Bipin Rawat: మరణం రెండుసార్లు దగ్గరగా వచ్చి పారిపోయింది..మూడోసారి మాత్రం.. బిపిన్ రావత్ తప్పించుకున్న పెను ప్రమాదాలివే!

Bipin Rawat: సిడిఎస్ బిపిన్ రావత్, ఆయన భార్య హెలికాప్టర్ దుర్ఘటనలో మనకు దూరమైన విషాదం తెలిసిందే. వారికి అధికార లాంఛనాలతో అంత్యక్రియలు కొద్ది సేపటి క్రితం ముగిశాయి. దేశ వ్యాప్తంగా బిపిన్ రావత్ మరణంపై విషాదం నెలకొంది. ఈ విషాదకర సమయంలో ఆయన గురించి ఎన్నో విశేషాలు తెలుసుకుంటున్న ప్రజానీకం మరింత తల్లడిల్లిపోతోంది. బిపిన్ రావత్ గతంలో రెండుసార్లు మరణాన్ని జయించారు. మనదేశంలో విలువైన వజ్రాన్ని లాక్కుపోవాలని మృత్యువు చేసిన మూడో పోరాటంలో రావత్ లొంగిపోయారు. 28 ఏళ్ల క్రితం పాకిస్తాన్ ముష్కరుల తూటాల నుంచి త్రుటిలో తప్పించుకున్న రావత్.. ఆరేళ్ళ క్రితం జరిగిన చీతా హెలికాప్టర్ ప్రమాదం నుంచి సురక్షితంగా బయటపడ్డారు. ఆ రెండు సంఘటనల గురించి తెలుసుకుందాం..

మొదటి సంఘటన: పాకిస్తానీ బులెట్ తో చీలమండ పగిలింది..

బిపిన్ రావత్ 5/11 గూర్ఖా రైఫిల్స్‌లో మేజర్‌గా 1993లో నియమితులయ్యారు. ఆ సంవత్సరం మే 17వ తేదీ.. ఆయన కాశ్మీర్‌లోని ఉరీ ప్రాంతంలో తన సైనికులతో కలిసి పెట్రోలింగ్ చేస్తున్నారు. అదే సమయంలో పాకిస్థాన్ కాల్పులు ప్రారంభించింది. ఆ కాల్పుల్లో బిపిన్ రావత్ తీవ్రంగా గాయపడ్డారు. ఆయన చీలమండకు బుల్లెట్ తగిలి నుజ్జునుజ్జు అయిపొయింది. ఆయన కుడి చేతికి బుల్లెట్ తగిలింది. తీవ్రంగా రక్తం కారుతుండగా ఆయన అక్కడే కూర్చున్నారు. ఆయనను శ్రీనగర్‌లోని 92 బేస్‌ ఆస్పత్రికి తరలించారు. ఆసుపత్రిలో, వైద్యులు ఆయన చేయి, చీలమండను సరిచేశారు. కానీ బిపిన్ రావత్ మనస్సులో టెన్షన్ అలానే ఉంది. ఎందుకంటే, కాల్పులలో గాయపడిన తర్వాత తనను సీనియర్ కమాండ్ కోర్సులో చేరకుండా నిరోధించవచ్చని రావత్ భయపడ్డారు. కానీ, ఆయన తన పట్టుదల వదల్లేదు. ఊతకర్రల సాయంతో నడవడం ప్రారంభించి నెల రోజుల్లోనే కోలుకున్నారు. దీని తర్వాత ఆయన రెజిమెంటల్ సెంటర్ లక్నోకు తిరిగి పోస్ట్ అయ్యారు. బిపిన్ రావత్ ధైర్యసాహసాలకు గాను ఆర్మీ పతకం లభించింది.

రెండవ సంఘటన: హెలికాప్టర్ క్రాష్, బిపిన్ రావత్ ప్రాణాలతో బయటపడ్డారు.

బిపిన్ రావత్ 2015లో లెఫ్టినెంట్ జనరల్‌గా ఉన్నారు. అతను నాగాలాండ్‌లోని దిమాపూర్‌లో ఉన్న 3 కార్ప్స్ ప్రధాన కార్యాలయానికి ఆయన బాధ్యత వహించారు. 3 ఫిబ్రవరి 2015, ఉదయం 9.30 గంటలకు, బిపిన్ రావత్, ఒక కల్నల్, ఇద్దరు పైలట్‌లతో కలిసి చీతా హెలికాప్టర్‌లో ఎక్కారు. దిమాపూర్ నుంచి బయలుదేరిన తర్వాత హెలికాప్టర్ ఇంజన్ ఫెయిల్ కావడంతో భూమి నుంచి 20 అడుగుల ఎత్తుకు వెళ్లింది. కొన్ని సెకన్లలో అది నేలపై పడిపోయింది. విమానంలో ఉన్న వారందరూ గాయపడ్డారు. త్రుటిలో మరణాన్ని జయించారు. బిపిన్ రావత్ మరోసారి మరణాన్ని ఓడించాడు.

ఆ సమయంలో, ఈ ఆర్మీ హెలికాప్టర్ సాధారణ విమానంలో ఉందని రక్షణ శాఖ పబ్లిక్ రిలేషన్స్ ఆఫీసర్ అమిత్ మహాజన్ చెప్పారు. ఇంజిన్ ఫెయిల్యూర్ వల్లే ఈ ఘటన జరిగిందని, అందులో ఉన్న అధికారులకు స్వల్ప గాయాలయ్యాయని కోహిమాలోని డిఫెన్స్ పీఆర్వో లెఫ్టినెంట్ ఇమ్రాన్ మౌసవి తెలిపారు. ఈ ప్రమాదం జరిగిన కొన్ని గంటల తర్వాత మళ్లీ హెలికాప్టర్‌లో అయన తిరిగి బయలుదేరి తన విధుల్లో పాల్గొన్నారు. ఈ సంఘటనతో బిపిన్ రావత్ చిత్తశుద్ధిని అంచనా వేయవచ్చు.

చివరి సంఘటన: ఈసారి మరణం ఆయన్ను గట్టిగా పట్టుకుంది..

సీడీఎస్ బిపిన్ రావత్ హెలికాప్టర్ లో సూలూరు నుండి వెల్లింగ్టన్‌కు బయలుదేరారు. వైమానిక దళానికి చెందిన ఎంఐ-17 వీ5 హెలికాప్టర్‌లో అతనితో పాటు భార్య మధులియా, 12 మంది ఇతర రక్షణ సిబ్బంది ఉన్నారు. వెల్లింగ్టన్‌లోని డిఫెన్స్ సర్వీసెస్ స్టాఫ్ కాలేజ్‌లో ఉపన్యాసం ఇచ్చేందుకు ఆయన వెళుతున్నారు. ఈ ప్రయాణంలో హెలికాప్టర్ గమ్యస్థానానికి 16 కిలోమీటర్ల దూరంలోనే కూలిపోయింది. ఈసారి మరణం అతన్ని గట్టిగా పట్టుకుంది. మృత్యువు ఆయనను ఓడించింది. అలా భారతదేశం తన మొదటి సీడీఎస్..అదేవిధంగా ఒక ధైర్య సైనిక అధికారిని కోల్పోయింది.

ఇవి కూడా చదవండి: Bipin Rawat: జనరల్ బిపిన్ రావత్‌ పేరుకు ముందు ఉండే ‘PVSM, UYSM’ గురించి మీకు తెలుసా?.. వాటి అర్థం ఏంటో ఇప్పుడు తెలుసుకోండి..!

Judge – Magistrate: న్యాయమూర్తి, మేజిస్ట్రేట్.. లాయర్, అడ్వొకేట్.. తేడాలేంటో తెలుసా? అయితే, ఇప్పుడే తెలుసుకోండి..!