తిప్ప‌తీగ‌తో అత‌డి ల‌క్ తిరిగింది.. ఇప్పుడు ఏకంగా కోట్లు సంపాదిస్తున్నాడు

తిప్పతీగ‌.. సిటీల‌లో ఉండేవాళ్ల‌కు దీని గురించి తెలియ‌క‌పోయినా.. ప‌ల్లె జనాల‌కు మాత్రం నిత్యం క‌నిపించేదే. రోగ నిరోధక శక్తిని పెంచేందుకు ఈ తీగ బాగా ఉప‌యోగ‌ప‌డుతుంద‌ని పెద్ద‌లు చెబుతారు. సైన్స్ ప‌రంగా కూడా ఆ విష‌యం ప్రూవ్ అయ్యింది. ప్ర‌స్తుతం క‌రోనా నేప‌థ్యంలో తిప్ప‌తీగ‌కు డిమాండ్ పెరిగింది. ఈ క్ర‌మంలో క‌రోనా కార‌ణంగా చాలామంది కొలువులు కోల్పోతుంటే.. తిప్ప‌తీగ‌తో రూ.కోట్ల కాంట్రాక్టుతో వ్యాపారంలో దూసుకుపోతున్నాడు ఓ యువ గిరిజన వ్యాపారి. వివ‌రాల్లోకి వెళ్తే.. మహారాష్ట్రలోని ఠాణేకు చెందిన సునీల్​ పవార్​ అనే యువకుడు తిప్పతీగ సరఫరా కోసం పేరొందిన సంస్థలతో రూ.1.5కోట్ల అగ్రిమెంట్ కుదుర్చుకున్నాడు. అంతేకాదు.. తన వ్యాపారం ద్వారా వందల మంది గిరిజనులకు ఉపాధి కల్పిస్తున్నాడు.

షాహ్​పుర్​ తాలుకాలోని ఖరిద్​కు చెందిన సునీల్​కు.. స్థానిక అడవుల్లో లభించే ఔషధ గుణాలున్న మొక్కలపై మంచి పెద్ద‌ల ద్వారా అవ‌గాహ‌న ఏర్ప‌డింది. ఇమ్యూనిటీ ప‌వ‌ర్ పెంచడంలో తిప్పతీగ బాగా ఉప‌యోగ‌ప‌డుతుందని అత‌డు తెలుసుకున్నాడు. రెండు సంవత్సరాల క్రితం దానిని సేకరించి.. కంపెనీలకు అందించే వ్యాపారాన్ని స్టార్ట్ చేశాడు​. అందులో భాగంగా కట్కరీ తెగకు ఉపాధి కల్పిస్తూ ప్రధానమంత్రి వన్​ధన్​ పథకం సాయంతో వన్​ధన్​ కేంద్రాన్ని ఏర్పాటు చేశాడు​. ఆ సమయంలో ఏడాదికి రూ.3 నుంచి రూ.5 లక్షలు సంపాదించేవాడు. కరోనా మహమ్మారి కారణంగా తిప్పతీగకు డిమాండ్ విపరీతంగా​ పెరిగింది. దీంతో డాబర్, బైద్యనాథ్, హిమాలయ వంటి సంస్థలకు 350 టన్నుల తిప్పతీగ సరఫరా చేసేందుకు అతడు ఏకంగా రూ.1.57కోట్ల కాంట్రాక్టును దక్కించుకున్నాడు. ప్రస్తుతం షాహ్​పుర్​లోనే సునీల్​కు 6 వన్​ధన్​ కేంద్రాలున్నాయి.  ఆయుర్వేదంలో తిప్పతీగను విరివిగా వాడతారు. హెపటైటిస్, ఆస్తమా, జ్వరం, డయాబెటిస్, గుండె సంబంధిత రోగాలను నయం చేయడంలో ఇది కీలకంగా పనిచేస్తుంది. ముఖ్యంగా రోగనిరోధక శక్తిని పెంచడంలో బాగా ఉపయోగపడుతుంది.

Also Read: తెలంగాణ‌లో అంతర్రాష్ట్ర సర్వీసుల‌కు అనుమ‌తి లేదు.. స‌డ‌లింపుల వివ‌రాలు ఇలా ఉన్నాయి

 కరోనా నుంచి కోలుకున్న‌ తర్వాత అటాక్ చేస్తోన్న ప్ర‌ధాన జ‌బ్బులు ఇవే – జాగ్రత్తగా ఉండాలంటున్న వైద్యులు