Diabetics: డయాబెటిస్ రోగులకు చేసే గ్లూకోజ్ పరీక్షలను నొప్పిలేకుండా చేసే విధానం కనిపెట్టిన శాస్త్రవేత్తలు
Diabetics: డయాబెటిస్ రోగుల కోసం రక్తంలో గ్లూకోజ్ పరీక్ష కోసం "హోలీ గ్రెయిల్" ను అభివృద్ధి చేశారని ఆస్ట్రేలియా శాస్త్రవేత్తలు చెబుతున్నారు.
Updated on: Jul 14, 2021 | 9:43 AM
Diabetics: డయాబెటిస్ రోగుల కోసం రక్తంలో గ్లూకోజ్ పరీక్ష కోసం “హోలీ గ్రెయిల్” ను అభివృద్ధి చేశారని ఆస్ట్రేలియా శాస్త్రవేత్తలు చెబుతున్నారు. ఇది లాలాజలం ద్వారా గ్లూకోజ్ స్థాయిలను తనిఖీ చేసే నాన్-ఇన్వాసివ్ స్ట్రిప్. ఇప్పటివరకూ ఈ పరీక్షలను రక్తనమూనాలు సేకరించడం ద్వారా చేస్తూవస్తున్నారు. ఈ పరీక్షా ఫలితాల కోసం ఎక్కువసేపు వేచి ఉండాల్సిన పరిస్థితి ఉంది. ఇప్పుడు ఆస్ట్రేలియా శాస్త్రవేత్తలు చెబుతున్న ఈ విధానంతో ఆ సమస్యలు ఉండవు. చిన్న స్ట్రిప్ ద్వారా లాలాజలం నుంచి గ్లూకోజ్ స్థాయిలను ఈ పద్ధతిలో సులభంగా గుర్తించవచ్చు. గ్లూకోజ్ను గుర్తించే ఎంజైమ్ను ట్రాన్సిస్టర్లో పొందుపరచడం ద్వారా ఈ తాజా పరీక్ష పనిచేస్తుంది. ఆ తరువాత గ్లూకోజ్ ఉనికిని ఇది చూపిస్తుందని ఆస్ట్రేలియాలోని న్యూకాజిల్ విశ్వవిద్యాలయంలోని భౌతికశాస్త్ర ప్రొఫెసర్ పాల్ దస్తూర్ తెలిపారు. “ఈ పరీక్ష నిజంగా నొప్పి లేని, తక్కువ ఖర్చుతో కూడిన గ్లూకోజ్ పరీక్ష అవకాశాన్ని అందిస్తుంది. డయాబెటిస్ బాధితులకు మెరుగైన ఫలితాలను ఇస్తుంది” అని ఆయన చెప్పారు.
శాస్త్రవేత్తలు సౌర ఘటాలపై పనిచేస్తున్న సమయంలో ఈ కొత్త పరీక్ష విధానం అనుకోకుండా సృష్టించడం జరిగింది. క్లినికల్ ట్రయల్స్ ఆమోదింప చేసుకోవడం కోసం టెస్ట్ కిట్లను ఉత్పత్తి చేయడానికి ఒక సదుపాయాన్ని ఏర్పాటు చేయడానికి ఈ ప్రాజెక్ట్ ఆస్ట్రేలియా ప్రభుత్వం నుంచి 6.3 మిలియన్ ఆస్త్రేలియన్ డాలర్ల నిధులను పొందింది. సాంకేతిక పరిజ్ఞానాన్ని కోవిడ్-19 పరీక్ష, అలెర్జీ, హార్మోన్, క్యాన్సర్ పరీక్షలకు కూడా అన్వయింప చేసుకునేందుకు అవకాశం ఉన్నట్టు దస్తూర్ చెప్పారు.
ఈ విశ్వవిద్యాలయం ఇప్పటికే హార్వర్డ్ విశ్వవిద్యాలయంతో కోవిడ్-19 కోసం అదే సాంకేతిక పరిజ్ఞానాన్ని ఉపయోగించి పనిచేస్తోంది. అయితే, ఇది ఇతర పరీక్షలలో తీసుకువస్తున్న చిక్కులపై ప్రస్తుతం పనిచేస్తున్నారు. దీనిలో ఉపయోగిస్తున్న సెన్సార్ల సామర్ధ్యంపై శాస్త్రవేత్తలు చాలా ఉత్సుకత చూపిస్తున్నారు. “వైద్య పరికరాల గురించి, ప్రత్యేకమైన సెన్సార్ల గురించి మనం ఆలోచించే విధానాన్ని ఇది సమూలంగా మారుస్తుందని నేను భావిస్తున్నాను ఎందుకంటే వీటిని చాలా తక్కువ ఖర్చుతో సిద్ధం చేయడానికి అవకాశం ఉంది.” అని దస్తూర్ అన్నారు.
