Health: దంతాలు ఊడిపోతున్నాయా.? మీకు ఆ సమస్య తప్పదు..

పళ్లు ఊడిపోవడం సర్వసాధారణమైన విషయం. అయితే చిన్న వయసులో పళ్లు ఊడిపోయి మళ్లీ వస్తాయి.అలాకాకుండా వయసు పెరుగుతున్నా కొద్దీ దంతాలు ఊడిపోతుంటే మాత్రం అలర్ట్‌ అవ్వాలని నిపుణులు చెబుతున్నారు. దంతాలు క్రమంగా ఊడిపోతున్న వారిలో అల్జీమర్స్‌ వచ్చే ప్రమాదం ఎక్కువగా ఉంటుందని నిపుణులు చెబుతున్నారు. ఈ విషయాన్ని పరిశోధన నిర్వహించి మరీ తెలిపారు.

దంతాలు ఊడిపోయే వారిలో అల్జీమర్స్‌ వచ్చే ప్రమాదం ఎక్కువగా ఉంటుందని నిపుణులు అంటున్నారు. దంతాలు ఊడిపోవడానికి, మెదడుకు మధ్య ఉన్న సంబంధం ఏంటన్న దానిపై నిర్వహించిన అధ్యయనంలో ఈ విషయాలు వెల్లడయ్యాయి. దంతాల నష్టం అల్జీమర్స్‌కు దారి తీస్తుందని అంటున్నారు. చిగుళ్ల వ్యాధితో దంతాలు కోల్పోయిన సమయంలో వాటిలోని బ్యాక్టీరియా అల్జీమర్స్​ బారిన పడిన మెదడు ప్రాంతాలపై దాడి చేస్తుందని చెబుతున్నారు.

దంతాలు ఊడిపోవడానికి కారణాలలో పీరియాంటల్ వ్యాధి ఒకటి. క్రమంగా మృదు కణజాలాన్ని నాశనం చేసి, కాలక్రమేణా దంతాలు కోల్పోయేలా ప్రేరేపిస్తుంది. ధూమపానం, మద్యపానం వంటి అలవాట్ల కారణంగా ఈ సమస్య వస్తుందని చెబుతున్నారు. ప్రో ఇన్​ఫ్లమేటరీ ఏజెంట్లు ప్లాస్మాలో పెరిగినా కూడా మెదడుపై ప్రతికూల ప్రభావం చూపిస్తాయని నిపుణులు అంటున్నారు. ఈ కారణంగానే దంతాల సంరక్షణ విషయంలో జాగ్రత్తగా ఉండాలని నిపుణులు చెబుతున్నారు.

దంతాల ఆరోగ్యాన్ని సంరక్షించుకోవడానికి పలు జాగ్రత్తలు తీసుకోవాలని నిపుణులు సూచిస్తున్నారు. ముఖ్యంగా తప్పకుండా రోజుకి రెండుసార్లు బ్రష్ చేసుకోవడం, హెల్తీ ఫుడ్ తీసుకోవడం దంతాల ఆరోగ్యాన్ని కాపాడడంలో కీలక పాత్ర పోషిస్తాయని అంటున్నారు. వీటితో పాటు నిత్యం దంతాలను చెకప్‌ చేసుకోవాలని చెబుతున్నారు. కనీసం 6 నెలలకు ఒకసారైనా వైద్యులను సంప్రదించి, సంబంధిత పరీక్షలు చేయించుకోవాలని సూచిస్తున్నారు.

నోట్‌: పైన తెలిపిన విషయాలు కేవలం ప్రాథమిక సమాచారం మేరకు మాత్రమే. ఆరోగ్యానికి సంబంధించి వైద్యుల సూచనలు పాటించడమే ఉత్తమం.

మరిన్ని లైఫ్‌ స్టైల్‌ వార్తల కోసం క్లిక్‌ చేయండి..