ఎండాకాలం టిఫిన్ బదులు ఇది తిని చూడండి.. దెబ్బకు బాడీ కూల్‌గా మారాల్సిందే..

Probiotic Curd Rice: వేసవిలో ఉదయాన్నే టిఫిన్ బదులు చద్దన్నం తినడం వల్ల శరీరం చలువ చేస్తుందని, ఆరోగ్యానికి ఎంతో మంచిదని నిపుణులు సూచిస్తున్నారు. ఈ సాంప్రదాయ పులియబెట్టిన పెరుగు అన్నం కేవలం రుచికరంగా ఉండటమే కాకుండా, అనేక ఆరోగ్య ప్రయోజనాలను అందిస్తుంది. ముఖ్యంగా, ఎండలు ఎక్కువైనప్పుడు తరచుగా టిఫిన్ తినాలనిపించదు. అటువంటి సమయంలో చద్దన్నం నోటికి కమ్మగా, పొట్టకు హాయిగా అనిపించి, శరీర వేడిని తగ్గించడంలో సహాయపడుతుంది.

చద్దన్నం తయారు చేసుకోవడం చాలా సులభం. దీనికి రాత్రి మిగిలిన అన్నాన్ని ఉపయోగించవచ్చు. ఒకవేళ అన్నం మిగలకపోతే, కొద్దిగా ఎక్కువ వండుకుంటే సరిపోతుంది. చద్దన్నం తోడు పెట్టడానికి మట్టిపాత్రను ఉపయోగించడం ఉత్తమం. మట్టిపాత్రలు ఆరోగ్యానికి మంచివి, అవి చలువ చేస్తాయి.. ఆహారాన్ని చల్లగా ఉంచుతాయి. ఫ్రిజ్‌లో పెట్టినంత చల్లగా ఉండకపోయినా, ఆహారాన్ని చాలా కాలం పాటు తాజాగా ఉంచుతాయి. మట్టిపాత్రలు అందుబాటులో లేకపోతే స్టీల్ పాత్రలను కూడా ఉపయోగించవచ్చు.

చద్దన్నం తయారీ విధానం ఇలా:

ముందుగా అన్నాన్ని ఒక పాత్రలో వేసి మెత్తగా కలుపుకోవాలి. పాలు పోశాక కలపడం కష్టం కాబట్టి, ముందే బాగా కలుపుకోవడం ముఖ్యం. తరువాత, ఒక పెద్ద గ్లాసు వేడి పాలు పోయాలి. చల్లారిన అన్నం అయితే వేడి పాలు పోయాలి. అన్నం వేడిగా ఉంటే మామూలు పాలు పోసుకోవచ్చు. దీనికి కొద్దిగా (పావు గ్లాసు వరకు) నీళ్లు కలిపి, చివరగా కొద్దిగా పెరుగు (తోడు చుక్క) వేసి బాగా కలపాలి. పెరుగు ఎలా తోడు పెడతామో అదే విధంగా చేయాలి. అయితే తోడు చుక్క మరీ ఎక్కువ వేసుకోకూడదు. ఇలా బాగా కలిపిన తర్వాత, మూత పెట్టి రాత్రంతా అలాగే ఉంచాలి. ఉదయం నాటికి పెరుగు తోడుకున్నట్లు చద్దన్నం సిద్ధంగా ఉంటుంది. మట్టిపాత్రలో తోడు పెట్టడం వల్ల పులుపు రాకుండా చాలా కమ్మగా ఉంటుంది.

మట్టిపాత్రల వాడకం చద్దన్నం, అంబలి వంటి ఆహారాలకు చాలా మంచిది. ఎందుకంటే మట్టిపాత్రలకు కనిపించని సూక్ష్మమైన రంధ్రాలు ఉంటాయి. ఈ రంధ్రాల వల్ల ఆక్సిజనేషన్ ప్రక్రియ బాగా జరుగుతుంది, ఇది మంచి బ్యాక్టీరియా వృద్ధి చెందడానికి సహాయపడుతుంది. ఈ మంచి బ్యాక్టీరియా చద్దన్నాన్ని ప్రోబయోటిక్ ఆహారంగా మారుస్తుంది. జీర్ణవ్యవస్థ ఆరోగ్యానికి తోడ్పడుతుంది. కొంతమంది దీనిని “తోడన్నం” అని కూడా పిలుస్తారు. గంజి వేసుకునేవారు దబ్బాకు లేదా నిమ్మ ఆకు వేసి కూడా తోడు పెడతారు.

మరుసటి రోజు ఉదయం సిద్ధమైన చద్దన్నాన్ని బాగా కలుపుకొని, రుచికి సరిపడా ఉప్పు కలపాలి. దీన్ని బ్రౌన్ రైస్‌తో కూడా తయారు చేసుకోవచ్చు. చద్దన్నం ఉల్లిపాయ ముక్కలు, పచ్చిమిర్చి, నిమ్మకాయ ఊరగాయతో కలిపి తింటే చాలా రుచికరంగా ఉంటుంది. నిమ్మకాయ ఊరగాయ లేకపోతే ఏదైనా ఇతర ఊరగాయతో కూడా తినవచ్చు. ఏమీ లేకపోయినా కూడా ఇది బాగుంటుంది. పిల్లల కోసం కావాలంటే పోపు కూడా పెట్టుకోవచ్చు.. వారు మరింత ఇష్టంగా తింటారు. చద్దన్నం తిన్న తర్వాత లభించే హాయి, సంతృప్తి చెప్పనలవి కానిది. వారానికి ఒక్కసారైనా టిఫిన్ బదులు ఇలాంటి చలువ చేసే, ఆరోగ్యకరమైన ఆహారాన్ని తీసుకోవడం వేసవిలో శరీరానికి చాలా మేలు చేస్తుంది.