోజు బ్రహ్మ ముహూర్తంలో నిద్రలేచి స్నానం చేయడం అత్యంత శుభకరం. స్నానం సమయంలో తలపై లేదా భుజాలపై ఏడు బిల్వ ఆకులు పెట్టుకొని స్నానం చేయడం విశేష ఫలితాన్నిస్తుంది అని నమ్మకం.

సూర్య నమస్కారం, అర్ఘ్యదానం.. సూర్యునికి నీటితో అర్ఘ్యం ఇవ్వాలి. ఈ సమయంలో “ఓం సూర్యాయ నమః”.. అనే మంత్రాన్ని జపించడం ఉత్తమం.

ఆదిత్య హృదయం లేదా సూర్య స్తోత్రం పఠనం.. ఈ రోజు ఆదిత్య హృదయ స్తోత్రం, సూర్యాష్టకం చదవడం వల్ల మానసిక ప్రశాంతత, శారీరక బలం కలుగుతాయని పండితులు చెబుతున్నారు.

దానధర్మాలు చేయడం.. బియ్యం, గోధుమలు, బెల్లం, గోధుమ పిండి, దుస్తులు దానం చేయడం శుభఫలితాన్నిస్తుంది. ముఖ్యంగా నిరుపేదలకు అన్నదానం చేయడం ఎంతో పుణ్యప్రదం.

ఉపవాసం లేదా నియమాలు.. సాధ్యమైనవారు ఉపవాసం చేయవచ్చు లేదా ఫలాహారం తీసుకోవచ్చు. ఇది శరీరం, మనసు శుద్ధికి దోహదం చేస్తుంది.

రథ సప్తమి రోజు చేయకూడని పనులు

ఆలస్యంగా నిద్రలేవకూడదు.. ఈ రోజు సూర్యోదయం తర్వాత నిద్రలేవడం అశుభంగా భావిస్తారు. మాంసాహారం, మద్యం సేవించకూడదు.. పవిత్రమైన ఈ రోజున మాంసాహారం, మద్యం పూర్తిగా వర్జించాలి. కలహాలు, కోపం నివారించాలి.. వాగ్వాదాలు, కోపావేశాలు ఈ రోజు చేయకూడదు. శాంతంగా, సాత్వికంగా ఉండటం మంచిది. దుర్వాక్యాలు మాట్లాడకూడదు.. ఇతరులను బాధించే మాటలు మాట్లాడటం, అసత్యాలు చెప్పడం వంటివి తప్పుకోవాలి. అపవిత్ర ఆలోచనలు దూరంగా ఉంచాలి.. మనసు శుద్ధిగా ఉంచుకోవడం ఈ రోజున ఎంతో ముఖ్యమని ఆధ్యాత్మికులు సూచిస్తున్నారు.

ఆరోగ్య నిపుణుల అభిప్రాయం ప్రకారం, ఉదయపు సూర్యకిరణాలు శరీరానికి ఎంతో మేలు చేస్తాయి. ఈ రోజు సూర్య నమస్కారాలు చేయడం వల్ల విటమిన్ D లభిస్తుంది. రోగ నిరోధక శక్తి పెరుగుతుంది. శారీరక ఉత్సాహం పెరుగుతుంది. రథ సప్తమి కేవలం ఒక పండుగ మాత్రమే కాదు, ప్రకృతి, ఆరోగ్యం, ఆధ్యాత్మికతతో ముడిపడి ఉన్న పవిత్రమైన రోజు. ఈ రోజున శ్రద్ధగా సూర్యుని పూజించడం, సాత్విక జీవన విధానం పాటించడం వల్ల జీవితంలో ఆరోగ్యం, శాంతి, శుభఫలితాలు కలుగుతాయని విశ్వాసం.

(Declaimer: ఈ వార్తలోని సమాచారం మత విశ్వాసాలపై ఆధారపడి ఉంది. పాఠకుల ఆసక్తి మేరకు అందించడం జరిగింది. దీనిని టీవీ9 తెలుగు దీనిని ధృవీకరించదు.)