Murder Mystery: తిరుపతిలో సూట్ కేసులో శవం మిస్టరీ వీడింది.. మహిళా టెక్కీని చంపింది భర్తనే.. ఆపై పెద్ద డ్రామా..

పోలీసు జరిపిన విచారణలో బంధువుల వద్ద శ్రీకాంత్ రెడ్డి ఆడిన డ్రామా వెలుగులోకి వచ్చింది. తన భార్యకు కరోనా డెల్టా వేరియంట్ వచ్చిందని... రుయా ఆసుపత్రిలో చేర్చానని... కుటుంబ సభ్యులకు శ్రీకాంత్ రెడ్డి నమ్మించాడు.

Dead Body Mystery

Sanjay Kasula |
Updated on: Jun 28, 2021 | 2:42 PM

తిరుపతి రుయా ఆస్పత్రి వెనుక కనిపించిన మృతదేహం మిస్టరీ వీడింది. ఐదు రోజుల క్రితం ఆస్పత్రి వెనుక పూర్తిగా కాలిపోయిన స్థితిలో కనిపించిన శవం కేసును తేల్చారు. ప్రేమించి పెళ్లి చేసుకున్న యువ‌కుడే ఆమెను హ‌త్య చేశాడ‌ని గుర్తించారు. వివ‌రాల్లోకి వెళ్తే… తిరుప‌తి రుయా ఆసుప‌త్రి ఆవ‌ర‌ణ‌లో ఇటీవ‌ల‌ కాలిన స్థితిలో ఓ మృత‌దేహాన్ని గుర్తించిన సిబ్బంది పోలీసుల‌కు స‌మాచారం అందించారు. కేసు న‌మోదు చేసుకుని ద‌ర్యాప్తు చేప‌ట్టిన స్థానిక పోలీసులు.. మృతదేహం పుంగ‌నూరు మండ‌లం రామ‌సముద్రానికి చెందిన టెక్కీ భువనేశ్వరిగా నిర్దారించారు. భార్య భువనేశ్వరిని ఇంట్లో హ‌త్య చేసి రుయా ఆసుప‌త్రి ఆవరణలో మృతదేహాన్ని శ్రీ‌కాంత్ రెడ్డి కాల్చినట్లుగా తేలింది. రెండున్న‌రేళ్ల క్రితం వారిద్ద‌రు ప్రేమ‌ వివాహం చేసుకున్న‌ట్లు పోలీసులు గుర్తించారు.

అయితే పోలీసు జరిపిన విచారణలో బంధువుల వద్ద శ్రీకాంత్ రెడ్డి ఆడిన డ్రామా వెలుగులోకి వచ్చింది. తన భార్యకు కరోనా డెల్టా వేరియంట్ వచ్చిందని… రుయా ఆసుపత్రిలో చేర్చానని… కుటుంబ సభ్యులకు శ్రీకాంత్ రెడ్డి నమ్మించాడు. ఆ తర్వాత భువనేశ్వరి డెల్టా వేరియంట్ తో భార్య చనిపోయిందని నమ్మించాడు. ఇందులో భాగంగా కరోనాతో చనిపోయిన వారి మృతదేహాలు బంధువులకు ఇవ్వడం లేదని కట్టుకథ చెప్పాడు.

అంతేకాదు బంధువులను రుయా ఆస్పత్రిలోని మార్చురీకి తీసుకెళ్లి మృతదేహాలన్నింటినీ వెదికినట్టు ఓ సీన్ క్రియేట్ చేశాడు. అయితే అక్కడ యువతి మృత దేహం లేకపోయే సరికి రుయా సిబ్బంది అంత్యక్రియలు చేసేసారని కుటుంబ సభ్యులని నమ్మించాడు శ్రీకాంత్. అయితే ఆ తర్వాత పోలీసులకు కాలిన మృతదేహం దొరకడంతో అసలు కథ వెలుగులోకి వచ్చింది. సెల్ ఫోన్ కాల్స్ ఆధారంగా దర్యాప్తు చేపట్టారు.

మృతురాలిని సాఫ్ట్‌వేర్ ఇంజనీర్ భువనేశ్వరిగా గుర్తించారు. ఇంట్లో భార్యని హత్య చేసి సూట్ కేసులో ప్యాక్ చేసి కారులో మృతదేహాన్ని తెచ్చి రుయా ఆసుపత్రి వెనుక తగులబెట్టినట్లుగా పోలీసులు తెలిపారు.నిందితుడు సూట్ కేసుని కారులో ఎక్కిస్తున్న దృశ్యాలు అపార్ట్మెంట్ సీసీ కెమెరాలో పోలీసులు గుర్తించారు.