వాయమ్మో.. అతిగా యాంటీబ‌యాటిక్స్ వాడుతున్నారా? ఇది తెలిస్తే కళ్లు బైర్లు కమ్మాల్సిందే..

ప్రస్తుత కాలంలో ఎన్నో అనారోగ్య సమస్యలు వెంటాడుతున్నాయి.. ఇలాంటి పరిస్థితుల్లో కొందరు ఇష్టారాజ్యంగా యాంటీబ‌యాటిక్స్ వాడుతుంటారు.. అలాంటి వారికి వైద్యులు హెచ్చరికలు జారీ చేస్తున్నారు. యాంటీబ‌యాటిక్ మందులు వేసినా కూడా సూక్ష్మజీవులు చ‌నిపోవ‌డానికి బ‌దులు ఇంకా పెరుగుతూనే ఉండే ప‌రిస్థితిని యాంటీ మైక్రోబ‌య‌ల్ రెసిస్టెన్స్ (ఏఎంఆర్) అంటారు. దీని గురించి ఆస్టర్ ప్రైమ్ ఆస్పత్రికి చెందిన ఇన్ఫెక్షన్ నియంత్రణ నిపుణురాలు, కన్సల్టెంట్ మైక్రోబ‌యాల‌జిస్ట్ డాక్టర్ ఆర్సీ బిలోరియా ఆసక్తికర విషయాలను పంచుకున్నారు. ప్రపంచ ఏఎంఆర్ అవ‌గాహ‌న వారోత్సవాన్ని (వావ్‌) ప్రపంచ‌వ్యాప్తంగా ప్రతి యేటా న‌వంబ‌ర్ 18 నుంచి 24 వ‌ర‌కు జరుపుకుంటారు. ఈ సంవ‌త్సరం థీమ్ “ఇప్పుడే స్పందించండి: మ‌న వ‌ర్తమానాన్ని ర‌క్షించి, భ‌విష్యత్తును కాపాడుకోండి’’.. ఈ థీమ్ ఏఎంఆర్‌ను ఎదుర్కొనేందుకు ధైర్యవంతమైన, సమన్వయపూర్వక, విభాగాల వ్యాప్తంగా చర్యల అవసరాన్ని చెబుతోంది. ఏఎంఆర్ అనేది ఇప్పటికే మన ఆరోగ్యం, ఆహార వ్యవస్థలు, పరిసరాలు, ఆర్థిక వ్యవస్థలపై ప్రభావం చూపుతున్న ఒక ప్రపంచవ్యాప్త ముప్పు..

యాంటీబ‌యాటిక్స్ అనేవి ప్రాణాధార మందులు. కానీ, అవి ఇన్ఫెక్షన్ క‌ల‌గ‌జేసే సూక్ష్మజీవుల మీద ప‌నిచేస్తేనే ప్రాణాల‌ను కాపాడ‌తాయి. యాంటీబ‌యాటిక్స్ మందులు స‌మ‌ర్థంగా ఇన్ఫెక్షన్లను నియంత్రించ‌లేక‌పోతే ప్రాణాధార చికిత్సలైన క్యాన్సర్ చికిత్స, అవ‌య‌వ మార్పిడి లాంటి వాటిపై ఏఎంఆర్ ప్రభావం చూపుతుంది.

యాంటీబ‌యాటిక్స్ మందుల‌ను చెప్పిన డోస్ కంటే త‌క్కువ కాలం వాడ‌డం, లేదా త‌గిన డోసేజీలో వాడ‌క‌పోవ‌డం, ఒక వ్యాధికి స‌రిప‌డ‌ని మందు వాడ‌డం లాంటివే వాటిని స‌రిగా వాడ‌క‌పోవ‌డం అవుతుంది. వైద్యులు చెప్పిన‌ట్లే వీటిని వాడాలి. మీ స‌మ‌స్యకు వైద్యులు యాంటీబ‌యాటిక్స్ రాయ‌క‌పోతే, అవి కావాల‌ని వారిపై ఒత్తిడి చేయకూడదు. వేరేవారికి రాసిన మందులు వాడ‌డం వ‌ల్ల మీకు న‌య‌మైపోతుంద‌ని అనుకోకూడ‌దు. మీ అవ‌స‌రాల‌కు త‌గిన మందుల‌ను స‌రైన డోసులోనే తీసుకోవాలి. మ‌న దేశంలో నేరుగా దుకాణాల‌కు వెళ్లి ఏదిప‌డితే ఆ యాంటీబ‌యాటిక్ కొనుక్కునే అవ‌కాశం ఉండ‌డం కూడా వీటి దుర్వినియోగానికి కార‌ణం అవుతోందని మైక్రోబ‌యాల‌జిస్ట్ డాక్టర్ ఆర్సీ బిలోరియా తెలిపారు.

కొత్త యాంటీబ‌యాటిక్స్ త‌యారీ చాలా స‌మ‌స్యాత్మకం, ఖ‌ర్చుతో కూడుకున్నది. మార్కెట్లోకి రావ‌డానికి చాలా స‌మ‌యం ప‌డుతుంది. దీనివ‌ల్ల కొత్త యాంటీబ‌యాటిక్స్ త‌గ్గుతున్నాయి. అందుక‌ని ఉన్నవాటినే జాగ్రత్తగా కాపాడుకోవాలి.

టీకాలు తీసుకోవాలి..

చాలావ‌ర‌కు టీకాలు బ్యాక్టీరియ‌ల్ ఇన్ఫెక్షన్లను నిరోధిస్తాయి. కాబ‌ట్టి ఏఎంఆర్ స‌మ‌స్య ప‌రిష్కారానికి పిల్లలు, పెద్దలు, వృద్ధులంద‌రూ టీకాలు తీసుకోవ‌డం చాలా ముఖ్యం.. ఎవ‌రికైనా ఇన్ఫెక్షన్ రాక‌పోతే యాంటీబ‌యాటిక్స్ వాడాల్సిన అవ‌స‌ర‌మే ఉండ‌దు.

ఏఎంఆర్ నిరోధానికి ఈ కింది ప‌ద్ధతుల ద్వారా కృషిచేయ‌వచ్చు.. ఎలాగంటే..

మీ వైద్యులు సూచించ‌క‌పోతే యాంటీబ‌యాటిక్స్ కావాల‌ని ఒత్తిడిచేయ‌కండి.

మందుల దుకాణం నుంచి యాంటీబ‌యాటిక్స్ కొనాలంటే వైద్యుల ప్రిస్క్రిప్షన్‌తోనే వెళ్లండి. నేరుగా వెళ్లి కొన‌కండి.

యాంటీబ‌యాటిక్స్ వాడ‌డానికి ఎప్పుడూ వైద్యుల స‌ల‌హా పాటించండి. వాడాల్సినంత కాలం వాడాలి త‌ప్ప మ‌ధ్యలో ఆప‌కూడ‌దు.

మిగిలిపోయిన యాంటీబ‌యాటిక్స్ వాడ‌ద్దు, ఎవ‌రికీ ఇవ్వద్దు.

రోజూ చేతులు క‌డుక్కోవ‌డం, ఆహారాన్ని శుభ్రంగా వండ‌డం, అనారోగ్య బాధితుల‌కు ద‌గ్గరగా ఉండ‌క‌పోవ‌డం, ద‌గ్గువ‌చ్చిన‌ప్పుడు నోరు చేత్తో మూసుకోవ‌డం, ఎప్పటిక‌ప్పుడు టీకాలు వేసుకోవ‌డం ద్వారా ఇన్ఫెక్షన్లను నియంత్రించండి.

వైద్యులు స‌రైన యాంటీబ‌యాటిక్‌, స‌రైన డోసులో, స‌రైన కాలం పాటు, స‌రైన స‌మ‌యంలో ఇవ్వాలి. వీలైనంత త‌క్కువ‌కాలం పాటు యాంటీబ‌యాటిక్స్ వాడ‌డ‌మే స‌రైన వ్యూహం. ఇన్ఫెక్షన్లకు స‌రైన చికిత్స చేయ‌డం వ‌ల్ల యాంటీబ‌యాటిక్స్ వ‌ల్ల క‌లిగే దుష్ప్రభావాలు త‌గ్గుతాయి, యాంటీ మైక్రోబ‌య‌ల్ రెసిస్టెన్స్ రాదని మైక్రోబ‌యాల‌జిస్ట్ తెలిపారు.

మరిన్ని హెల్త్ వార్తల కోసం ఇక్కడ క్లిక్ చేయండి..