పట్టు చీర కొనే ఆలోచనలో ఉన్నారా..? అయితే ఈ విషయాలు తప్పక తెలుసుకోండి..!

ఒక పట్టు చీర నాణ్యత అది నేసిన పట్టు నూలుపై ఆధారపడి ఉంటుంది. అసలైన బెనారస్ చీరలు మల్బెర్రీ సిల్క్ అనే స్వచ్ఛమైన పట్టు నూలుతో చేస్తారు. ఈ నూలు మృదువుగా, మెరిసేలా ఉంటుంది. దీనికి ప్రత్యేక మెరుపు కనిపిస్తుంది. నిజమైన పట్టును గుర్తించడానికి సిల్క్ మార్క్ అనే అధికారిక గుర్తింపు చూసుకోవడం మంచిది.

బెనారస్ చీరల ప్రత్యేకత వాటిలోని చక్కటి జరీ డిజైన్. ఇది సాధారణంగా బంగారం లేదా వెండి పూతలు వేసిన దారంపై నేసి ఉంటుంది. నిజమైన జరీ ఉన్న చీరలలో వెండి మీద బంగారు పూత ఉంటుంది. కొన్నిసార్లు రాగి దారంపై పూత వేస్తారు. అయితే తక్కువ ధరల్లో దొరికే చీరలలో నకిలీ జరీ వాడతారు. చీరను వెనుకకు తిప్పి చూడండి. ముందు భాగంలో ఉన్న డిజైన్ అలాగే వెనుకవైపు కనిపిస్తే అది చేతితో నేసిన హ్యాండ్‌ లూమ్ చీర అవుతుంది.

బెనారస్ చీరలు చాలా ప్రత్యేకమైన చేతితో నేసే పద్ధతితో తయారు చేస్తారు. మెషీన్ పనిలా కాకుండా చేతి పని వల్ల కొద్దిగా తేడా కనిపిస్తుంది. ఇది అసలైనదని చెబుతుంది. ఈ చీరలలో జాలా లేదా జాక్వర్డ్ అనే ప్రత్యేక పద్ధతిని ఉపయోగించి ముఖ్య భాగాల్లో అంచులపై అందమైన డిజైన్లు నేసి ఉంటాయి.

స్వచ్ఛమైన పట్టు మెరిసే జరీ వాడటం వల్ల ఈ చీరలు ఇతర పట్టు చీరల కంటే కొంచెం బరువుగా కనిపిస్తాయి. మీ చేతిలో చీరను పట్టుకుని చూసినప్పుడు బరువుగా అనిపిస్తే అది నాణ్యమైన పట్టు చీరే. తక్కువ నాణ్యత ఉన్న చీరలు మృదువుగా, వదులుగా ఉంటాయి. బాగా నేసిన చీరలు నాణ్యతలో మంచి విలువ కలిగి ఉంటాయి.

ఒక మంచి పట్టు చీరను తయారు చేయడానికి సమయం, నైపుణ్యం ఖరీదైన పదార్థాలు అవసరం. అందుకే అసలైన పట్టు చీరలకు ధర కూడా ఎక్కువగా ఉంటుంది. చాలా తక్కువ ధరకు దొరికే చీరలు సాధారణంగా కలిపిన పట్టు లేదా కృత్రిమ నూలుతో తయారై ఉంటాయి. మీరు ఎంచుకునే చీరకు సిల్క్ మార్క్ సర్టిఫికేట్ ఉండేలా చూసుకోవాలి.

చాలా నమ్మకమైన షాపుల నుండి మాత్రమే కొనడం ఉత్తమం. నకిలీ చీరల నుంచి దూరంగా ఉండటానికి ఇది మంచి మార్గం. ఈ సూచనలు గుర్తుంచుకుంటే.. మీరు అసలైన, నాణ్యమైన, అందమైన పట్టు చీరను సులభంగా ఎంచుకోగలరు.