Soya Kurma: చపాతీ, పూరీల్లోకి అదిరిపోయే సోయా కుర్మా.. రెస్టారెంట్ స్టైల్ రుచితో ఇంట్లోనే ఈజీగా చేసుకోండిలా!

సాధారణంగా మనం హోటళ్లు లేదా రెస్టారెంట్లకు వెళ్లినప్పుడు రకరకాల కూరగాయలతో చేసిన వెజ్ కుర్మా, లేదా చికెన్ కుర్మా, మటన్ కుర్మా, ఎగ్ కుర్మా వంటి మాంసాహార వంటకాలను రుచి చూస్తూ ఉంటాం. వీటిని చపాతీ, పూరీ, రోటీ లేదా నెయ్యి అన్నం (ఘీ రైస్) వంటి వాటితో కలిపి తింటే ఆ రుచే వేరు. అయితే, మీరు ఎప్పుడైనా ‘సోయాబీన్ కుర్మా’ను ప్రయత్నించారా? చాలా మంది ఇళ్లలో సోయాబీన్స్ (మీల్ మేకర్) తో కేవలం ఫ్రై, పలావ్ లేదా సాధారణ గ్రేవీ కర్రీ మాత్రమే చేస్తుంటారు.

సోయా పిండి నుండి చిన్న చిన్న ముక్కలుగా (మీల్ మేకర్) తయారయ్యే ఈ సోయాబీన్స్‌లో ఆరోగ్యకరమైన మొక్కల ఆధారిత పీచుపదార్థం (ప్లాంట్ బేస్డ్ ఫైబర్) చాలా అధికంగా ఉంటుంది. గుడ్లు, చేపలు లేదా మాంసం తినని కచ్చితమైన శాకాహారులకు (వెజిటేరియన్స్) ఇది ఒక అద్భుతమైన సరైన ఆహారం అని చెప్పవచ్చు. సోయాలోని అన్ని ఆరోగ్య ప్రయోజనాలను పొందుతూ, జిహ్వకు రుచిని అందించే ఈ కుర్మాను ఎలా తయారు చేయాలో ఇప్పుడు చూద్దాం.

తయారీకి కావాల్సిన పదార్థాలు:

సోయాబీన్స్ (మీల్ మేకర్) – 1 కప్పు

నూనె – 1/2 కప్పు

ఆవాలు – 1 టీస్పూన్

పచ్చి కొబ్బరి తురుము – 1/2 కప్పు

అల్లం-వెల్లుల్లి పేస్ట్ – 1/2 టీస్పూన్

టమోటాలు – 3

క్యారెట్లు – 3

బంగాళాదుంపలు – 2

పుదీనా ఆకులు – 1 కట్ట

పచ్చి మిరపకాయలు – 5

యాలకులు – 3

లవంగాలు – 4

పసుపు – చిటికెడు

ఉప్పు – మీ రుచికి తగినంత

ఉల్లిపాయలు – 2

మొక్కజొన్న పిండి (కార్న్ ఫ్లోర్) – 2 టీస్పూన్లు

సోయా కుర్మా తయారు చేసే విధానం: ముందుగా ఒక గిన్నెలో నీళ్లు తీసుకుని, అందులో ఒక కప్పు సోయాబీన్స్‌ను వేసి రాత్రంతా నానబెట్టుకోవాలి. ఉదయం లేచిన తర్వాత, బంగాళదుంపలు, నానబెట్టిన సోయాబీన్స్ క్యారెట్లను ముక్కలుగా కోసుకుని ఉడికించి పక్కన పెట్టుకోవాలి. ఇప్పుడు ఒక మిక్సీ జార్ తీసుకుని.. అందులో అల్లం-వెల్లుల్లి పేస్ట్, యాలకులు, పచ్చి కొబ్బరి, లవంగాలు, శుభ్రం చేసిన పుదీనా ఆకులు పచ్చిమిరపకాయలు వేసి కొద్దిగా నీళ్లు పోసి మసాలా పేస్ట్‌లాగా మెత్తగా రుబ్బుకోవాలి. ఆ తర్వాత స్టవ్ వెలిగించి, దాని మీద ఒక మందపాటి పాన్ లేదా బాణలి పెట్టి నూనె పోయాలి. నూనె వేడెక్కాక ఆవాలు వేసి చిటపటలాడనివ్వాలి. అందులోనే ఉల్లిపాయ ముక్కలు, టమాటా ముక్కలు, చిటికెడు పసుపు, తగినంత ఉప్పు వేసి బాగా కలుపుతూ ఒక రెండు నిమిషాల పాటు దోరగా వేయించాలి.

టమాటాలు కాస్త మగ్గిన తర్వాత, ముందుగా ఉడికించి పెట్టుకున్న సోయాబీన్స్, బంగాళదుంప, క్యారెట్ ముక్కలను బాణలిలో వేసి కొద్దిగా నీళ్లు పోసి ఐదు నిమిషాల పాటు మూతపెట్టి ఉడకనివ్వాలి. ముక్కలు ఉడుకుతున్నప్పుడు, ముందుగా మిక్సీ పట్టుకున్న మసాలా పేస్ట్‌ను అందులో వేసి పచ్చివాసన పోయేంత వరకు కొద్దిసేపు ఉడికించాలి. గ్రేవీ కొద్దిగా చిక్కబడుతున్న సమయంలో, ఒక అర కప్పు నీళ్లు తీసుకుని అందులో రెండు టీస్పూన్ల మొక్కజొన్న పిండి (కార్న్ ఫ్లోర్) వేసి ఉండలు లేకుండా కలుపుకుని, ఆ మిశ్రమాన్ని కుర్మాలో పోయాలి. పైనుండి కరివేపాకు చల్లుకుని ఒకటి లేదా రెండు నిమిషాల పాటు ఉడకనిచ్చి స్టవ్ ఆపేయాలి. అంతే, ఎంతో గుమగుమలాడే రుచికరమైన రెస్టారెంట్ స్టైల్ సోయాబీన్ కుర్మా ఆస్వాదించడానికి సిద్ధం. దీనిని ఒక గిన్నెలోకి తీసుకుని వేడివేడిగా చపాతీ లేదా పూరీతో వడ్డించుకోండి.