Science Facts: బిస్కెట్లకు ఆ చిన్న రంధ్రాలు ఎందుకు పెడతారో తెలుసా.. దీని వెనుక ఉన్న అసలు రహస్యం ఇదే!

సాయంత్రం పూట వేడి వేడి టీతో పాటు బిస్కెట్లు తినడం చాలా మందికి అలవాటే. అయితే మార్కెట్లో లభించే పార్లే-జి, మేరీగోల్డ్ లేదా సాల్ట్ బిస్కెట్ల వంటి రకాలను గమనించినప్పుడు వాటిపై చిన్న చిన్న రంధ్రాలు ఉండటాన్ని మనం చూసే ఉంటాము. చాలా మంది ఇవి కేవలం బిస్కెట్ అందంగా కనిపించడానికి వేసిన డిజైన్ లేదా అలంకరణ అని అనుకుంటారు. కానీ వాస్తవానికి ఈ చిన్న రంధ్రాల వెనుక చాలా ముఖ్యమైన శాస్త్రీయ కారణం దాగి ఉంది. ఈ రంధ్రాలు లేకపోతే మనం తినే బిస్కెట్లు చూడటానికి ఈ ఆకారంలో ఉండవు , మనం ఆశించే కరకరలాడే రుచిని అస్సలు కలిగి ఉండవు. ఈ నేపథ్యంలో బిస్కెట్లపై ఉండే ఆ చిన్న రంధ్రాల వెనుక ఉన్న ఆసక్తికరమైన సైన్స్ ఏమిటో ఇప్పుడు వివరంగా తెలుసుకుందాం.

సాధారణంగా ఫ్యాక్టరీలలో నీరు, మైదా పిండి, చక్కెర , ఇతర అవసరమైన పదార్థాలను ఒకదానితో ఒకటి కలిపి బిస్కెట్ల ముద్దను తయారు చేస్తారు. ఇలా సిద్ధం చేసిన పిండి ముద్దను ఓవెన్లలో పెట్టి బేక్ చేసేటప్పుడు, ఆ వేడికి పిండిలో ఉన్న గాలి , తేమ అంతా కలిసి విపరీతమైన ఆవిరిగా మారుతుంది. ఈ ఆవిరి గనుక బయటకు వెళ్ళడానికి సరైన మార్గం దొరకకపోతే, బిస్కెట్ లోపలి భాగం విపరీతంగా ఉబ్బిపోవడం, పగుళ్లు రావడం లేదా దాని అసలు ఆకారాన్ని పూర్తిగా కోల్పోవడం జరుగుతుంది. ఈ సమస్యకు పరిష్కారంగా బిస్కెట్లను ఓవెన్ లోకి పంపే ముందే వాటిపై చిన్న చిన్న రంధ్రాలను చేస్తారు. సాంకేతిక లేదా పరిశ్రమ పరిభాషలో ఈ రంధ్రాలను డాకర్ హోల్స్ అని పిలుస్తారు.

ఈ రంధ్రాలు పెట్టడం వల్ల బిస్కెట్లు కాలుతున్నప్పుడు వాటి లోపల నిలిచిపోయే అధిక ఆవిరి, గాలి ఎలాంటి అడ్డంకులు లేకుండా సులభంగా బయటకు పోవడానికి వీలు కలుగుతుంది. ఫలితంగా బిస్కెట్లు అన్ని వైపులా సమానంగా ఉడకడమే కాకుండా, పైభాగం ఎగుడుదిగుడులు లేకుండా చదునైన ఉపరితలాన్ని కలిగి ఉంటుంది. ఒకవేళ ఈ రంధ్రాలు లేకపోతే బిస్కెట్లు అసమానంగా పొంగి, కొన్ని చోట్ల ఎక్కువగా మరికొన్ని చోట్ల తక్కువగా ఉబ్బిపోతాయి. దీనివల్ల బిస్కెట్ల ప్యాకింగ్ చేయడం కూడా తయారీదారులకు చాలా కష్టంగా మారుతుంది.

బిస్కెట్లలోని రంధ్రాలు కేవలం వాటి ఆకారాన్ని , రూపాన్ని కాపాడటంలోనే కాకుండా, వాటికి మంచి క్రిస్పీనెస్ అంటే కరకరలాడే గుణాన్ని అందించడంలో కూడా కీలక పాత్ర పోషిస్తాయి. బేకింగ్ సమయంలో లోపలి తేమ మొత్తం ఈ రంధ్రాల ద్వారా సులభంగా ఆవిరైపోవడం వల్ల బిస్కెట్ లోపలి వరకు పచ్చి లేకుండా బాగా ఆరి, మరింత కరకరలాడుతూ తయారవుతుంది. అందుకే మార్కెట్లో లభించే అనేక రకాల వాణిజ్య క్రాకర్లు, సాల్ట్ బిస్కెట్లు , కుకీలలో ఈ రకమైన చిన్న రంధ్రాలు తప్పనిసరిగా కనిపిస్తాయి. అయితే మార్కెట్లో దొరికే అన్ని బిస్కెట్లకు ఈ రంధ్రాలు ఉండవు. కొన్ని రకాల ప్రత్యేకమైన కుకీస్ , లోపల క్రీమ్ నింపిన బిస్కెట్లకు రంధ్రాలు పెట్టరు. ఎందుకంటే వాటిని తయారు చేసే విధానం, వాడే ప్రక్రియ పూర్తిగా భిన్నంగా ఉంటాయి. సాదా బిస్కెట్లు , క్రాకర్లకు మాత్రం ఈ డాకర్ హోల్స్ ఒక ప్రాథమిక అవసరమని చెప్పవచ్చు.