Heavy Rains: దేశవ్యాప్తంగా చురుకుగా కదులుతున్న రుతుపవనాలు.. 10 రాష్ట్రాలకు ఐఎండీ అలర్ట్

ఉత్తర భారతంలో వరుణుడు గర్జిస్తున్నాడు. ఉత్తరాఖండ్‌ , ఢిల్లీ , రాజస్థాన్‌తో పాటు పలు రాష్ట్రాల్లో భారీ వర్షాలు కురుస్తున్నాయి. ఉత్తరాఖండ్‌లో కుండపోత వర్షం కురుస్తోంది. హరిద్వార్‌ , రిషికేశ్‌తో పాటు పలు ప్రాంతాల్లో ఎడతెరిపి లేకుండా వర్షాలు కురుస్తున్నాయి. వరదల కారణంగా పలు ఇళ్లు కుప్పకూలాయి. చాలా ప్రాంతాల్లో లోతట్టు ప్రాంతాలు నీట మునిగాయి. గంగానది ప్రమాదస్థాయిని దాటి ప్రవహిస్తోంది. గంగానది ఉపనది సూకిలో చాలా రోజులు నీళ్లు లేవు. కాని ఎగువ ప్రాంతంలో కురుస్తున్న వర్షాలతో ఆకస్మాత్తుగా ప్రవాహం వచ్చింది. కార్ల పార్కింగ్‌ స్థలం లోకి కూడా వరదనీరు ప్రవేశించింది. చాలా కార్లు వరదనీటిలో కొట్టుకుపోయాయి.

దేశవ్యాప్తంగా రుతుపవనాలు చురుకుగా కదులుతున్నాయి. రుతుపవనాలు ఉత్తర భారత్‌లోని జైసల్మేర్, చురు, భివానీ, ఢిల్లీ, అలీఘర్, హర్దోయ్, మొరాదాబాద్, ఉనా, పఠాన్‌కోట్, జమ్మూ మీదుగా కొనసాగుతుంది. నైరుతి రుతుపవనాలు పశ్చిమ రాజస్థాన్, హర్యానా-చండీగఢ్, పంజాబ్‌లోని మరికొన్ని ప్రాంతాలకు, పశ్చిమ ఉత్తరప్రదేశ్, హిమాచల్ ప్రదేశ్, జమ్మూలోని మిగిలిన ప్రాంతాలకు వచ్చే 2-3 రోజులలో పరిస్థితులు అనుకూలంగా ఉన్నాయని IMD తెలిపింది.

అటు దేశ రాజధాని ఢిల్లీలోకి రుతుపవనాలు ప్రవేశించాయి. ఆదివారం ఉదయం నుంచి భారీ వర్షాలు కురుస్తున్నాయి. ఐఎండీ ఢిల్లీలో మంగళవారం వరకు ఆరెంజ్ అలర్ట్, బుధవారం నుంచి శుక్రవారం వరకు ఎల్లో అలర్ట్ ప్రకటించింది. అలాగే, వారం మొత్తం ఢిల్లీ-ఎన్‌సీఆర్‌లో వర్షాలు కురిసే అవకాశం ఉంది. ఢిల్లీ, ఉత్తరప్రదేశ్, హిమాచల్ ప్రదేశ్, ఉత్తరాఖండ్, హర్యానా, పంజాబ్ రాష్ట్రాల్లో కూడా భారీ వర్షాలు కురుస్తాయని వాతావరణ శాఖ తెలిపింది.

ఢిల్లీ, హర్యానా, చండీగఢ్‌లలో ఆదివారం నుంచి బుధవారం వరకు పలుచోట్ల భారీ వర్షాలు కురుస్తున్నాయి. గురు-శుక్రవారాల్లో పలుచోట్ల వర్షాలు పడే అవకాశం ఉంది. శుక్రవారం కురిసిన భారీ వర్షాలకు రాజధానిలోని పలు ప్రాంతాల్లో భారీ నష్టం వాటిల్లింది. వర్షం కారణంగా ఉష్ణోగ్రతలు 33 డిగ్రీలకు పడిపోయింది. అదే సమయంలో, శనివారం, ప్రజలు పగటిపూట తేమను ఎదుర్కోవలసి వచ్చింది.

రానున్న 5 రోజుల్లో వాయువ్య, మధ్య, తూర్పు భారతదేశంలో ఉరుములతో కూడిన తేలికపాటి నుండి మోస్తరు వర్షాలు కురిసే అవకాశం ఉందని వాతావరణ శాఖ అంచనా వేసింది. ఉత్తరప్రదేశ్ రాష్ట్రంలో రుతుపవనాలు ప్రవేశించడంతో భారీ వర్షాలు కురుస్తున్నాయి. రాష్ట్రంలోని పశ్చిమ, తూర్పు ప్రాంతాల్లో వారం రోజుల పాటు వర్షాలు కురుస్తాయి. ఆదివారం నుండి మంగళవారం వరకు పశ్చిమ ఉత్తరప్రదేశ్‌లోని చాలా ప్రాంతాలలో, బుధ-గురువారాల్లో కొన్ని ప్రాంతాలలో, శుక్రవారం చాలా ప్రాంతాల్లో భారీ వర్షాలు కురుస్తాయని వాతావరణ శాఖ అంచనా వేసింది. తూర్పు ఉత్తరప్రదేశ్‌లో కూడా ఇదే వాతావరణం ఉంటుంది. మైదాన ప్రాంతాల నుంచి పర్వతాల వరకు భారీ వర్షాలు కురుస్తున్నాయి. నేటి నుంచి జూలై 3వ తేదీ వరకు హిమాచల్ ప్రదేశ్, ఉత్తరాఖండ్, పంజాబ్, హర్యానా-చండీగఢ్, మధ్యప్రదేశ్, తూర్పు రాజస్థాన్‌లోని కొన్ని ప్రాంతాల్లో భారీ వర్షాలు కురిసే అవకాశం ఉందని భారత వాతావరణ శాఖ అంచనా వేసింది. ఈ వర్షపు వాతావరణం వారం పొడవునా కొనసాగనుంది.

IMD ప్రకారం, ఆదివారం నుంచి ఛత్తీస్‌గఢ్, జార్ఖండ్, పశ్చిమ బెంగాల్, ఒడిశాలో భారీ వర్షాలు కురుస్తాయి. దీంతో పాటు పశ్చిమ రాజస్థాన్‌లో జూలై 2, 3 తేదీల్లో, బీహార్‌లో జూలై 2 వరకు భారీ వర్షాలు కురిసే అవకాశం ఉంది. జూలై 1న సౌరాష్ట్ర, కచ్, కేరళ, మహే, తమిళనాడు, కోస్టల్ కర్ణాటక, దక్షిణ ఇంటీరియర్ కర్ణాటకలలో చెదురుమదురుగా భారీ వర్షాలు కురిసే అవకాశం ఉంది. జూలై 3లో గుజరాత్ ప్రాంతం, కొంకణ్, గోవా, సెంట్రల్ మహారాష్ట్రలో భారీ వర్షాలు కురిసే అవకాశం ఉందని వాతావరణ శాఖ తెలిపింది.

మరిన్ని జాతీయ వార్తల కోసం ఇక్కడ క్లిక్ చేయండి..