5 Minute Jumping Jacks: ప్రతి రోజూ ఉదయాన్నే 5 నిమిషాలు ఇలా చేస్తే ఎన్ని ప్రయోజనాలో తెలుసా..?
మనలో చాలా మందికి ఉదయం నిద్రలేచిన తర్వాత వ్యాయామం చేయాలనే కోరిక ఉంటుంది. కానీ ఉద్యోగం, సమయం లేకపోవడం, ఆలస్యంగా లేవడం వంటి కారణాలతో ఆ ఉద్దేశం చాలా సార్లు నెరవేరదు. అయితే మీరు జిమ్ కు వెళ్లకుండా గడియారాన్ని చూసే అవసరం లేకుండానే ఆరోగ్యంగా ఉండే ఒక సులభమైన మార్గం ఉంది. అదే జంపింగ్ జాక్స్ అనే తేలికైన వ్యాయామం.
Updated on: Jun 29, 2025 | 12:41 PM
రోజూ ఉదయం కేవలం 5 నిమిషాలు ఈ వ్యాయామం చేయడం వల్ల శరీరం మనసులో ఎన్నో మంచి మార్పులు వస్తాయి. వాటి గురించి ఇప్పుడు తెలుసుకుందాం. జంపింగ్ జాక్స్ గుండె పనితీరును మెరుగుపరిచే కార్డియో వ్యాయామాల్లో ఒకటి. శరీరంలో రక్త ప్రసరణ బాగా జరిగేలా చేస్తుంది. గుండె వేగం స్థిరంగా ఉండటం వల్ల గుండెకు కావాల్సిన వ్యాయామం లభిస్తుంది. దీని వల్ల గుండె సంబంధిత వ్యాధుల ప్రమాదం తగ్గుతుంది. రక్తపోటు నియంత్రణలో ఉండటంతో పాటు.. స్ట్రోక్ వచ్చే అవకాశాలను కూడా తగ్గించగలదు.
ఈ వ్యాయామంలో చేతులు, కాళ్లు, వెన్నెముక వంటి ప్రధాన శరీర భాగాలన్నీ కదులుతాయి. ఇది కండరాలకు మంచి వ్యాయామం కావడమే కాదు.. శరీర సమతుల్యతను మెరుగుపరుస్తుంది. మనం శారీరకంగా చురుగ్గా ఉండాలంటే ఇవన్నీ కలిసి పనిచేయాలి. కాబట్టి రోజును ఈ వ్యాయామంతో ప్రారంభిస్తే.. దినచర్య మొత్తం చురుకుగా సాగుతుంది.
ఈ వ్యాయామం చేసినప్పుడు శరీరం ఎండోర్ఫిన్స్ అనే హార్మోన్ లను ఉత్పత్తి చేస్తుంది. ఇవి మనకు మంచి అనుభూతిని కలిగించే హార్మోన్ లు. శక్తిని అందించడంతో పాటు.. అలసటను తగ్గిస్తాయి. దీని వల్ల మీరు రోజంతా ఉత్సాహంగా ఉండగలుగుతారు.
జంపింగ్ జాక్స్ సాధారణంగా ఎక్కువ కేలరీలు ఖర్చు చేసే వ్యాయామంగా పరిగణించబడుతుంది. ఈ వ్యాయామాన్ని రోజూ అలవాటుగా చేసుకుంటే.. శరీరంలో ఉన్న కొవ్వు వేగంగా కరిగిపోతుంది. అదనంగా మంచి ఆహార నియమాలతో కలిపితే ఇది బరువు తగ్గడంలో గణనీయమైన సహాయంగా మారుతుంది.
జంపింగ్ జాక్స్ చేసినప్పుడు మెదడుకు ఆక్సిజన్ రక్తప్రసరణ బాగా జరుగుతుంది. దీని వల్ల మానసిక ఏకాగ్రత, స్పష్టత పెరుగుతుంది. ఉదయం తక్కువ సమయంలోనే మనసు ప్రశాంతంగా ఉండాలంటే ఇది సరైన వ్యాయామం. ఒత్తిడిని తగ్గించడంలో, ఆనందకరమైన మూడ్ ను కలిగించడంలో ఇది ముఖ్యమైన పాత్ర పోషిస్తుంది.
నాలుగు గోడల మధ్య సాధనాలేకుండా తక్కువ సమయంలోనే శరీరానికి ఎంతో ఉపయోగకరంగా ఉండే వ్యాయామం జంపింగ్ జాక్స్. మీరు ఎంత ఆలస్యంగా లేచినా సరే.. కేవలం 5 నిమిషాలు ఈ వ్యాయామం చేస్తే శరీరంలో ఆరోగ్యకరమైన మార్పులు వస్తాయి. ఇది గుండె ఆరోగ్యాన్ని మెరుగుపరచడమే కాకుండా.. శక్తిని పెంచుతుంది, బరువు తగ్గించడంలో సహాయపడుతుంది, మానసిక స్థితిని కూడా స్థిరంగా ఉంచుతుంది.
