ఆ హీరోయిన్ మామూల్ది కాదు.. కళ్లద్దాలు పెట్టుకొని అందరిని గమనిస్తూ ఉంటుంది: బాబూమోహన్

ప్రముఖ సీనియర్ నటుడు బాబు మోహన్ దివంగత నటి సిల్క్ స్మిత వ్యక్తిత్వం, ఆమెతో తన అనుబంధం గురించి ఆసక్తికర విషయాలు పంచుకున్నారు. అలాగే గత తరం సినీ పరిశ్రమలోని వృత్తి విలువలు, మానవ సంబంధాలపై తన అభిప్రాయాలను వెల్లడించారు. సిల్క్ స్మితను ఉద్దేశించి “చాలా మంచి వ్యక్తి” అని పేర్కొన్న బాబు మోహన్, ఆమె నిర్భయమైన, స్వతంత్ర వ్యక్తిత్వాన్ని గుర్తు చేసుకున్నారు. “ఆమె ఎవరినీ కేర్ చేయదు. ఎవరికీ నమస్కారం పెట్టదు. కాలు మీద కాలు వేసుకొని కూర్చుంటుంది. కళ్లద్దాలతో అందరినీ చూస్తుంటుంది” అని వివరించారు. ఒక సందర్భంలో తాను సిల్క్ స్మితను ఆమె ఎందుకు నల్ల కళ్లద్దాలు ధరిస్తుందని, కాలు మీద కాలు వేస్తుందని అడగగా, ఆమె ఇచ్చిన సమాధానం చాలా మందికి తెలియని వాస్తవమని బాబు మోహన్ అన్నారు. “ఫూల్స్… నన్ను చూస్తారు. ఇలా ఇలా చూస్తారు నన్ను. అందుకనే నన్ను ఎవరు చూస్తున్నాడో గమనిస్తూ ఉంటా నేను కళ్లద్దాలు పెట్టుకొని” అని సిల్క్ స్మిత తనతో చెప్పిందని వివరించారు. అయితే, హీరోలు వచ్చినా కూడా ఆమె కళ్లద్దాలు తీయదని, కానీ బాబు మోహన్‌ను చూడగానే మాత్రం కాలు తీసి లేచి నిలబడేదని, ఆయన ఎక్కడ కూర్చుంటే అక్కడ వచ్చి కూర్చునేదని, తనను ఎంతో ఇష్టపడేదని బాబు మోహన్ గుర్తుచేసుకున్నారు.

ఓసారి దుబాయ్‌లో ఒక ఫంక్షన్‌కు వెళ్ళినప్పుడు, సిల్క్ స్మిత షాపింగ్‌కు వెళ్తూ తనను తోడు రమ్మని కోరిందని, తాను నిరాకరించినా ఆమె పట్టుబట్టి తీసుకెళ్లిందని బాబు మోహన్ తెలిపారు. షాపింగ్‌లో ఆమె ఒక నల్ల కళ్లద్దాల జతను కొనుగోలు చేసి, “ఇవి పెట్టుకోండి బాస్ ఒకసారి” అని తనకిచ్చిందని, అవి చాలా బాగున్నాయని చెప్పగా, “నేను అందుకే కొన్నాను నీకోసం” అని సిల్క్ స్మిత చెప్పిందని బాబు మోహన్ గుర్తుచేసుకున్నారు. ఆ కళ్లద్దాలను తాను ఆమె చనిపోయేదాకా దాచిపెట్టుకున్నానని ఆయన వెల్లడించారు. “మంచి మనుషులు తొందరగా వెళ్లిపోతారు” అని అన్నారు. అలాగే సినీ పరిశ్రమలో పారితోషికాల విషయానికొచ్చినప్పుడు, తమ రోజుల్లో పారితోషికాలు పెంచడం, డిమాండ్ చేయడం వంటివి ఉండేవి కాదని బాబు మోహన్ అన్నారు.

“మాకిచ్చే గౌరవమే మా పారితోషికం అనుకునేది” అని ఆయన పేర్కొన్నారు. తమ చెక్కులు బౌన్స్ అయినా, నిర్మాతలు ఇబ్బందుల్లో ఉన్నారని తెలిస్తే ఎప్పుడూ తిరిగి అడగలేదని తెలిపారు. ఒకసారి ఒక నిర్మాత భార్య పుస్తెల తాడు పెట్టి సినిమా పూర్తి చేస్తున్నానని చెప్పగా, తాను డబ్బులు అడగకుండా వెళ్లిపోయిన సంఘటనను పంచుకున్నారు. ఆ నిర్మాత మరుసటి రోజు వచ్చి, తాను డబ్బులు అడుగుతారేమోనని భయపడ్డానని, కానీ తాను ఆ ప్రస్తావనే తేనందుకు తనను “మహానుభావులు సార్” అని పొగిడి, కొత్త సినిమా అడ్వాన్స్ ఇచ్చి వెళ్ళాడని బాబు మోహన్ వివరించారు.

మరిన్ని సినిమా వార్తల కోసం ఇక్కడ క్లిక్ చేయండి