Wake up in early morning: ఉదయాన్నే నిద్రలేవడం వలన ప్రయోజనాలు తెలుసా? ఏ సమయంలో నిద్రలేస్తే ఎంత ప్రయోజనం తెలుసుకోండి!
ఉదయాన్నే లేవడం ఆరోగ్యానికి మేలు చేస్తుందని మనమందరం చిన్నప్పటి నుంచీ వింటున్నాం. ఆయుర్వేద విశ్వాసాల ప్రకారం, ఉదయాన్నే నిద్ర లేచే వారు ఇతర వ్యక్తుల కంటే మరింత శక్తివంతంగా ఉంటారు.
Updated on: Jul 30, 2021 | 9:41 AM
Wake up in early morning: ఉదయాన్నే లేవడం ఆరోగ్యానికి మేలు చేస్తుందని మనమందరం చిన్నప్పటి నుంచీ వింటున్నాం. ఆయుర్వేద విశ్వాసాల ప్రకారం, ఉదయాన్నే నిద్రలేచే వారు ఇతర వ్యక్తుల కంటే మరింత శక్తివంతంగా ఉంటారు. అందుకే సూర్యోదయానికి ముందే ప్రజలందరూ మేల్కొనాలని ఆరోగ్య నిపుణులు భావిస్తున్నారు. మన పూర్వీకులు బ్రహ్మముహూర్త సమయంలోనే నిద్ర లేవాలని సూచించేవారు. పురాణాల్లోనూ ఈ ప్రస్తావన ఉంది. ఆధునిక ప్రపంచంలో ఉదయం లేవడం అనే భావన కష్టతరంగా మారిపోయింది. దీనికి అనేక కారణాలు ఉన్నాయి. జీవనశైలిలో మార్పులు.. ఉద్యోగ, వ్యాపారాల ఒత్తిడి వంటివి. అయితే, అవకాశం ఉన్నవారు కూడా ఉదయాన్నే లేవడానికి బద్దకిస్తుండటం కనిపిస్తుంది. అసలు ఉదయాన్నే నిద్రలేవడం వలన కలిగే ప్రయోజనాలు ఏమిటో తెలిస్తే.. కచ్చితంగా ఇటువంటి వారు తమ జీవన శైలి మార్చుకునే అవకాశం ఉంది. ఉదయం నిద్రలేవడం వలన వచ్చే ప్రయోజనాలు పొందే ఆవకాశం ఉంది.
ఆయుర్వేదంలో..సమతుల్య ఆహారం, యోగా, ధ్యానం మరియు మందుల ప్రయోజనాలతో పాటు, నిద్రించడానికి లేదా మేల్కొలపడానికి సరైన సమయం గురించి అలాగే, దాని ప్రయోజనాల గురించి వివరంగా చెప్పారు. సాంప్రదాయ వైద్యంలో కూడా ఉదయం మేల్కొనే సమయానికి సంబంధించిన ఆయుర్వేద విశ్వాసాలకు మద్దతు ఉంది. ఈ రెండు నమ్మకాలు సూర్యోదయానికి ముందు మేల్కొనడం శరీరానికి సానుకూల శక్తిని ఇస్తుందని స్పష్టం చేస్తున్నాయి. ఎందుకంటే, ఆ సమయంలో వాతావరణం చాలా ప్రశాంతంగా ఉంటుంది. ఉదయాన్నే నిద్ర లేవడం శరీరానికి ఎంత మేలు చేస్తుందో ఇప్పుడు తెలుసుకుందాం..
ఉదయాన్నే లేవడం వల్ల కలిగే ప్రయోజనాలను సైన్స్ అంగీకరించింది
సాంస్కృతిక, ఆయుర్వేద విశ్వాసాలతో పాటు, శాస్త్రవేత్తలు కూడా ఉదయాన్నే లేవడం ప్రయోజనకరంగా భావిస్తారు. నిపుణుల అభిప్రాయం ప్రకారం, యోగా, ధ్యానం, వ్యాయామం వంటి శారీరక కార్యకలాపాలు కూడా ఉదయాన్నే చేయడం ద్వారా ఎక్కువ ప్రయోజనాలను పొందవచ్చు. ఇది మానసిక ఆరోగ్యం, శారీరక సమతుల్యతను మెరుగుపరచడంలో అలాగే, జ్ఞాపకశక్తి సమస్యలు, ఏకాగ్రతను మెరుగుపరచడంలో కూడా ప్రయోజనకరంగా ఉంటుంది. ఉదయాన్నే నిద్రలేవడం తెలివితేటలు వేగంగా అభివృద్ధి చెందడానికి కూడా దారితీస్తుంది.
ఆయుర్వేదం ప్రకారం..
ఉదయాన్నే లేవడం వల్ల కలిగే ప్రయోజనాలను ఆయుర్వేదంలో వివరంగా వివరించారు. ఆయుర్వేదం ప్రకారం..మానవ శరీరంలో మూడు ప్రధాన అంశాలు ఉన్నాయి. అవి వాత (గాలి -ఈథర్), పిత్త (అగ్ని -నీరు) , కఫ (భూమి-నీరు). ఈ మూలకాల మొత్తం కాలంతో మారుతుంది. వాత కండరాలు, శ్వాస, మెరిసే, కణజాలం మరియు కణ కదలికలతో సంబంధం కలిగి ఉంటుంది. జీర్ణక్రియ, విసర్జన, జీవక్రియ , శరీర ఉష్ణోగ్రత ప్రక్రియలతో పిత్త సంబంధం కలిగి ఉంటుంది. కఫ శరీర నిర్మాణానికి సంబంధించినది, అంటే ఎముకలు, కండరాలు. ఈ మూడింటిలో ఎలాంటి సమస్య అయినా శరీరంలో అనేక రకాల వ్యాధులకు కారణం కావచ్చు. ఆయుర్వేదం ప్రకారం, ఉదయాన్నే మేల్కొనే వ్యక్తులలో ఈ మూడింటి సమతుల్యత మెరుగ్గా ఉంటుంది.
ఉదయం మేల్కొలపడానికి సరైన సమయం ఏమిటి?
ఆయుర్వేద నిపుణుల అభిప్రాయం ప్రకారం, బ్రహ్మముహూర్త సమయంలో లేవడం అత్యంత ప్రయోజనకరంగా చెబుతారు. ఆ తర్వాత ప్రజలందరూ ధ్యానం, యోగా, వ్యాయామం వంటి శారీరక కార్యకలాపాలకు సమయం కేటాయించాలి. ఉదయం సమయం ప్రశాంతంగా, స్వచ్ఛమైన గాలితో నిండి ఉంటుంది. ఇది ఆరోగ్యానికి చాలా ప్రయోజనకరంగా ఉంటుంది. శరీరంలోని మూడు ప్రధాన అంశాలైన వాత, పిత్త లేదా కఫతో ఎలాంటి సమస్య ఉన్నా వాటిని వదిలించుకోవచ్చు.
ఏ సమయంలో మేల్కొంటే ఏ ప్రయోజనాలు..
ఆయుర్వేద నిపుణుల అభిప్రాయం ప్రకారం, ఉదయాన్నే నిద్రలేచే సమయాన్ని కూడా శరీర లోపాల నివారణకు చాలా ప్రయోజనకరంగా పరిగణించవచ్చు. సూర్యోదయానికి 30 నిమిషాల ముందు మేల్కోవడం వాతకు చాలా సరైన కాలం. అలాగే సూర్యోదయానికంటే పిత్త దోషాల నివారణకు 45 నిమిషాల ముందు, కఫా దోషాల నివారణకు 90 నిమిషాల ముందుగానే నిద్రలేవడం మంచిదని ఆయుర్వేదం చెబుతోంది. అలాగే ఆ సమయంలో యోగా, వ్యాయామం వంటివి చేయడం వలన ఆరోగ్యానికి అనేక ఇతర ప్రయోజనాలు కూడా ఉంటాయి.
గమనిక: ఇక్కడ ఇచ్చిన అంశాలు ఆయుర్వేద నిపుణులు వెలిబుచ్చిన అభిప్రాయలు మాత్రమే. వీటి విషయంలో వ్యక్తిగతంగా ఎవరికీ వారు వైద్యుల సలహాతో తగిన నిర్ణయం తీసుకోవాల్సి ఉంటుంది.
