ముంబైకి పారిపోతుండగా ఎమ్మెల్యే అరెస్ట్.. కోల్‌కతా ఎయిర్‌పోర్టులో హైడ్రామా!

పశ్చిమ బెంగాల్ రాజకీయాల్లో కలకలం రేగింది. లైంగిక వేధింపులు, అత్యాచారం సహా పలు తీవ్రమైన ఆరోపణలు ఎదుర్కొంటున్న తృణమూల్ కాంగ్రెస్ (TMC) ఎమ్మెల్యే పరేష్‌రామ్ దాస్‌ను పోలీసులు అరెస్ట్ చేశారు. సోమవారం (నవంబర్ 9, 2026) కోల్‌కతా విమానాశ్రయంలో బరుయిపూర్ జిల్లా పోలీసుల స్పెషల్ ఆపరేషన్స్ గ్రూప్ (SOG) అధికారులు ఆయనను అదుపులోకి తీసుకున్నారు. ముంబైకి విమానంలో వెళ్లేందుకు ప్రయత్నిస్తున్న సమయంలో పోలీసులు ఈ అరెస్ట్ చేసినట్లు సమాచారం. కానింగ్ వెస్ట్ నియోజకవర్గానికి ప్రాతినిధ్యం వహిస్తున్న పరేష్‌రామ్ దాస్ అరెస్ట్ పశ్చిమ బెంగాల్ రాజకీయ వర్గాల్లో చర్చనీయాంశంగా మారింది.

అత్యాచారం సహా పలు కేసుల్లో ఆరోపణలు

పోలీసుల వివరాల ప్రకారం, పరేష్‌రామ్ దాస్‌పై అత్యాచారం, దాడి, మోసం, కుట్ర, బెదిరింపులకు సంబంధించిన ఆరోపణలు ఉన్నాయి. కానింగ్ పోలీస్ స్టేషన్‌లో కేసు నంబర్ 561/2026 కింద 2026 సెప్టెంబర్ 5న కేసు నమోదైంది. ఈ కేసులో భారతీయ శిక్షాస్మృతిలోని 376, 323, 420, 120బి, 506 సెక్షన్ల కింద అభియోగాలు నమోదు చేసినట్లు పోలీసులు తెలిపారు.

మూడేళ్ల క్రితమే అత్యాచార ఆరోపణలు

ఎమ్మెల్యేపై గతంలోనూ అత్యాచార ఆరోపణలు వచ్చాయి. సుమారు మూడేళ్ల క్రితం సెప్టెంబర్‌లో ఓ మహిళ కానింగ్ సబ్‌ డివిజనల్ పోలీస్ అధికారికి ఫిర్యాదు చేసింది. తనను ఇంట్లో నిర్బంధించి అత్యాచారానికి పాల్పడ్డారని ఆమె ఆరోపించింది. ఈ ఆరోపణలు అప్పట్లో తీవ్ర రాజకీయ దుమారం రేపాయి. తాజాగా నమోదైన కేసు నేపథ్యంలో పోలీసులు ఆయనను అరెస్ట్ చేశారు.

పంచాయతీ ఎన్నికల హింసలోనూ ఆరోపణలు

2023లో జరిగిన పశ్చిమ బెంగాల్ పంచాయతీ ఎన్నికల సమయంలో హింసను ప్రేరేపించేందుకు కుట్ర పన్నారనే ఆరోపణలు కూడా ఎమ్మెల్యేపై ఉన్నాయి. ఆ సమయంలో కానింగ్ ప్రాంతంలో తీవ్ర ఉద్రిక్తతలు చోటుచేసుకున్నాయి. కాల్పుల ఘటన అనంతరం హత్యాయత్నం కేసు నమోదవగా, ఈ వ్యవహారంపై సీఐడీ దర్యాప్తు చేపట్టింది. అంతేకాకుండా, మట్లా నది ఒడ్డును అక్రమంగా ఆక్రమించుకున్నారనే ఆరోపణలు కూడా ఆయనను చుట్టుముట్టాయి.

అరెస్టుపై కేంద్ర మంత్రి స్పందన

టీఎంసీ ఎమ్మెల్యే అరెస్టుపై కేంద్ర సహాయ మంత్రి శంతను ఠాకూర్ స్పందించారు. కోల్‌కతాలో మీడియాతో మాట్లాడుతూ, ఎమ్మెల్యేపై ఇప్పటికే అనేక కేసులు ఉన్నట్లు తమకు తెలుసన్నారు. పోలీసుల దర్యాప్తు కొనసాగుతున్న కొద్దీ, చట్టప్రకారం విధించే శిక్షను ఆయన ఎదుర్కోవాల్సి ఉంటుందని వ్యాఖ్యానించారు.

వీడియో ఇక్కడ చూడండి..

Kolkata, West Bengal: On the arrest of Democratic TMC MLA Paresh Ram Das, Union Minister of State Shantanu Thakur says, “…As the police investigation progresses, he will definitely receive whatever punishment is due to him…” https://t.co/1uj7rnRB5s

— IANS (@ians_india) November 9, 2026

మొత్తంగా, అత్యాచారం సహా పలు కేసుల్లో ఆరోపణలు ఎదుర్కొంటున్న ఎమ్మెల్యే విమానాశ్రయంలో అరెస్టు కావడం బెంగాల్ రాజకీయాల్లో ప్రాధాన్యత సంతరించుకుంది. ప్రస్తుతం ఈ కేసులో పోలీసుల తదుపరి దర్యాప్తు, న్యాయపరమైన చర్యలపై ఉత్కంఠ నెలకొంది.

మరిన్ని జాతీయ వార్తల కోసం ఇక్కడ క్లిక్ చేయండి..