Viral: రోడ్డు పక్కన గుబురుగా పెరిగిన చెట్లను నరుకుతుండగా మట్టి కింద కన్పించిన అద్భుతం..

Kerala:కేరళలో అరుదైన ఘటన చోటుచేసుకుంది. కాసర్‌గోడ్‌(kasaragod) మున్సిపాలిటీకి సమీపంలోని రోడ్డు పక్కన ఉన్న ఓ స్థలంలో చెట్లను నరికివేస్తుండగా పురాతన శివలింగం లభ్యమైంది. కాయూర్ క్లైకోడ్‌లోని వీరభద్ర దేవాలయం సమీపంలోని గుబురుగా పెరిగిన చెట్లను నరికి శుభ్రం చేస్తుండగా శతాబ్దాల నాటి శివలింగం కనిపించింది. శివలింగం దొరికిన మట్టిదిబ్బలో గ్రానైట్ అవశేషాలు కూడా ఉన్నాయి. ఓ వ్యక్తి ఎప్పటినుంచో పట్టించుకోకుండా వదిలేసిన తన స్థలాన్ని తాజాగా శుభ్రపరుస్తుండగా.. మట్టి కింద కప్పి ఉన్న శివలింగం కనిపించిందని స్థానికుడైన గోపాలకృష్ణన్ చెబుతున్నారు. కాగా ఇక్కడ పాతికేళ్ల క్రితం గొప్ప దేవాలయం ఉందనడానికి ఇదే నిదర్శనం కావచ్చని చారిత్రక పరిశోధకులు అంటున్నారు. కన్హంగాడ్ నెహ్రూ ఆర్ట్స్ అండ్ సైన్స్ కళాశాల చరిత్ర అధ్యాపకులు నందకుమార్ కోరోత్, సీపీ రాజీవ్ మాట్లాడుతూ.. దొరికిన శివలింగం 1200 ఏళ్ల నాటిదని తెలిపారు. ఈ శివలింగం 8వ శతాబ్దానికి ముందు నిర్మించిన ఆరాధన రూపాలను పోలి ఉందని తెలిపారు. ఆ కాలపు శివలింగాలు నేటితో పోలిస్తే చిన్నవిగా ఉండేవని వెల్లడించారు. పురావస్తు శాఖ ఇలాంటి శివలింగాలపై పరిశోధన చేయడం ద్వారా ఒక దేశంలోని ఆరాధన విధానంలో గల కాలక్రమాన్ని నిర్ణయించవచ్చని వారు పేర్కొన్నారు. శివలింగం బయల్పడిందన్న వార్త వినగానే భక్తులు పెద్ద సంఖ్యలో అక్కడికి తరలివస్తున్నారు. ఆ ప్రాంతంలో ఓ ఆలయం నిర్మించి పూజలు చేయాలన్నది స్థానికుల అభిలాష. 

మరిన్ని జాతీయ వార్తలు చదవండి