అచ్చెన్నాయుడుకి షాక్‌.. బెయిల్ పిటిషన్‌ తిరస్కరణ

ఈఎస్‌ఐ కుంభకోణంలో అరెస్ట్‌ అయిన మాజీ మంత్రి, టెక్కలి ఎమ్మెల్యే అచ్చెన్నాయుడుకి మరో షాక్ తగిలింది. బెయిల్‌ కోసం అచ్చెన్నాయుడు సహా నిందితులు దాఖలు చేసుకున్న పిటిషన్లను అవినీతి నిరోధక శాఖ(ఏసీబీ) కోర్టు కొట్టివేసింది. ఈ మేరకు ఏసీబీ కోర్టు ఇన్‌చార్జి న్యాయమూర్తి ఎం. వెంకటరమణ శుక్రవారం ఉత్తర్వులు జారీ చేశారు.

కాగా ఈఎస్ఐ కుంభకోణంలో అచ్చెన్నాయుడుని గత నెల 16న ఏసీబీ అధికారులు అరెస్ట్ చేశారు. ఆయనతో పాటు ఈ కేసులో మొదటి నిందితుడు సి.కె.రమేష్‌కుమార్, జి.విజయ్‌కుమార్, వి.జనార్దన్, ఇవన రమేష్‌బాబు, గోన వెంకట సుబ్బారావు, మరో ఇద్దరు నిందితులు వేర్వేరుగా బెయిలు పిటిషన్లు దాఖలు చేశారు. ఈ క్రమంలో నిందితులకు బెయిల్‌ మంజూరు చేస్తే సాక్ష్యాలను తారుమారు చేసే అవకాశం ఉందని ఏసీబీ అధికారులు కోర్టుకు తెలిపారు. ఈ క్రమంలో నిందితుల బెయిల్‌ పిటిషన్‌ను కోర్టు కొట్టివేసింది. ఇదిలా ఉంటే మరోవైపు రెండు శస్త్ర చికిత్సలు చేయించుకున్న తనకు ఏదైనా కార్పొరేట్‌ ఆసుపత్రిలో చికిత్స చేయించేలా ఆదేశాలివ్వాలంటూ అచ్చెన్నాయుడు హైకోర్టులో పిటిషన్ దాఖలు చేశారు. ఈ పిటిషన్‌పై హైకోర్టులో శుక్రవారం వాదనలు ముగియగా.. ఇవాళ తీర్పు వెలువడనుంది.