పైసా ఖర్చు లేకుండా బట్టల మీద మరకలని ఇలా సింపుల్ గా పోగొట్టండి..!

మనం ప్రతి రోజు టీ, కాఫీ తాగేటప్పుడు, పండ్లు, కూరగాయలు కట్ చేసేటప్పుడు కొన్ని మరకలు దుస్తులపై పడటం సహజమే. కొన్నిసార్లు ఈ మరకలు చాలా గట్టిగా ఉండి సాధారణ సబ్బుతో ఉతికినా తొలగిపోవు. అలాంటి సమయంలో కాస్త జాగ్రత్తగా సరైన పద్ధతి పాటించాలి. ఎందుకంటే ఎక్కువ ధరలతో కొన్న దుస్తులు ఉంటాయి. అవి దెబ్బతిన్నప్పుడు మనకు ఎంతో బాధ కలుగుతుంది.

మీ దుస్తులపై కూరగాయల రంగుతో ఏర్పడిన మరకలు కనిపించిన వెంటనే శుభ్రం చేయడం చాలా ముఖ్యం. అలాంటి మరకలపై కొద్దిగా తెల్ల వెనిగర్ వేసి, బేకింగ్ సోడాతో చిన్న పేస్ట్ తయారు చేసుకోండి. ఆ పేస్ట్‌ ను మరక ఉన్న భాగానికి అప్లై చేసి దాదాపు 10 నుంచి 15 నిమిషాలు ఉంచండి. అనంతరం మెల్లగా రుద్దుతూ నీటితో కడగాలి. ఇలా చేయడం ద్వారా రంగు మరకలు సులభంగా తొలగిపోతాయి. అలాగే నిమ్మరసం కూడా మరకల తొలగింపులో సహాయపడుతుంది.

మీ దుస్తులపై ఇంక్ లేదా పెన్సిల్ మరకలు పడినప్పుడు ఆందోళన చెందకండి. బేకింగ్ సోడాను కొద్దిగా చల్లని నీటితో కలిపి పేస్ట్ చేయండి. ఆ పేస్ట్‌ తో మరకలపై కాస్త జాగ్రత్తగా తుడవండి. మరకలు చుట్టూ మరింత వ్యాప్తి చెందకుండా చూడండి. ఈ విధంగా చేస్తే మరకలు మెల్లగా తగ్గిపోతాయి.. దుస్తులు మునుపటిలా క్లీన్ గా ఉంటాయి.

టీ లేదా కాఫీ మరకలు పడిన వెంటనే వాటిని తొలగించడానికి ప్రయత్నించడం మంచిది. అందుకు నిమ్మరసం, తెల్ల వెనిగర్ మిశ్రమం తయారు చేసి మరకపై అప్లై చేయవచ్చు. కానీ ఈ మిశ్రమం కొన్ని దుస్తులకు బలంగా ఉండొచ్చు కాబట్టి ముందుగా చిన్న భాగంలో పరీక్షించాలి. ఇంకో పద్ధతి ఏంటంటే మరక పైన కొద్దిగా షాంపూ వేసి టూత్ బ్రష్‌ తో మెల్లగా రుద్దితే కూడా మరకలు తొలగిపోతాయి.

ఈ సులభమైన ఇంటి చిట్కాలు పాటించడం ద్వారా మీరు మీ ఇష్టమైన దుస్తులు మరింత కాలం శుభ్రంగా, కొత్తగా ఉంచుకోవచ్చు. ఎక్కువ ఖర్చు పెట్టకుండా సహజ వస్తువులతో ఈ చిట్కాలు పాటించి చూడండి.

(NOTE: పై చిట్కాలను ఉపయోగించే ముందు దుస్తులపై చిన్న భాగంలో పరీక్షించుకుని.. దాని ప్రభావాన్ని చూసిన తర్వాత మాత్రమే పూర్తిగా అప్లై చేయండి. ప్రత్యేకించి ఖరీదైన లేదా డెలికేట్ ఫ్యాబ్రిక్‌ ల విషయంలో లాండ్రీ సేవల సలహా తీసుకోవడం మంచిది)