Mammootty: ఎల్లలు దాటిన అభిమానం.. మమ్ముట్టిపై అభిమానాన్ని వినూత్నంగా చాటుకున్న ఫ్యాన్స్‌..

మలయాళ చిత్ర పరిశ్రమలో మమ్ముట్టికున్న క్రేజ్‌ గురించి ప్రత్యేకంగా చెప్పాల్సిన అవసరం లేదు. రెండేళ్ల క్రితం 'యాత్ర' సినిమాతో మెప్పించిన ఆయనకు తెలుగులోనూ భారీగానే అభిమానులున్నారు..

Basha Shek |
Updated on: Dec 03, 2021 | 9:47 AM

మలయాళ చిత్ర పరిశ్రమలో మమ్ముట్టికున్న క్రేజ్‌ గురించి ప్రత్యేకంగా చెప్పాల్సిన అవసరం లేదు. రెండేళ్ల క్రితం ‘యాత్ర’ సినిమాతో మెప్పించిన ఆయనకు తెలుగులోనూ భారీగానే అభిమానులున్నారు. కాగా మలయాళ సూపర్‌స్టార్‌ నటిస్తోన్న తాజా చిత్రం ‘సీబీఐ 5’. గతంలో వచ్చిన సీబీఐ సిరీస్‌కిది కొనసాగింపు. ఇందులో వచ్చిన ‘ఒరు సిబీఐ డైరీ కురిప్పు’, ‘నేరరియాన్ సిబీఐ’, ‘ జాగ్రత్త’, ‘సేతురామయ్యర్ సిబీఐ’, సినిమాలన్నీ సూపర్‌ డూపర్‌ హిట్‌గా నిలిచాయి. ఒక సీబీఐ ఆఫీసర్‌ తన తెలివి తేటలతో హత్య కేసులను ఎలా ఛేదించాడన్నదే ఈ సిరీస్‌ కథ. తాజాగా ఇందులో ఐదో భాగం ‘సీబీఐ5’ షూటింగ్‌ పూజా కార్యక్రమాలతో ఘనంగా ప్రారంభమైంది. గత నాలుగు సినిమాలను తెరకెక్కించిన మధునే తాజా సినిమాకు కూడా దర్శకత్వం వహిస్తున్నారు.

66 థియేటర్లలో ఫ్లెక్సీలు.. కాగా తమ అభిమాన హీరో కొత్త చిత్ర ప్రారంభోత్సవాన్ని వినూత్నంగా సెలబ్రేట్‌ చేసుకున్నారు మమ్ముట్టి ఫ్యాన్స్‌. సినిమా షూటింగ్‌ ప్రారంభం రోజున వివిధ థియేటర్లో ఫ్లెక్సీలు కట్టి ఘనంగా సంబరాలు చేసుకున్నారు. ఒకటి కాదు రెండు థియేటర్లలో కాదు ఏకంగా కేరళ రాష్ట్రంలోని వివిధ ప్రాంతాల్లోని సుమారు 66 థియేటర్స్ లో ఫ్లెక్సీలు కట్టి హీరోపై తమ అభిమానాన్ని వినూత్నంగా చాటుకున్నారు. సాధారణంగా ఏ హీరో ఫ్యాన్స్ అయినా సినిమా విడుదల రోజున థియేటర్స్ లో ఫ్లెక్సీలు కడతారు. హీరోల కటౌట్లకు పాలాభిషేకాలు, హారతులివ్వడం కూడా చేస్తుంటారు. కానీ ఇలా ఒక సినిమా పూజా కార్యక్రమం రోజున హీరోకు ఫ్లెక్సీలు కట్టడం భారతీయ సినిమా చరిత్రలోనే మొదటిసారి కావడం విశేషం.