Viral News: విచిత్రం.. మగ జన్యువు లేకుండానే పుట్టిన బుల్లి సొరచేప.. నిపుణులు సైతం ఆశ్చర్యపోతున్న వైనం
కొన్ని విషయాలు చెబితే మనకు చాలా వింతగా అనిపిస్తాయి. అసలు ఇలా ఎలా సాధ్యం అన్న అనుమానం కూడా కలుగుతుంది. తాజాగా...
Updated on: Aug 20, 2021 | 7:36 PM
కొన్ని విషయాలు చెబితే మనకు చాలా వింతగా అనిపిస్తాయి. అసలు ఇలా ఎలా సాధ్యం అన్న అనుమానం కూడా కలుగుతుంది. తాజాగా ఇటలీలో అలాంటి వింత కేసు వెలుగులోకి వచ్చింది. ఈ ఘటన గురించి చెబితే నిజంగా మీరు ఆశ్యర్యపోతారు. ఇటలీలోని అక్వేరియో కాలా గోనోన్ అక్వేరియంలో ఓ షార్క్ బిడ్డకు జన్మనిచ్చింది. అయితే ఆశ్చర్యకరమైన విషయం ఏమిటంటే ఈ చేప తండ్రి లేకుండా ఊపిరి పోసుకుంది. ఈ ఘటన అక్కడ ఉన్నవారిని విస్మయానికి గురిచేసింది. ఎందుకంటే ఇలాంటి సంఘటన ఇంతకు ముందు ఎక్కడా వెలుగుచూడలేదు. మగ తోడు లేకుండా షార్క్ శిశువుకు జన్మనివ్వడం ప్రపంచంలోనే ఇదే ఫస్ట్ టైమ్ అని చెబుతున్నారు. అక్వేరియం సిబ్బంది ఈ విషయాన్ని ధృవీకరించారు. గత పది సంవత్సరాలుగా రెండు ఆడ సొరచేపలు అక్వేరియంలో నివసిస్తున్నాయని, ఇప్పుడు ఒక షార్క్ మగ తోడు లేకుండానే బిడ్డకు జన్మనిచ్చిందని చెప్పారు. ఇది ఇప్పుడు హాట్‌టాపిక్‌గా మారింది. అయితే ఈ ఘటనపై సంబంధిత నిపుణులు స్పందించారు. పార్థినోజెనిసిస్ నరుత్పత్తి కారణంగా ఇలా జరిగే అవకాశం ఉందని వెల్లడించారు.
పార్థినోజెనిసిస్ అంటే ఏమిటి
పార్థినోజెనిసిస్ అనేది అలైంగిక పునరుత్పత్తి. దీనిలో అండం… స్పెర్మ్ ద్వారా ఫలదీకరణం చెందకుండానే పిండంగా అభివృద్ధి చెందుతుంది. ఈ బుల్లి సొరచేప.. తన తల్లికి క్లోన్ అని నిపుణులు భావిస్తున్నారు. ఒక అండం పూర్తిగా ఎదగని మరొక అండం ద్వారా ఫలదీకరణం చేసినప్పుడు ఈ రకమైన పునరుత్పత్తి జరుగుతుంది. ఇక్కడ పూర్తిగా ఎదగని అండం ఒక విధంగా స్పెర్మ్ లాగా బిహేవ్ చేస్తుంది. ఈ వింత కేసును చూసి ఆశ్చర్యపోయిన అక్కడి సిబ్బంది ఆ అక్వేరియంలోని రెండు సొరచేపలు DNA నమూనాలను ల్యాబ్‌కు పంపారు. తద్వారా ఈ బుల్లి షార్క్.. ఏ సొరచేపకి చెందినదో తేలిపోనుంది. కాగా ఈ వార్త ఇప్పుడు నెట్టింట ట్రెండింగ్‌గా మారింది.
