Herbs for Sleep: నిద్రలేమి సమస్యకు ఇక చెక్! ఈ మూలికలతో ప్రశాంతమైన నిద్ర ఖాయం..
మరి ఈ నిద్రలేమి సమస్యను బయటపడాలంటే ఏం చేయాలి? దీనికి ఆయుర్వేద నిపుణులు చెబుతున్న సమాధానం ఏంటంటే జీవనశైలి మార్పు. అలాగే కొన్ని మూలికలను రోజూ వారి వాడటం ద్వారా సమస్యను అధిగమించవచ్చని సూచిస్తున్నారు.
Updated on: Feb 11, 2023 | 5:41 PM
ఇటీవల కాలంలో మనిషిని వేధిస్తున్న అతి పెద్ద సమస్య నిద్రలేమి. ఉరుకుల పరుగుల జీవితం.. శారీరక శ్రమ లేని ఉద్యోగాలు.. విపరీతమైన మానసిక ఒత్తిళ్ల కారణంగా మనిషికి నిద్రలోపిస్తోంది. ఫలితంగా అనేక రోగాలు చుట్టుముడుతున్నాయి. ఆరోగ్యవంతమైన జీవనం విధానంలో ఒక మనిషికి కనీసం ఆరు నుంచి ఎనిమిది గంటల ప్రశాంత నిద్ర ఉండాలని నిపుణులు చెబుతున్నారు. చాలా మందికి ఇది ఉండటం లేదు. ఫలితంగా నిస్సత్తువ ఆవహిస్తోంది. చురుకుదనం లోపిస్తోంది. చివరికి ప్రాణాంతకం కూడా కావచ్చని నిపుణులు హెచ్చరిస్తున్నారు. మరి ఈ నిద్రలేమి సమస్యను బయటపడాలంటే ఏం చేయాలి? దీనికి ఆయుర్వేద నిపుణులు చెబుతున్న సమాధానం ఏంటంటే జీవనశైలి మార్పు. అలాగే కొన్ని మూలికలను రోజూ వారి వాడటం ద్వారా సమస్యను అధిగమించవచ్చని సూచిస్తున్నారు. ఈ మూలికలు ఉత్తేజితమైన నరాలు, ఇంద్రియాలను శాంతింపజేసి, ప్రశాంతమైన నిద్రకు ఉపకరిస్తాయని చెబుతున్నారు. ఆ మూలికలు ఏంటో ఇప్పుడు చూద్దాం..
మూలికే ఏలిక..
ఒత్తిడి వల్ల న్యూరోట్రాన్స్మిటర్ సెరోటోనిన్ హార్మోన్ ప్రభావితం అవుతుంది. ఇది నిద్రలేమికి కారణం అవుతుంది. ఇలాంటి సందర్భాల్లో కొన్ని సహజ మూలికలు తీసుకోవడం వలన సెరటోనిన్ హార్మోన్ల సమతుల్యతను కాపాడుతుంది. ఈ రకంగా ప్రశాంతమైన భావన కలిగి మంచి నిద్రను పొందవచ్చు. ఆ మూలికలు ఇవే..
లావెండర్: లావెండర్లోని యాంటీ-డిప్రెసివ్, సెడేటివ్, శాంతపరిచే గుణాలు మీకు మంచి నిద్ర కలగడానికి సహాయపడతాయి. ఇది మీ నరాలను సడలించి, ఆందోళన స్థాయిలను తగ్గించగలుతాయి. అలాగే మానసిక రుగ్మతలను స్థిరీకరించగలదని అధ్యయనాలు చూపిస్తున్నాయి. ఒత్తిడిని అదుపు చేస్తుంది. పడకగదిలో లావెండర్ సువాసనలు వెదజల్లడం చేయడం ద్వారా హాయిగా నిద్రపోవచ్చు.
చమోమిల్: గడ్డి చామంతి పువ్వు అనేది దాని మంచి విశ్రాంతికి ప్రసిద్ధి చెందిన పురాతన ఔషధ మూలిక. ఇది ఆందోళనను తగ్గిస్తుంది. మీ నరాలకు ఉపశమనం ఇస్తుంది. నిద్రలేమిని తగ్గిస్తుంది. ఒక అధ్యయనం ప్రకారం, ప్రసవించిన బాలింతలలో హార్మోన్ల హెచ్చుతగ్గుల కారణంగా మూడ్ స్వింగ్స్ అధికంగా ఉంటాయి. నిద్రలేమితో ఇబ్బంది పడతారు. అలాంటి వారికి రెండు వారాల పాటు రాత్రి చామొమిల్ టీ తాగించడం ద్వారా వారు సరిగ్గా నిద్రపోవడంతో పాటు, వారిలో డిప్రెషన్ స్థాయిలు తగ్గుతాయి. చమోమిల్ టీ లేదా గడ్డిచామంతి పువ్వులతో తయారు చేసే టీలో నరాలను సడలించే ఫ్లేవనాయిడ్లు ఉంటాయి. అందువల్ల ఇది ఒక ప్రసిద్ధ ట్రాంక్విలైజింగ్ డ్రింక్గా మారింది. ఈ పువ్వు వాసనను పీల్చడం ద్వారా కూడా మీరు దాని ప్రభావాన్ని అనుభవించవచ్చు.
ప్యాషన్ ఫ్లవర్: జుముకి పువ్వు లేదా ప్యాషన్ఫ్లవర్లో నరాలను సడలించే ఫ్లేవనాయిడ్లు ఉంటాయి. ఇవి ఒత్తిడిని తగ్గించి, బాగా నిద్రపోవడానికి మీకు సహాయపడతాయి. ఈ ఉష్ణమండల పుష్పం మంచి రుచిని కలిగి ఉంటుంది. సాధారణంగా దీనిని ఒక ఔషధ మూలికగా పరిగణిస్తారు. ఓవర్-ది-కౌంటర్ మత్తుమందుల తయారీలో ఉపయోగిస్తారు.
అశ్వగంధ: అశ్వగంధ అనేది నిద్రలేమిని ఎదుర్కోవడానికి సాధారణంగా ఉపయోగించే ఆయుర్వేద ఔషధ మూలిక. ఇది పడుకున్న వెంటనే నిద్రపోవడానికి, విశ్రాంతి నాణ్యతను మెరుగుపరచడంలో ప్రభావవంతంగా ఉంటుందని అధ్యయనాలు చూపించాయి. అశ్వగంధలోని ఇవి ఆకులలో నిద్రను ప్రోత్సహించే సమ్మేళనాలు ఎక్కువగా కనిపిస్తాయి. ఇవి ఒత్తిడి లేదా ఆందోళన భావాలను తొలగించడానికి, ప్రశాంతతను, సులభంగా నిద్రపోవడాన్ని ప్రేరేపిస్తాయి. అశ్వగంధ అంతిమంగా మత్తుమందులా పనిచేస్తుంది. కాబట్టి ఫార్మసీలో లభించే స్లీపింగ్ టాబ్లెట్లకు ఇది సహజ ప్రత్యామ్నాయం. అయితే వైద్యుల సలహా మేరకే దీనిని తీసుకోవడం ఉత్తమం.
వలేరియన్: వలేరియన్ హెర్బ్ వేర్లను తరచుగా నిద్రలేమి, విశ్రాంతి లేకపోవడం, ఆందోళనకు చికిత్స చేయడానికి ఆయుర్వేద వైద్యంలో ఉపయోగిస్తారు. వలేరియన్ వేరులోని వాలెరినిక్ యాసిడ్.. న్యూరోట్రాన్స్మిటర్ విచ్ఛిన్నతను నిరోధిస్తుంది. ఇది మెరుగైన నాణ్యమైన నిద్రను ప్రేరేపిస్తుంది. వలేరియన్ యాంటి యాంగ్జైటీ ఔషధాల సూత్రాలపై పనిచేస్తుంది. ఇది గాఢ నిద్రను ప్రోత్సహిస్తుంది. వలేరియన్ అనేక ఫార్మసీ దుకాణాలలో లభిస్తుంది, సాధారణంగా మాత్రల రూపంలో వస్తుంది.
ఎలా తీసుకోవాలంటే.. ఈ మూలికలను టీ రూపంలో తాగవచ్చు. మీ వైద్యులు సూచించిన మోతాదు మేరకు మూలికలను ఉపయోగించాలి. సాధారణంగా ఒక కప్పు వేడినీటికి 1 స్పూన్ మూలికలను జోడించడం ద్వారా హెర్బల్ టీని తయారు చేస్తారు. దీన్ని 20 నిమిషాలు అలాగే ఉంచి, ఆపై వడకట్టి తాగాలి. ఒక రోజులో రెండు నుండి మూడు కప్పుల హెర్బల్ టీని తాగవచ్చు.
నూనెలు ఇలా.. నిద్రపోయేటప్పుడు మీ గోరువెచ్చని నీటి స్నానానికి హెర్బ్-ఫ్లేవర్ ఉన్న ఎసెన్షియల్ ఆయిల్లను జోడించవచ్చు. ఇది ప్రశాంతమైన అనుభూతిని ఇస్తుంది. నిద్రను ప్రేరేపిస్తుంది. మీ శరీరంలోని కొన్ని భాగాలైన మీ నుదిటి, మెడ, ఛాతి, మణికట్టు, చేతులు లేదా పాదాలపై ఆలివ్, ద్రాక్ష గింజలు లేదా కొబ్బరి నూనెతో కలిపిన మూలికలతో కలిపి మసాజ్ చేయవచ్చు.
మరిన్ని లైఫ్ స్టైల్ వార్తల కోసం..
