Tollywood: దసరా కానుకగా రీలీజ్కు రెడీ అవుతున్న సినిమాలు ఇవే.. ఈసారి గట్టిపోటీ ఖాయం గురూ..
ఈ దసరా పండగకు భారీగా సినిమాలను రిలీజ్ చేయడానికి రెడీ అవుతున్నారు మేకర్స్. ఈ క్రమంలోనే పెద్ద పెద్ద స్టార్ హీరోల సినిమాలు ప్రేక్షకుల ముందుకు రానున్నాయి.
Updated on: Feb 05, 2023 | 5:05 PM
పండగలు వచ్చాయంటే చాలు సినిమా ఇండస్ట్రీకి సినిమాల సీజన్ వచ్చినట్టే.. పెద్ద పండగలను టార్గెట్ చేసుకొని సినిమాలను రిలీజ్ చేస్తుంటారు మేకర్స్. ఈ క్రమంలోనే ఈ ఏడాది సంక్రాంతికి బడా సినిమాలు చిరంజీవి వాల్తేరు వీరయ్య, బాలకృష్ణ వీరసింహారెడ్డి సినిమాలు పోటీ పడ్డాయి. ఈ రెండు సినిమాలు మంచి విజయాలను అందుకున్నాయి. ఇక ఇప్పుడు దసరా పై గురిపెట్టారు మేకర్స్. ఈ దసరా పండగకు భారీగా సినిమాలను రిలీజ్ చేయడానికి రెడీ అవుతున్నారు మేకర్స్. ఈ క్రమంలోనే పెద్ద పెద్ద స్టార్ హీరోల సినిమాలు ప్రేక్షకుల ముందుకు రానున్నాయి. ఈ దసరాను టార్గెట్ చేసిన సినిమాలు ఏవంటే..
దసరా పండగ పురస్కరించుకొని సినీ లవర్స్ కు ఫుల్ కిక్ ఇవ్వనున్నారు మూవీ మేకర్స్.. బడా సినిమాలను వరుసగా రిలీజ్ చేయడానికి సన్నాహాలు చేస్తున్నారు. వీటిలో ముందుగా పవర్ స్టార్ పవన్ కళ్యాణ్ నటిస్తోన్న హరి హర వీరమల్లు సినిమా పైనే అందరి దృష్టి ఉంది. క్రిష్ దర్శకత్వంలో తెరకెక్కుతోన్న ఈ సినిమా పిరియాడికల్ డ్రామాగా రానుంది. ఈ మూవీలో పవన్ బందిపోటుగా కనిపించనున్నాడు. అలాగే మాస్ మహారాజా రవితేజ నటిస్తోన్న టైగర్ నాగేశ్వరరావు మూవీ కూడా దసరా కానుకగా రిలీజ్ చేయనున్నారు. ఈ సినిమాలో రవితేజ డిఫరెంట్ గెటప్ లో కనిపించనున్నాడు. మోస్ట్ వాంటెడ్ క్రిమినల్ అయిన టైగర్ నాగేశ్వరరావు జీవితకథ ఆధారంగా ఈ సినిమా తెరకెక్కుతోంది.
అలాగే నటసింహం నందమూరి బాలకృష్ణ అనీల్ రావిపూడి దర్శకత్వంలో తెరకెక్కుతోన్న సినిమా కూడా దసరానే టార్గెట్ చేసినట్టు తెలుస్తోంది. ఈ సినిమాలో శ్రీలీల బాలయ్య కూతురిగా నటించనుందట. అలాగే హీరోయిన్ గా కాజల్ అగర్వాల్ నటిస్తోందని తెలుస్తోంది. ఇదిలా ఉంటే విజయ్ దేవరకొండ ఖుషి సినిమా కూడా అదే పండగ రోజు రిలీజ్ చేయనున్నారు. శివ నిర్వాణ దర్శకత్వంలో తెరకెక్కుతోన్న ఈ సినిమాలో సమంత హీరోయిన్ గా నటిస్తుంది. వీటితో పాటు సూపర్ స్టార్ మహేష్ బాబు త్రివిక్రమ్ దర్శకత్వంలో రానున్న సినిమా కూడా అదే రోజున రిలీజ్ అవ్వనుందని తెలుస్తోంది. ఈ మూవీ షూటింగ్ రీసెంట్ గా స్టార్ట్ అయ్యింది.
