ప్రియురాలితో భర్తకు పెళ్లి జరిపించిన భార్యామణి

వెనకటి తెలుగు సినిమాల్లోలాగే భోపాల్‌లో ఓ సంఘటన జరిగింది. ఇద్దరు హీరోయిన్లు ఉన్న నాగేశ్వరరావు, శోభన్‌బాబు సినిమాల్లో ఓ హీరోయిన్‌ త్యాగం చేసినట్టుగానే భర్త ఆనందం కోసం ఓ భార్య తన జీవితాన్నే త్యాగం చేసింది.. భర్తను, అతడి ప్రియురాలిని కలిపి త్యాగశీలవమ్మా మహిళా.. అనురాగశీలవమ్మా ..తోటివారికై సకలము నొసగే కరుణామయివమ్మా అనే పాటను గుర్తు చేసింది.. భోపాల్‌లోని ఓ జంటకు మూడేళ్ల కిందట పెళ్లయింది.. అయితే గతంలో తన భర్త ఓ యువతని ప్రేమించినట్టు తెలుసుకుంది భార్యామణి.. పెళ్లయినా ఆమెను అతగాడు మర్చిపోలేకపోతున్నాడని గ్రహించింది.. ఓరోజు తాను ఆమెను కూడా పెళ్లి చేసుకుంటానని, ముగ్గురం కలిసి ఆనందంగా ఉండొచ్చని భార్యతో అన్నాడు.. అయితే చట్టం అందుకు ఒప్పుకోదని భార్య చెప్పింది.. చెప్పడమే కాదు, మూడేళ్ల వివాహజీవితాన్ని వదులుకోడానికి సిద్ధపడింది. భర్త సుఖం కోసం తన జీవితాన్ని త్యాగం చేసింది.. భర్తకు విడాకులు ఇచ్చింది.. ప్రేమికురాలితో భర్తకు పెళ్లి చేసింది.. ఈ విడాకుల కేసును వాదించిన మహిళా న్యాయవాది ఈ విషయాన్ని చెప్పింది కానీ లేకపోతే ఈ సినిమాకు సరిపడే కథ మనకు తెలిసేదే కాదు…! ఈ స్టోరీ అంతా చదివాక మీకు హమ్‌ దిల్‌ దే చుకే సనమ్‌ సినిమా గుర్తుకు రావచ్చు …