Badam Halwa: బాదం తినడానికి పిల్లలు మారం చేస్తున్నారా… బాదం హల్వాని చేసి పెట్టండి.. బాదం తినడానికి అలవాటు పడతారు..
బాదం కా హల్వా అనేది ఒకరకమైన స్వీట్. ఇది రుచికరంగా ఉండటంతో పాటు ఆరోగ్యకరమైనది కూడా. బాదంతో నిండిన ఈ హల్వా శరీరానికి శక్తిని ఇస్తుంది. మనస్సును తాజాగా ఉంచుతుంది. పండుగలు లేదా ఏదైనా ప్రత్యేక సందర్భాలలో మాత్రమే కాదు ఎప్పుడైనా పిల్లలు బాదం తినడానికి మారం చేస్తుంటే కూడా చేసుకోవచ్చు. బాదాం హల్వా తయారీ విధానం చాలా సులభం. ఈ రోజు రుచికరమైన బాదం హల్వా తయారీ రెసిపీని తెలుసుకుందాం.
Updated on: Jul 21, 2025 | 7:56 PM
బాదం హల్వా అనేది బాదం, నెయ్యి, చక్కెర మరియు ఏలకులతో తయారు చేయబడిన ఒక రుచికరమైన సాంప్రదాయ దక్షిణ భారతీయ స్వీట్. ఈ స్వీట్ ని వివాహాలు, శుభాకార్యాలు, పండుగలు, ప్రత్యేక సందర్భాలలో తయారు చేస్తారు. అంతేకాదు బాదం ఆరోగ్యానికి ఎంతో మేలు చేస్తుంది. అయితే బాదం తినడానికి కొంతమంది పిల్లలు ఇష్టపడరు. వారికి బాదంలను తినడానికి అలవాటు చేయాలంటే ముందుగా బాదం హల్వా తినిపించి చూడండి. అప్పుడు వారికి బాదం గింజల మీద ప్రేమ పెరుగుతుంది. ఈ రోజు బాదం హల్వా తయారీ విధానం తెలుసుకుందాం..
కావాల్సిన పదార్ధాలు:
- బాదం – 1 కప్పు (సుమారు 150-200 గ్రాములు)
- పాలు – 1 కప్పు
- దేశీ నెయ్యి – ½ కప్పు
- చక్కెర – ¾ కప్పు
- కుంకుమపువ్వు రేకులు – 8-10 (2 టేబుల్ స్పూన్లు వెచ్చని పాలలో నానబెట్టండి)
- యాలకుల పొడి – ½ స్పూన్
- అలంకరించు కోవడానికి – సన్నగా తరిగిన బాదం, పిస్తాపప్పులు, గులాబీ రేకులు
తయారీ విధానం: ముందుగా బాదంపప్పులను ఒక గిన్నెలో తీసుకుని.. వాటిని గోరువెచ్చని నీటిలో కనీసం 30 నిమిషాల నుంచి 1 గంట పాటు నానబెట్టండి. కావాలనుకుంటే రాత్రంతా కూడా నానబెట్టవచ్చు.
బాదం బాగా ఉబ్బినప్పుడు.. వాటి నుంచి తేలికగా తొక్కలను తొలగించండి. ఇప్పుడు తొక్క తీసిన బాదంను మిక్సర్ గ్రైండర్లో వేయండి.
తరువాత కొద్ది కొద్దిగా పాలు పోసి ముతకగా లేదా మెత్తగా పేస్ట్ చేయండి. పేస్ట్ చిక్కగా ఉండేలా చూసుకోవాలి. ఇది తప్పనిసరిగా గుర్తుంచుకోండి.
ఇప్పుడు మందపాటి అడుగున ఉన్న వోక్ లేదా నాన్-స్టిక్ పాన్ తీసుకొని అందులో దేశీ నెయ్యి వేసి వేడి చేయండి. నెయ్యి వేడి అయిన తర్వాత, బాదం పేస్ట్ వేసి తక్కువ మంట మీద నిరంతరం కలుపుతూ వేయించండి.
పేస్ట్ లేత బంగారు రంగులోకి మారే వరకు అంటే బాదం పేస్ట్ నుంచి మంచి వాసన వచ్చే వరకు వేయించండి. దీనికి దాదాపు 8-10 నిమిషాలు పట్టవచ్చు. బాదం పేస్ట్ గిన్నె అడుగున అంటుకోకుండా చూసుకోండి.
బాదం పేస్ట్ బాగా వేయించిన తర్వాత మిగిలిన పాలు, చక్కెర వేసి బాగా కలపండి. ముద్దలు ఏర్పడకుండా నిరంతరం కలుపుతూ ఉండండి.
ఈ సమయంలో కుంకుమపువ్వు పాలు కలపండి. ఇది హల్వాకు అందమైన రంగు, అద్భుతమైన వాసనను ఇస్తుంది.
హల్వా చిక్కబడే వరకు.. నెయ్యి బాదం మిశ్రమం నుంచి విడిపోయి పక్కల నుంచి బయటకు వచ్చే వరకు తక్కువ మంట మీద ఉడికించాలి. ఈ సమయంలో నిరంతరం కదుపుతూ ఉండడం చాలా ముఖ్యం.
హల్వా పాన్ అడుగు భాగాన్ని వదిలి ముద్దగా అవ్వడం ప్రారంభించినప్పుడు.. బాదం హల్వా సిద్ధంగా ఉందని అర్థం చేసుకోవాలి.
ఇప్పుడు గ్యాస్ స్టవ్ ని ఆపి .. బాదం హల్వా లో యాలకుల పొడి వేసి బాగా కలపండి.
వేడి బాదం హల్వాను సర్వింగ్ బౌల్లోకి వేసుకుని .. పైన సన్నగా తరిగిన బాదం లేదా పిస్తాపప్పులు, గులాబీ రేకులను వేసి అలంకరించి సర్వ్ చేయండి. అంతే టేస్టీ టేస్టీ బాదం హల్వాని పిల్లలు పెద్దలు కూడా ఇష్టంగా తింటారు.
మరిన్ని లైఫ్ స్టైల్ న్యూస్ కోసం క్లిక్ చేయండి..
